ەلوردانىڭ ەسىل اۋدانىندا بيىل «جۇمىسپەن قامتۋدىڭ جول كارتاسى» باعدارلاماسى اياسىندا ەكى مىڭعا جۋىق جۇمىس ورنى قۇرىلدى. ياعني وسىنشاما ادام جۇمىسپەن قامتىلىپ, اباتتاندىرۋ, جولداردى سالۋ مەن جوندەۋ, اۋدان ينفراقۇرىلىمىنا قاتىستى باسقا دا ماڭىزدى ىستەرگە تارتىلدى.
جالپى العاندا, وسى جىلى اۋداندا بەس قوعامدىق كەڭىستىك اباتتاندىرىلىپ, 20 اۋلا جوندەلىپ جاتىر. سونىڭ ىشىندە شەت ايماقتار دا بۇل جۇمىستاردان تىس قالعان جوق. اتاپ ايتقاندا, «پريگورودنىي», «ۇركەر» تۇرعىن الاپتارىندا ەكى-ەكىدەن قوعامدىق كەڭىستىكتەر اشىلدى, ال ونىڭ بىرەۋى ورتالىق ساياباقتا پايدا بولدى. سونىڭ ىشىندە ساياباقتا جالپى ۇزىندىعى 3,5 شاقىرىم جۇگىرۋ جولى, ۆوركاۋت جانە ستريتبول الاڭدارى جوندەلىپ, جاراقاتتانۋدان قورعايتىن ارنايى جابىندى توسەلدى.
– «جۇمىسپەن قامتۋدىڭ جول كارتاسى» باعدارلاماسى بويىنشا بيىل اۋداندا باسقا جىلدارمەن سالىستىرعاندا كوپ اۋلا جوندەلەدى. قازىر اۋداندا بارلىعى 408 اۋلا بار. ونىڭ 42-ءسى جوندەۋدى قاجەت ەتەدى. ارينە, ونىڭ ءبارىن وسى جىلى بىردەن رەتكە كەلتىرە المايمىز. بۇل قارجىلاندىرۋعا بايلانىستى. وسى جىلعى مەجە – 20 اۋلا. قازىرگى ۋاقىتتا اتقارىلعان جۇمىستاردىڭ ساپاسىنا تۇرعىندار ريزا. ءبىز وتكەن قىستا ۋاقىتتى بوسقا وتكىزبەي, قاي جەردەگى اۋلالاردى جوندەيتىنىمىزدى انىقتادىق. بۇل ىستە تۇرعىنداردىڭ وتىنىشتەرى مەن تىلەكتەرىن ەسكەردىك. جوبالىق-سمەتالىق قۇجاتتاما سوعان ساي ازىرلەندى, – دەيدى ەسىل اۋدانىنىڭ اكىمى بەرىك جاكەنوۆ.
«تەلمان» تۇرعىن الابىنىڭ جايساڭ كوشەسىندە وسى ايدا سپورت جانە بالالار الاڭىنىڭ قۇرىلىسى باستالدى. «Samruk-Kazyna Trust» الەۋمەتتىك جوبالاردى دامىتۋ قورىنىڭ تاپسىرىسىمەن اتقارىلىپ جاتقان جۇمىستار جوسپارعا سايكەس قازان ايىندا اياقتالۋى ءتيىس.
وسى جىلى اۋداندا 10 مىڭ اعاش پەن 5 مىڭ كوپجىلعى كوشەت وتىرعىزىلدى. وسى ۋاقىتتا ەكسپو اۋماعى مەن كەرەي جانە جانىبەك حاندار كوشەسىندە اعاش وتىرعىزۋدىڭ كۇزگى ناۋقانى باستالدى. سوڭعى ون كۇندە مۇندا 500 اعاش وتىرعىزىلدى. جىلدىڭ اياعىنا دەيىن تاعى 3 مىڭعا جۋىق اعاش وتىرعىزۋ جوسپارلانىپ وتىر.
تولە بي جانە ە49 كوشەلەرىندە قىركۇيەك ايىنىڭ سوڭىنا دەيىن ينجەنەرلىك جەلىلەردىڭ قۇرىلىسى اياقتالىپ, جول سالىنادى. وسى جىلى اۋداندا ەكى ورتا مەكتەپتى پايدالانۋعا بەرۋ جوسپارلانىپ وتىر. ونىڭ ءبىرىنشىسى ساۋران جانە №24 كوشەلەرىنىڭ قيىلىسىندا ورنالاسسا, ەكىنشىسى قورعالجىن تاسجولىنان وڭتۇستىككە قاراي ورىن تەبەدى.
جالپى العاندا, ەسىل اۋدانى قارقىندى دامىپ جاتىر. بىلتىر وسى اۋداندا 242 مىڭ ادام تۇرسا, قازىر تۇرعىندار سانى 278 مىڭ ادامعا جەتتى. ياعني ءبىر جىلدىڭ ىشىندە 36 مىڭ ادامعا ارتقان. ءبىر جىلدا اۋدان اۋماعىندا 120-دان استام كوپپاتەرلى تۇرعىن ءۇي كەشەنى سالىندى.
