ەلوردادا سۋداعى قاۋىپسىزدىك ەرەجەلەرىن ساقتاماعان 8 ادام سۋعا كەتتى. سۋعا شومىلۋ كەزەڭى باستالىسىمەن بولعان ءولىم فاكتىلەرى استانا قالاسى توتەنشە جاعدايلار دەپارتامەنتىندە الاڭداۋشىلىق تۋدىردى. سول سەبەپتى دەپارتامەنت استانالىق جاعاجايعا بارىپ, قاۋىپسىزدىك ەرەجەلەرىن حالىققا ءتۇسىندىردى.
ەسىل وزەنىنىڭ بويىن كەمەمەن جاعالاپ, رەيد وتكىزگەن دەپارتامەنت قىزمەتكەرلەرى جاعاجايدا ىشىمدىك ءىشىپ, كەيىن سۋعا تۇسۋگە ۇمتىلعانداردىڭ ءبىرازىن پوليتسياعا تاپسىردى. بۇل تۋرالى استانا قالالىق تجد ءبولىم باستىعى, پودپولكوۆنيك ەلدور رايىمبەكوۆ بىلاي دەدى:
– وكىنىشكە قاراي, سۋعا كەتىپ مەرت بولعانداردىڭ سانى ءوسىپ بارادى. ونىڭ ىشىندە بالالار دا بار. بۇگىندە استانا بويىنشا قايعىلى 8 وقيعا تىركەلسە, سونىڭ بەسەۋىندە 9-12 جاس ارالىعىنداعى بالالار سۋعا كەتتى. وعان ەڭ الدىمەن اكە-شەشەلەردىڭ جاۋاپسىزدىعى سەبەپ بولىپ وتىر. كوپشىلىگى بالالارىن قاراۋسىز قالدىرىپ, قايعىلى جاعدايعا دۋشار بولادى. ستاتيستيكالىق دەرەكتەرگە قاراعاندا, سۋعا كەتەتىن ادامداردىڭ باسىم بولىگى – 25 پەن 40 جاس ارالىعىنداعى ازاماتتار. ءبىز ۇنەمى حالىق اراسىندا ءتۇسىندىرۋ جۇمىستارىن جۇرگىزەمىز. الەۋمەتتىك جەلىلەر مەن باق ارقىلى اقپارات تاراتامىز. رەيد بارىسىندا اقپاراتتىق حابارلامالار ۇلەستىرەمىز. الدىن الۋ شارالارى وتكەن جاعدايدىڭ وزىندە كەيبىرى ەلەمەي جاتادى.
قۇتقارۋشىلاردىڭ ايتۋىنشا, سۋعا شومىلۋ كەزىندە ىشىمدىك ءىشۋ – مەزگىلسىز ءولىمنىڭ ءبىر سەبەبى. استانا مەيرامى كەزىندە ەسىل جاعاسىنان ىشىمدىككە سىلقيا تويىپ ۇيىقتاپ قالعان ازاماتتار كەزدەسكەن ەكەن. ال ىشىمدىك ءىشىپ العان تاعى 4 ازامات بەلگىلەنبەگەن جەردە سۋعا تۇسكەن. ولارعا ەسكەرتۋ جاسالىپ, كەيبىرى اكىمشىلىك جاۋاپكەرشىلىككە تارتىلدى. دەسە دە, ءوز قۇقىعىمىزدى بىلەمىز دەپ تەپسىنگەن ازاماتتار كەزدەسىپ جاتادى.
استانا قالالىق تجد ءبولىم باستىعى, پودپولكوۆنيك ەلدور رايىمبەكوۆتىڭ ايتۋىنشا, سۋعا كەتكەن ادامدى 5 مينۋتتىڭ ىشىندە قۇتقارىپ قالۋعا بولادى.
