سۋ تاسقىنى ءجىتى باقىلاۋدا

«ەلوردادا سۋ تاسقىنى قاۋپى بار. ونىڭ الدىن الۋ ءۇشىن كارىزدەر مەن جىلعالاردى تازارتىپ, سۋ قويمالارىنداعى سۋ دەڭگەيى تۇراقتى قاداعالانۋدا» دەپ حابارلادى استانا قالاسى اكىمىنىڭ ءباسپاسوز قىزمەتى. 

قازىر قالادا  سۋ باسۋ قاۋپى تونەتىن 32 جەر تەلىمى بار. ولار الماتى اۋدانىنا قاراستى «وڭتۇستىك شىعىس», «پرومىشلەننىي», «قازقالاشىق», «جەلەزنودوروجنىي», «ينتەرناتسيونالنىي» تۇرعىن الاپتارى, №2 جىلۋ ەلەكتر ورتالىعى مەن «قازاقستان» دۇكەنى ماڭىنداعى تۇرعىن سەكتورلار. ال, ەسىل اۋدانىندا يلينكانىڭ شىعىس جاعى, ۇركەر, شۇبار, قورعالجىن تاس جولى, №62 كوشە, ش. بەيسەكوۆا كوشەسى, سىعاناق كوشەسى سياقتى التى ۋچاسكە بولسا, سارىارقا اۋدانىندا «ءوندىرىس», «كوكتال-1», «كوكتال-2», «كيرپيچنىي», «اگرو­قالاشىق», №1 جىلۋ ەلەكتر ورتا­لىعى مەن سالىنىپ جاتقان جەو ماڭى سياقتى جەتى ۋچاسكە بار.

الدىن الا اتقارىلعان جۇمىس­تاردىڭ قاتارىنا 2014 جىلدىڭ 27 قازانىنان 2015 جىلدىڭ 6 ساۋىرىنە دەيىنگى مەرزىمدە پوليگونعا قالا اۋماعىنان 3 427 620 تەكشە مەتر قار تاسىلىپ شىعارىلعانىن ايتۋعا بولادى. سونداي-اق, سۋ جينالاتىن كارىزدەر, ارنالار مەن قۇبىرلار جانە ارىقتار تەكسەرىلىپ, تازالاندى. اتاپ ايتقاندا, الماتى اۋدانىندا – 12 070 توسەم مەتر, سارىارقا اۋدانىندا – 24466 توسەم مەتر, ەسىل اۋدانىندا – 3620 توسەم مەتر, بارلىعى – 40156 توسەم مەتر ارىق جۇيەلەرى, 10025 دانا جاڭبىر قابىلداعىش تور تازارتىلدى.

كەشەندى جوسپاردا قر اۋىل شا­رۋاشىلىعى مينيسترلىگىنىڭ «كازۆودحوز» رەسپۋبليكالىق مەملەكەتتىك مەكەمەسى, سونىڭ ىشىندە استانا گيدروتورابى اتقاراتىن  جۇمىستار دا قاراستىرىلعان. بۇل كاسىپورىن ەسىل وزەنىندە  گيدرولوگيالىق باقىلاۋ جۇرگىزىپ, ءتۇرلى ۆەدومستۆولار اراسىندا بايلانىس ورناتادى.

قولدا ءجۇز قىرىق جەتى سۋ تارتاتىن اسسەنيزاتورلىق تەحنيكا بار. سولاردىڭ كومەگىمەن الماتى اۋدانىندا 185 كوشە, 42 مەكتەپ پەن 27 بالاباقشانىڭ ىرگەلەس اۋماقتارى,  26 دەنساۋلىق ساقتاۋ نىسانى ماڭى, ەسىل اۋدانىندا 202 كوشە مەن 11 مەكتەپ جانە 25 بالاباقشاعا ىرگەلەس اۋماقتار, سارىارقا اۋدانىندا  270 كوشە مەن 31 مەكتەپ جانە 33 بالاباقشانىڭ ىرگەلەس اۋماقتارى, 18 دەنساۋلىق ساقتاۋ نىسانى تازالاندى.

ەلوردانىڭ ءار اۋدانىندا سۋ تاسقىنىنا قارسى جۇيەلى جۇمىستار جۇرگىزىلۋدە. بۇعان سارىارقا  اۋدا­نىنداعى جولىمبەت كوشەسى مەن ورتالىق بازار اۋماعىنداعى ماگيس­ترال كوللەكتورىنا جاڭبىر سۋى اعاتىن كارىز جەلىلەرى ويىقتارىنىڭ جاسالۋىن ايتۋعا بولادى. ناۋرىزدىڭ سوڭىندا چەحوۆ كوشەسىندەگى ۇزىندىعى 48 مەتر ماگيسترالدى كوللەكتور تازالانىپ, جاڭا جابىن سالىندى. اعىن سۋلار ەركىن اعاتىنداي جۇلگەلەر تارتىلدى.

«اسكادي» جشس مەردىگەرلىك ۇيىمىنا كوكتال كەنتى اۋماعىنداعى №1 جاڭبىر سۋىن تازالايتىن قۇرىل­عىلاردى قار سۋىنان تازالاۋ تاپسىرىلدى. قازىرگى تاڭدا ۋاقىتشا سورعى قۇرىلعىسى ورناتىلدى, سورعى ستانساسى قالىپتى  جۇمىس ىستەپ تۇر.

بۇعان قوسا, ەسىل اۋدانىندا دوس­پامبەت جىراۋ كوشەسى بويىنا 1600 مەترگە سوزىلعان بوگەت سالىنىپ, مەردىگەرلىك ۇيىمدار سورعى قۇرىلعىلارىن ورناتتى. وعان باراتىن جولدى قالىپقا كەلتىردى.

«قۇلاگەر قك» جشس جۇرۋگە قيىندىق كەلتىرەتىن ون ءۇش كوشەنىڭ ونىنا قيىرشىق تاس توسەپ, وي­سىلقارا, شوپان اتا, زەڭگى بابا, سىرىم باتىر كوشەلەرىن قالىپقا كەلتىرۋدە. جانقوجا باتىر كوشەسىن قايتا جوندەۋ جوسپارلانعان.

ەسىل اۋدانىنىڭ اكىمدىگى قار سۋى ءوتىپ كەتپەۋى ءۇشىن كابەل قۇرىل­عىلارىنىڭ ءۇستىن ينەرتتى ماتەريال­دارمەن جاپتى. سونىمەن قاتار, كارىز  جۇيەلەرى تەكسەرىلىپ, بوگەت سىرتىنداعى باقىلاۋ قۇدىقتارى بىتەلدى.

كىشى تالدىكول سۋىنىڭ دەڭگەيىن تومەندەتۋ ماقساتىندا سىعاناق كوشەسى بويىنداعى قورشاۋ بوگەتىندە تاۋلىگىنە 1600 تەكشە مەتر سۋ ايدايتىن سورعى ورناتۋ جوسپارلانۋدا. قازىر كىشى تالدىكول اۋماعىنا جاقىن سىعاناق  كوشەسى بويىنداعى قورشاۋ بوگەتى مىقتالىپ, بەكىتىلۋدە. كىشى تالدىكولدەن كۇشتەپ سۋ ايداۋ ءۇشىن پوليەتيلەن قىسىمدى قۇبىر ساتىپ الىندى. سۋ ءجۇرۋ  كوللەكتورىن جوندەۋ جۇمىستارى باستالدى.

بەيسەكوۆا كوشەسى بويىندا جاڭبىر سۋى كارىزىن سالۋ جۇمىسىن مەردىگەرلىك ۇيىم اعىمداعى جىلدىڭ 20 ساۋىرىندە اياقتاۋدى جوسپارلاۋدا.

«زاپادنىي» باۋ-باقشاسى جانە باسقا دا سەرىكتەستىكتەردى سۋ باسۋ قاۋ­پىنەن ساقتاۋ ءۇشىن ەسىل وزەنىنىڭ سول جاعالاۋىن بيىكتەتۋ جۇمىستارى قولعا الىنىپ, بوگەتتەر تۇرعىزۋ قاجەت. قازىر جاعالاۋدىڭ ءجۇز مەتر جەرىنىڭ توپىراعى بيىكتەتىلدى.

– تۇتاستاي العاندا, وسىنداي كەشەندى جۇرگىزىلگەن ءىس-شارالار  ناتيجەسىندە قالا اۋماعىندا سۋ باسۋ قاۋپى بار ۋچاسكەلەر قازىر قاتاڭ باقىلاۋعا الىندى. بۇل كوكتەمگى  قار سۋى مەن تاسىعان وزەن سۋىنان كەلەتىن قاۋىپتى سەيىلتۋگە تولىق مۇمكىندىك بەرەدى, – دەدى استانا قالاسى كوممۋنالدىق شارۋاشىلىق باسقارماسىنىڭ باسشىسى پاۆەل كۋلاگين.