كەشە استانادا ەكى اپتاعا جالعاساتىن «ابايلاڭىز! بالالار!» اتتى جەدەل-پروفيلاكتيكالىق ءىس-شارا باستالدى. اتالعان شارا جىل سايىن وقۋ جىلىنىڭ الدىندا وتكىزىلەدى. مۇنداعى ماقسات – جول-كولىك وقيعالارىنان بالالاردى ساقتاندىرۋ.
شارا بارىسىندا پوليتسەيلەر وقۋشىلارعا جولدا ءجۇرۋ ەرەجەسىن قاتاڭ ساقتاۋدى تۇسىندىرەتىن بولادى. ودان كەيىن ماماندار جول-كولىك وقيعاسىنان زارداپ شەككەن بالالارمەن كەزدەسىپ, پسيحولوگيالىق كومەك كورسەتەدى. سونىمەن قاتار, «بالاعا كومەكتەس» اكتسياسى اياسىندا جارىققا شاعىلىساتىن براسلەتتەردى تاپسىرادى. كوپتەگەن شەتەلدىك زەرتتەۋلەردە دالەلدەنگەندەي, جارىقتى شاعىلىستىراتىن ەلەمەنتتەرى بار كيىم-كەشەكتەردى كيۋ جانە زاتتاردى تاعىپ ءجۇرۋ – قاراڭعىدا جاياۋ جۇرگىنشىلەر جولدان وتكەن كەزدە كورىنىپ تۇراتىن قاراپايىم ءارى ءتيىمدى ادىستەردىڭ ءبىرى.
جەدەل-پروفيلاكتيكالىق شارا بارىسىندا ءتارتىپ ساقشىلارى جالپى ءبىلىم بەرەتىن مەكەمەلەر مەن جاسوسپىرىمدەر ءجيى جينالاتىن الاڭداردى كۇزەتەتىن بولادى. ال, 1قىركۇيەكتە پوليتسەيلەر قالا مەكتەپتەرىنە بارىپ, وقۋشىلارعا مەكتەپ فورماسىن, سومكەلەر سىيلايدى. اتالعان مەكەمەنىڭ مالىمەتىنشە, جىل باسىنان بەرى ەلوردادا كامەلەتكە تولماعان بالالاردىڭ قاتىسۋىمەن بولعان 60 جول-كولىك وقيعاسى تىركەلگەن. كوبىنە مۇنداي جاعداي بالالاردىڭ جولدا الاڭعاسارلىققا سالىنىپ, ۇيالى تەلەفون پايدالانىپ نەمەسە مۋزىكانى بار داۋىسىنا شىعارىپ, كولىكتەردىڭ دىبىسىنا ءمان بەرمەگەنىنەن بولادى ەكەن.
