نۇر-سۇلتان قالاسى قوعامدىق دامۋ ىستەرى باسقارماسىنىڭ ۇيىمداستىرۋىمەن ەلورداداعى «Ritz Carlton» قوناقۇيىندە «ءبىر الەم – ءبىر ءومىر» اتتى حالىقارالىق جاستار بالى ءوتتى.
سالتاناتتى كەشتى اشقان ەلوردا اكىمىنىڭ ورىنباسارى باقتيار ماكەن بارلىق دەبيۋتانتتى قۇتتىقتادى.
– ەلوردا اكىمدىگى جاستار جىلىندا 136 جوبا اياسىندا 600-دەن اسا ءىس-شارا وتكىزدى. سولاردىڭ ءبىرى – بۇگىنگى بال. بۇل شارانىڭ ماقساتى – ءارتۇرلى ۇلتتاردىڭ مادەنيەتى جانە ونەرى ارقىلى ءبىر-بىرىنە دەگەن قۇرمەتتەرىن, سۇيىسپەنشىلىكتەرىن ارتتىرۋ, ولاردىڭ تۇلعا رەتىندە رۋحاني كەمەلدەنۋلەرىنە ىقپال ەتۋ, زاماناۋي, جاڭاشىل, شىعارماشىل, قايىرىمدى, ادامگەرشىلىك قاسيەتى جوعارى جاھان جاستارىنىڭ ورتاسىن قالىپتاستىرۋ, جىگەرلى جاستاردىڭ باس قوسۋلارى ارقىلى جاھاندىق ماسەلەلەردىڭ بۇگىنگى جاي-كۇيىنە ۇندەۋ جاساۋ, ناتيجەلى قايىرىمدىلىق شارالارىن جۇزەگە اسىرۋ, يگى شارالاردىڭ سانىن ارتتىرۋ, – دەپ اتاپ ءوتتى قالا اكىمىنىڭ ورىنباسارى.
جيىنعا قازاقستاندىق قىز-جىگىتتەرمەن قوسا رەسەي, قىتاي, نيگەريا, تاجىكستان, وزبەكستان, قىرعىزستان, ۋكراينا, يندونەزيا, ۆەنەسۋەلا ەلدەرىنەن كەلگەن جالپى سانى 100 دەبيۋتانت قاتىستى. ولار «پولونەز», «جاستار ءبيى», «الەم حالىقتارىنىڭ بيىنەن» باسقا ابايدىڭ 175 جىلدىق مەرەيتويىنا وراي ۇلى حاكىمنىڭ «كوزىمنىڭ قاراسى» انىنە دوڭگەلەنە ۆالس بيلەدى.
«بۇل – مەنىڭ نۇر-سۇلتانعا العاش كەلۋىم. ىستىق جەردەن ەكەنىمە قاراماستان, جەرگىلىكتى كليمات تا, حالىق تا ۇناپ جاتىر. بيگە ءبىر اپتا بويى دايىندالدىم. بۇل كەشتە تاجىكستاندىق قىزبەن بىرگە ونەر كورسەتەمىن» دەيدى ۆەنەسۋەلالىق قاتىسۋشى داۆيد گومەس رودريگەز. قىرعىزستاندىق جۇپ قانىكەي ماماسەيىتوۆا مەن نۇرجىگىت ساماربەكۇلى دا بۇگىنگى ءىس-شاراعا ۇلكەن ازىرلىكپەن كەلگەن ەكەن. «ءبىراز ۋاقىت بۇرىن بالعا قاتىسۋعا ءوتىنىش بەرگەن بولاتىنبىز. ىرىكتەۋدەن وتكەنىمىزدى ەستىگەندە قۋانىشىمىزدا شەك بولمادى» دەپ اعىنان جارىلدى ولار.
دەبيۋتانتتار بالعا دايارلىق بارىسىندا قايىرىمدىلىق جۇمىستارىمەن دە اينالىسقان. اتاپ ايتساق, جاستار استاناداعى قارتتار ءۇيى مەن بالالار ۇيىندە رۋحاني كەش ۇيىمداستىرىپ, «جۇرەكتەن جۇرەككە» اكتسياسى اياسىندا الەۋمەتتىك جاعدايى تومەن 100 وتباسىعا ماتەريالدىق كومەك كورسەتكەن.
