اباي ەسكەرتكىشىنىڭ الدىندا «نۇر-سۇلتان – ەلىمىزدىڭ باس قالاسى, جاستار – بولاشاقتىڭ باستاماسى» دەگەن كىتاپ جانە پوەزيا مەرەكەسى ءوتتى.
بۇل شارانى مادەنيەت جانە سپورت باسقارماسىنىڭ قولداۋىمەن ورتالىقتاندىرىلعان كىتاپحانالار جۇيەسى ۇيىمداستىردى. بيىلعى مەرەكە اباي اتامىزدىڭ الداعى جىلعى 175 جىلدىق مەرەيتويىنا ارنالدى. مادەني شارا الدىمەن ۇلى اقىن ەسكەرتكىشىنە گۇل شوعىن قويۋدان باستالدى. سودان كەيىن تۇرعىندار مەن قالا قوناقتارى «ابايدىڭ رۋحى» اتتى تەاترلاندىرىلعان قويىلىمدى تاماشالادى. حاكىم اتامىزدىڭ ءرولىن ق.قۋانىشباەۆ اتىنداعى قازاق اكادەميالىق مۋزىكالىق-دراما تەاترىنىڭ اكتەرى قاسىمحان بۇعىباي سومدادى.
– ءبىز بۇل ءىس-شارانى قالا كۇنى مەرەكەسىنە وراي جىل سايىن وتكىزىپ كەلەمىز. بيىلعى كەشتى اباي اتامىزعا ادەيىلەپ ارنادىق. ويتكەنى اقىن شىعارمالارىن جۇرتشىلىققا كەڭىرەك ناسيحاتتاۋدى كوزدەدىك. ودان قالدى, جاستار جىلى بولعاندىقتان, جاس وقىرماندارىمىزعا دا قىزىقتى ويىندار, ءتۇرلى بايقاۋلار ۇيىمداستىرىپ وتىرمىز. سوندىقتان ءبارىڭىزدى ەلوردا كۇنىمەن قۇتتىقتايمىن, – دەدى ورتالىقتاندىرىلعان كىتاپحانالار جۇيەسىنىڭ ديرەكتورى گۇلبادان مادىباەۆا.
شارا بارىسىندا جاس اقىندار استاناعا ارناعان ولەڭدەرىن وقىپ, جينالعان قاۋىمعا رۋحاني ءلاززات سىيلادى. شىعارماشىل جاستارعا ارنالعان جىر ءمۇشايراسىنىڭ جەڭىمپازدارى ماراپاتتالدى. قۋىرشاق تەاترىنىڭ ارتىستەرى جاس وقىرماندارعا ارناپ «جاڭا كىتاپتار كەيىپكەرلەرىمەن تانىسۋ» دەگەن ويىندار وتكىزدى. «جاستار جانە كىتاپ» اتتى ادەبي نون-ستوپ دەگەن ءىس-شارا ۇيىمداستىرىلىپ, كەلۋشىلەر وزدەرى قالاعان كىتاپتاردى وقۋعا الدى. سونىمەن بىرگە «سۇيىكتى قالاما سىيلىق» اتتى شىعارماشىلىق كورمە-جارمەڭكە بولدى. شارا سوڭىندا بارلىق قاتىسۋشىلارعا ەستەلىك سىيلىق بەرىلدى.
