قازاقستان رەسپۋبليكاسىنىڭ ۇلتتىق مۋزەيىندە ا.قۇنانبايۇلىنىڭ تۋعانىنا 170 جىل تولۋىنا ارنالعان «اباي مۇراسى» اتتى عىلىمي كونفەرەنتسيا ءوتتى.
مايەكتى مادەني-رۋحاني شاراعا بەلگىلى ابايتانۋشىلار, عالىمدار, قوعام قايراتكەرلەرى جانە استانا قالاسىنداعى ءبىلىم مەكەمەلەرىنىڭ ۇستازدارى مەن وقۋشىلارى قاتىستى.
«2015 ەلىمىز ءۇشىن تاريحي وقيعاعا تولى ەرەكشە جىل بولعالى تۇر. قازاق حاندىعىنىڭ قۇرىلعانىنا – 550 جىل, شوقان ءۋاليحانوۆتىڭ تۋعانىنا – 180 جىل, اباي قۇنانبايۇلىنىڭ تۋعانىنا – 170 جىل, فاشيزمگە قارسى سوعىستاعى جەڭىسكە – 70 جىل, قازاقستان حالقى اسسامبلەياسى مەن اتا زاڭىمىزعا – 20 جىل. ارينە, تاريحىمىزدا لايىقتى ءوز ورنىن العان بۇل اتاۋلى وقيعالاردىڭ ەشقايسىسى دا ۇلتتىڭ ۇلىلىعىن ۇلىقتايتىن ۇلتتىق مۋزەي نازارىنان تىس قالمايدى. كەمەڭگەر ويشىل ابايدىڭ (يبراھيم قۇنانبايۇلى) تۋعانىنا 170 جىل تولۋىنا وراي ۇيىمداستىرىلىپ وتىرعان بۇگىنگى كونفەرەنتسيا وسى اتاۋلى ءىس-شارانىڭ بەتاشارى دەۋگە لايىق. بۇل عىلىمي جيىننىڭ ورتاعا سالار ويى كوپ, ءورىسى كەڭ, تولعاۋى تەرەڭ, بۇگىنگى جاس ۇرپاققا بەرەرى مول بولادى دەپ ۇمىتتەنەمىز» دەدى ۇلتتىق مۋزەيدىڭ ديرەكتورى دارحان مىڭباي.
كونفەرەنتسيادا ابايتانۋشى, پروفەسسور مەكەمتاس مىرزاحمەتوۆ, فيلوسوفيا عىلىمدارىنىڭ دوكتورى, اكادەميك عاريفوللا ەسىم, ل.گۋميلەۆ اتىنداعى ەۇۋ-دىڭ «وتىرار كىتاپحاناسى» عىلىمي ورتالىعىنىڭ ديرەكتورى تۇرسىن جۇرتباي, ءال-فارابي اتىنداعى قازۇۋ-دىڭ«ابايتانۋ» عىلىمي-زەرتتەۋ ورتالىعىنىڭ ديرەكتورى جانعارا دادەباەۆ, تاريح عىلىمدارىنىڭ دوكتورى, اكادەميك ورازاق سماعۇلوۆ, فيلولوگيا عىلىمدارىنىڭ دوكتورى, پروفەسسور سەرىك نەگيموۆ سياقتى بەلگىلى عالىمدار اقىن مۇراسى جايلى ارنايى بايانداما جاسادى. باسقا دا زيالى قاۋىم وكىلدەرى, ابايتانۋعا ەندى-ەندى ات باسىن بۇرىپ جۇرگەن ماگيسترانتتار وسى تاقىرىپقا بايلانىستى وزەكجاردى وي ءوربىتتى.
باسقوسۋ بارىسىندا ابايدىڭ العاشقى شىققان ەڭبەكتەرى, شەت تىلدەرىنە اۋدارىلعان تۋىندىلارى جيىنعا قاتىسۋشىلار نازارىنا ۇسىنىلىپ, بەينەفيلم كورسەتىلىپ, ۇلتتىق مۋزەي قورىنداعى ونىڭ پورترەتتەرىنەن شاعىن كورمە ۇيىمداستىرىلدى. سونىمەن قاتار اباي وقۋلارى بايقاۋىنىڭ جەڭىمپازدارى اقىلگوي اتالارىنىڭ قارا سوزدەرى مەن ولەڭدەرىن وقىسا, انشىلەر اندەرىن شىرقادى.
ىرىسبەك دابەي
