«مەرەيلى وتباسى» ۇلتتىق بايقاۋىنىڭ جەڭىمپازى استانالىق احمەتوۆتەر اۋلەتى تۋرالى جازىلعان كىتاپ جارىق كوردى.
كىتاپتا كەنداي احمەتوۆ ءوزىنىڭ قىزىقتى دا ونەگەلى ءومىر جولىن بايانداپ قانا قويماي, كورگەنى مەن كوڭىلگە تۇيگەنىن ايتىپ, تىرشىلىك تاجىريبەسىنەن تۋىنداعان ويلارىن ورتاعا سالادى.
قازاقستان تەمىر جولى سالاسىنداعى اۋلەتتىك جالپى ەڭبەك ءوتىلى 1264 جىلدى قۇرايتىن بۇل وتباسىنىڭ وزگەلەرگە ۇلگى بولارلىق تۇستارى كوپ. كىتاپ اۆتورى تەمىر جول ستانساسىندا وتكەن بالالىق شاقتىڭ ەستەن كەتپەس بال كۇندەرى جايىندا اسەرلى اڭگىمەلەيدى. اۋلەتتىڭ ۇلكەندەرىن سىيلاۋ, تۋىستىق, باۋىرمالدىق قارىم-قاتىناس, ءبىلىم الۋعا, زامانا كوشىنەن قالماۋعا ۇمتىلۋ, ءداستۇر مەن اتا سالتىن كوزدىڭ قاراشىعىنداي ساقتاۋ – ونىڭ قاستەرلى قاسيەتى, ۇلكەن مۇراتى ەكەنى اڭعارىلادى.
كىتاپتاعى بالالىق شاق, پەرزەنتتىك سەزىمنەن باستاپ, دوستىق, ماحاببات, ادامدار اراسىنداعى سىيلاستىق, ادالدىق, قىزمەتتەگى جاۋاپكەرشىلىك, تاعى باسقا ىزگى قاسيەتتەر مەن تارتىمدى باياندالعان وقيعالاردان اۆتوردىڭ بيىك بولمىسى كەڭىنەن تانىلا تۇسكەندەي.
كوز ءسۇزىپ شىققان جالپى وقىرماندى جاڭا تۋىندىنىڭ بەي-جاي قالدىرماسىنا سەنىمدىمىز.
ءنازيرا سايلاۋقىزى
