قۇرىلىس قارقىنى – ۇدايى باقىلاۋدا

نۇر-سۇلتان قالاسىنىڭ اكىمى التاي كولگىنوۆ «گارانت» تۇرعىن ءۇي كەشەنىنىڭ قۇرىلىس بارىسىمەن تانىستى.

بۇل پروبلەمالى نىساننىڭ قۇرىلىسىن 2011 جىلى «ازبۋكا جيليا» كومپانياسى باستاعان. تۇرعىن ءۇي 330 پاتەرگە ەسەپتەلگەن. 2016 جىلى ول «وردا ينجينيرينگ» جشس-كە بەرىلگەن. مۇنداعى ۇلەسكەرلەردىڭ سانى – 168 وتباسى.
شاھار باسشىسى ءوز سوزىندە نىساننىڭ قۇرىلىس قارقىنىن تومەندەتپەۋدى تاپسىردى.
– ءبىز سىزدەرمەن ماۋسىم ايىنىڭ 19-ى كۇنى كەزدەس­تىك. قازىردىڭ وزىندە ىلگەرىلەۋ بايقالادى. ەندى وسى قارقىندى تومەندەتپەۋ قاجەت. ءتيىمدى قۇرىلىس ماۋسىمىن دۇرىس پايدالانۋ كەرەك. قاۋىپسىزدىكتى ساقتاپ, ساپاعا ءمان بەرىڭىزدەر. ەكىنشى اۋىسىم جۇمىسشىلارى جاقىن ماڭداعى تۇرعىنداردىڭ مازاسىن الماي, ىشكى جۇمىس­تارمەن اينالىسقانى ءجون. اۋماقتى اباتتاندىرۋدى كوكتەمگە قالدىرۋعا بولمايدى, – دەدى ول.
ەندىگى ۋاقىتتا ەلوردا اكىمى جۇمىس ۋاقىتى باستالعانعا دەيىن ۇلەسكەرلىك قۇرىلىس الاڭدارىن ارالاپ, ولاردىڭ جۇمىسىن قاداعالايدى. بۇگىندە قالادا قۇرىلىسى اياقتالماعان 51 نىسان بار.