باسپاسوزدە «رەترو-سۇحبات» اتالاتىن تاجىريبە بار. سول تانىس ىزبەن ءبىز دە رەتروسپەكتيۆا تۇزگەلى وتىرمىز. جاھاننىڭ سانالى بولىگى مويىنداعان تۇلعالاردىڭ جازبالارىنان جارقىن-جارقىن ويلارىن ويىپ الىپ, وقىرمانمەن تىكەلەي تىلدەسكەندەي تارىزگە تۇسىرەمىز. «سىر-سۇحبات» الدە «سىرت-سۇحبات» دەرسىز. تالقىلاۋعا لايىق تاقىرىپقا قاتىستى ءبىزدىڭ تاراپتىڭ دا پايىمىن سىنالاپ كىرگىزىپ, دەڭگەيلى سۇحبات قۇراستىرۋدان دامەلىمىز.تاعىلىمنىڭ اتى – تاعىلىم. ول قانداي پىشىندە ۇسىنىلسا دا, باعالانار.
باستاپقى كەيىپكەرىمىز – سەر الەكس فەرگيۋسون. داڭقتى فۋتبول باپكەرى. «مانچەستەر يۋنايتەد» فاناتتارىنىڭ كوزى ءتىرى ءپىرى. ونىڭ بىلتىر كۇزدە جارىق كورگەن «مەنىڭ اۆتوبيوگرافيام» ەستەلىگى اعىلشىن كوركەم ادەبيەتتىك ەمەس كىتاپ نارىعىنىڭ بۇكىل رەكوردىن جاڭارتتى. ساۋداعا تۇسكەن العاشقى اپتاسىندا-اق 115,5 مىڭ داناسى ساتىلىپ كەتكەن. تومەندە ءبىز سۇيەنگەن ءماتىننىڭ دەنى – اتالعان شىعارماداعى بايانداۋلاردان.
– سەر, ءسىز فۋتبولداعى قىزمەتىڭىزبەن قوشتاساتىن كۇنى باسپاسوزدە جاريالانعان ماقالالار, پىكىرلەر اياقدوپقا قاتىسى جوقتاردىڭ ءوزىن تەرەڭ ويعا باتىرعانداي ەدى. بۇل – ماداق, ماقتان, مويىنداۋ عوي. ال, كەرىسىنشە, ءوزىڭىز وسىنشا سىنعا ۇشىراپ كورگەن كەزىڭىز بار ما؟
– ارينە. مىسالى, 2002 جىلدىڭ قىركۇيەگىندە باسىما قارا بۇلت ءۇيىرىلدى. باپكەر جۇمىسىنىڭ ءبىر ەرەكشەلىگى, سەنىڭ ءىسىڭ العا باسپاي جاتقانداي كورىنسە, جان-جاقتان شابۋىلداۋشى, شۇيلىگۋشى كوبەيە قويادى. ونىڭ ۇستىنە مەن ءوزىمدى ەشقاشان ءباسپاسوز الدىندا مىندەتتى ساناپ كورمەپپىن – ەشقاشان جۋرناليستەرمەن قويىن-قولتىقتاس ارالاسۋعا تىرىسپاپپىن دا, ولارعا ەشقاشان قولتاڭبا بەرمەپپىن دە, سوندىقتان قيىن-قىستاۋ كەزەڭدە تىلشىلەردىڭ دەمەۋىنە سۇيەنۋ تۋرالى ويلانۋعا دا بولمايتىن. شىنى كەرەك, «مەيل ون سانديدەگى» بوب كەستەن باسقا ەشكىمدى تانىمايدى ەكەم. ەندەشە قالام ۇستاعان باۋىرلاردىڭ مەنى قىسىلشاڭ تۇستا سۇيەي قويۋى, مەن ءۇشىن كۇيىنە قويۋى – اقىلعا سىيعىسىز ەدى. ءيا, وزگە مەنەدجەرلەر اراسىندا باسپاسوزبەن جۇمىس ىستەۋ شەبەرلىگىن مەڭگەرگەندەر بار ەكەنىن بىلەم. بالكىم, بۇل قابىلەت ولارعا ۋاقىت ۇزارتۋعا جاردەمدەسەتىن دە شىعار, بىراق ناعىز شىڭىراۋعا قۇلارلىقتاي بولساڭ, كىم-كىم دە ماڭگىلىك قولداي بەرمەسى انىق قوي.
ماۋسىم ىشىندە ويىنىڭدا ءساتسىز كەزەڭ بولا قالسا, ءبىتتى: ءباسپاسوزدىڭ قىسىمى تىقسىرىپ اكەتەدى. ەرىنبەگەننىڭ ءبارى سەن تۋرالى «فەرگي, ۋاقىتىڭ ءوتتى» دەگەندەي بىرىنەن ءبىرى وتكەن تاقىرىپ قويۋدان جارىسىپ جۇرەتىندەي. «ءوز پوستىنان جالىقپاي, وسىنشا ۋاقىت قالايشا وتىرا بەرۋگە بولادى؟» سارىنداس اندەر ۇدەي بەرەدى, ۇدەي بەرەدى. مۇندايدا سەن كۇلىپ قانا قويا سالۋىڭ كەرەك, بىراق ەشقاشان جۇرەكپەن قابىلداماعانىڭ ابزال. ويتكەنى دولىلىق – ادامنان گورى حايۋانعا ءتان سەزىم. راس, وسىناۋ جىلدار ىشىندە ماعان قاتىستى كىسى قىزىعارلىق تا كوپتەگەن ماقالا جاريالاندى, ءسىرا, جۋرناليستەر ءبىزدىڭ ايتۋلى-ايتۋلى جەتىستىكتەرىمىزدى اينالىپ وتۋگە باتپاعان شىعار. دەگەنمەن ءوزىڭدى «دانىشپان» دەپ مويىنداۋشىلار «اقىماق» دەپ تە ايتۋى مۇمكىن ەكەنىنە دايىن بولعانىڭ ارتىق ەتپەيدى.
بىردە مەتت باسبي «سەن نەگە ويىنىڭ ويداعىداي جۇرمەي جاتقان كەزدەردە گازەت وقيسىڭ؟ وندايدا, ماسەلەن, مەن ەشقاشان باسپاسوزگە كوز توقتاتقان دا ەمەسپىن» دەدى. بىراق ول ات ۇستىندە جۇرگەن كەزدە ءباسپاسوز قازىرگىدەي اياق اتتاساڭ, الدىڭنان شىعاتىنداي بەلسەندى ەمەس-تۇعىن.
– دەسەك تە, ءسىزدىڭ فۋتبولمەن قوشتاسۋىڭىزدى ماسس-مەديا اڭىزعا اينالدىرىپ جىبەرگەندەي كورىندى. سوعان قاراعاندا, ءوزىڭىز ويلاعانداي, سۇيكىمسىز كەيىپكەر بولماعانىڭىز عوي؟
– ونىڭىز راس. مەنىڭ كەتۋىم تۋرالى جاڭالىق الەمنىڭ, كەم دەگەندە, 38 گازەتىنىڭ ءبىرىنشى بەتىنەن ورىن الىپتى. ولاردىڭ ىشىندە «نيۋ-يورك تايمس» تا بار. بريتانيالىق باسىلىمدار سول كۇنگى نومەرىن 10-12 بەتتىك ارناۋلى قوسىمشالارمەن شىعاردى.
گازەتتەردىڭ مەن تۋرالى جازبالارى, الگىندە ءوزىڭىز ايتىپ قالعانداي, ماداق سارىندى كەلدى. ءوزىم كەي اقپارات قۇرالدارىمەن ءىلىنىسىپ قالعان كەزدەرىم دە بولعان, بىراق ەشكىمگە ەشقاشان كەك ساقتاعان ەمەسپىن. جۋرناليستەر ۇدايى قانداي دا ءبىر قىسىمدا جۇرەتىنىن بىلەمىن عوي. ولار ينتەرنەتپەن, فەيسبۋكپەن, تۆيتتەرمەن جانە باسقا كوپتەگەن الەۋمەتتىك جەلىلەرمەن باسەكەگە قابىلەتتى بولۋى ءتيىس. ونىڭ ۇستىنە رەداكتور دا توبەدەن ءتونىپ, مازالاپ بارا جاتسا, وڭاي دەيمىسىڭ؟! وينايتىن جۇمىس ەمەس, البەتتە. ابىروي بولعاندا, جۋرناليستەر دە كەكشىل ەمەس ەكەن. ولار مەنىڭ ءباسپاسوز كونفەرەنتسيالارىنداعى سوزدەرىمدى دۇرىس قابىلداعانداي كورىندى. ءتىپتى ماعان سىيلىق جاساعاندارى بولدى. قالايشا قۋانبايسىڭ؟!
– دۇنيەنىڭ ءبارى ءمىن ىزدەگەن سىنمەن تۇتاسىپ كەتسە, بىلىكتى مامان نە ىستەۋ كەرەك؟ پسيحولوگيالىق تۇرعىدان سىنىپ كەتكەن كەزىڭىز ەستە جوق پا؟
– ساتتىلىكتە دە, ساتسىزدىكتە دە ۇستانىمىم انىق: جاتتىقتىرۋشىلىق ۇدەرىستى الاڭسىز اتقارا بەرۋ كەرەك! ءاردايىم بيىك مىندەت ارقالاعان بارشا جۇمىسىمىزدىڭ مۇددەسى, زەر-زەيىنىمىز, تالابىمىزدىڭ ۇدەسى, بۇكىل ءىس-ارەكەتىمىزدىڭ ۇيلەسىمى سەنبىلىك ويىننان كورىنەتىن. ەگەر «يۋنايتەد» ويىنشىسى ويعا العانىنان بىرنەشە رەت ءمۇلت كەتسە, جىندانىپ كەتە جازدايدى. ول ءۇشىن بۇل – جان توزگىسىز كەمشىلىك. الايدا ەڭ-ەڭ ۇزدىكتەردىڭ ءوزى كەي-كەيدە سەنىمسىزدىككە جول بەرۋى مۇمكىن عوي. ءتىپتى كانتونانىڭ ءوزى ءوز كۇشىنە سەنبەي قالاتىن كەزدەرى بولاتىن.
– اعىلشىن پرەمەر-ليگاسىنىڭ تاريحىندا 5-5 ەسەبى العاش رەت ءسىز فۋتبولمەن قوشتاساتىنىڭىزدى مالىمدەيتىن كۇنى تىركەلدى. اياقدوپ اتاۋلىعا مۇلدەم جات ەسەپ – بۇل. دەگەنمەن دە ادەمى ساندار. وسى كۇنگى كوڭىل-كۇي, اسەرىڭىز قالاي بولدى؟ جيىرما جەتى جىل تابان اۋدارماي جۇرگەن, كۇللى الەم جانكۇيەرى اسپەتتەگەن كوماندا جەتەكشىلىگىنەن ءوز ەركىمەن كەتۋ – بىلۋىمىزشە, تاجىريبەدە كەزدەسپەگەن جايت.
– اۆتوبۋستان ءتۇسىپ, «ۆەست برومۆيچ» الاڭىنا جەتكەنگە دەيىنگى ءار سەكۋندتى زەردەمە جاقسىلاپ زەرلەپ قالۋعا تىرىستىم. اسا مازاسىزدانعان جوقپىن, ويتكەنى باپكەرلىكتى دوعاراتىن ۋاقىت جەتكەنىن سەزىندىم, كەتۋىم كەرەكتىگىنە سەندىم. وسىناۋ ويىننان ءبىر كۇن بۇرىن ويىنشىلار ماعان ەستەلىككە بىرنەشە سىيلىق ازىرلەپ جاتقاندارىن ايتقان. سولاردىڭ اراسىنان ەڭ جان تولقىتارلىعى 1941 جىلى جاسالعان «رولەكس» ەدى. ساعاتتىڭ ءتىلى ۇشتەن ءۇش مينۋت كەتكەن تۇسقا تۋرالانىپتى: بۇل 1941 جىلى 31 جەلتوقساندا ءدال مەنىڭ دۇنيە ەسىگىن اشقان ءساتىم ەكەن. سىيلىق يدەياسى «ميۋ»-ءدىڭ باستى ساعاتسۇيەرى ريو فەرديناندتىڭ ويىنا كەلگەن كورىنەدى.
– كومانداڭىزدا ءبىر كەزدەرى سانى جونىنەن جيىرمادان اسا ۇلتتىڭ وكىلدەرىن باپتاعان ەكەنسىز. قاي-قاي تالاپپەن قاراعاندا دا, ناعىز الەمدىك قۇرام. ءتۇرلى ۇلت فۋتبولشىلارىنىڭ كوڭىلىن تابۋعا تالپىنىپ ءجۇرىپ, ءوز حالقىڭىزدىڭ قۇندىلىقتارىنان اجىراپ, ونىڭ رۋحىنان جىراقتاپ قالدىم دەپ ويلامايمىسىز؟
– شوتلاندتاردىڭ رۋحى بيىك. ەگەر ولارعا وتانىنان كەتەتىندەي كۇن تۋسا, تەك ءوسۋ, ورلەۋ ءۇشىن, ايتۋلى جەتىستىككە جەتۋ ءۇشىن عانا كەتەدى. ءبىز ءوزىمىزدىڭ وتكەنىمىزدى وشىرمەۋدەن بۇرىن ەرتەڭگى كۇنى ەڭسەلى بولا تۇسۋىمىزگە كوبىرەك ءمان بەرەمىز. الەمنىڭ ءار نۇكتەسىندەگى شوتلاندتار, اسىرەسە, اقش پەن كاناداداعىلار وسىنداي ۇستانىممەن ءومىر سۇرەدى. مۇنداي ورشىلدىك مەنەن دە تابىلادى. راس, ءبىز دە – ازىلقويمىز. الايدا جۇمىس كەزىندە الدىمىزعا قويىلعان مىندەتكە اسا قاتتى الاڭدايمىز. ءوز باسىم جاۋاپكەرشىلىكتى ەڭ قۇندى قاسيەت سانايمىن. وزگەلەر ماعان «سەنىڭ ويىن بارىسىندا جىميعانىڭدى كورمەپپىز» دەگەندى ءجيى ايتادى. ولارعا بەرەر جاۋابىم ءازىر: «مەن مۇندا كۇلۋ ءۇشىن ەمەس, جەڭۋ ءۇشىن ءجۇرمىن».
– عۇمىرىڭىزدىڭ ەڭ سانالى, پاراساتتى كەزەڭىن بەرگەن سۇيىكتى كاسىبىڭىزبەن قوشتاسۋ تۋرالى شەشىم اياق استىنان كەلە قالماعان بولار؟
– ءيا. زەينەتكەرلىككە شىعۋىما بايلانىستى كوڭىل-كۇيىمدى تۇسىرمەۋگە الدىن-الا بەكىندىم. قولىڭنان كەلەتىنى سول عانا عوي. ايتپەسەڭ جاسى سەكسەنگە اۋعان ادام ءوزىن كۇيرەتە سالۋى وپ-وڭاي. ءتانىڭ دە, جانىڭ دا اۋىرا قالۋعا بەيىم كەز. سوندىقتان مەن كۇندەلىكتى كۇيكى كۇيبەڭگە ءتۇسىپ كەتپەس ءۇشىن, ۇدايى جاڭاشا تالپىنىستار ىزدەپ جۇرەمىن.
زەينەتكەرلىككە كەتەتىنىمدى كلۋب قىزمەتكەرلەرىنە ەستىرتۋ بارىنەن قيىن بولدى… الىپقاشپا قاۋەسەتتەر رەسمي مالىمدەمەدەن ءبىر كۇن بۇرىن شىعا باستادى. ءبىز بۇل جايتتى اسا قۇپيا جاعدايدا ۇستاۋعا تىرىسقانبىز. مەن ءتىپتى تۋعان باۋىرىم مارتينگە دە ءلام-ميم ىم بىلدىرگەن جوقپىن. سەبەبى, نيۋ-يورك قور بيرجاسىنداعى جاعدايمەن دە ساناسۋ كەرەك ەدى.
– ءبارىمىز ادام بولعان سوڭ, ومىردە باپ جانە باق سىندى ساناتتار بولعان سوڭ, شالىس باسپاۋ تىم قيىن. سوعان قاراماستان, ءسىز ەڭ تانىمال كوماندانى شيرەك عاسىردان اسا باپتادىڭىز. مۇنىڭ سىرى نەدە؟ جەڭىلىس جيىلەپ كەتەتىن كەزدەردە قانداي تاسىلدەرگە جۇگىنەتىن ەدىڭىز؟
– جەڭىلىس ەم-داۋا اتاۋلىنىڭ ىشىندە ەڭ كەرەكتىسى سەزىلەتىن كەزدەر بولادى. تەك ونى قابىلداي بىلگەن ءلازىم. بىزدە مىناداي ءتامسىل بار ەدى: «بۇل «مانچەستەر يۋنايتەد» تاريحىنداعى كەزەكتى كۇن عانا». باسقاشا ايتقاندا, قانداي دا ءبىر ساتسىزدىكتەن كەيىن سەن الگىدەن الدەقايدا قۋاتتى قارىمتا سوققى ازىرلەۋگە ءتيىسسىڭ. ماسەلەن, ءبىز ەڭ سوڭعى مينۋتتاردا قولدان شىعارىپ العان جەڭىستەن كەيىن ىلە-شالا 6-7 كەزدەسۋدى قاتارىنان ۇتاتىن كەزىمىز ءجيى ەدى. بۇل كەزدەيسوقتىق ەمەس.
ادەتتە دۇيسەنبى كۇنى جۇمىسقا جيناقتالعان جانكۇيەرلەر وتكەن سەنبى نە جەكسەنبىدەگى ويىننىڭ اسەرىنەن ايىعا الماي جۇرەدى. 2010-نىڭ قاڭتارىندا ءبىر جىگىت ماعان «بيلەتكە تولەگەن 41 فۋنتىمدى قايتارىڭىز. ءسىز سپەكتاكل قويامىز دەپ ۋادە بەردىڭىز. جەكسەنبىدەگى ويىننان مەن سپەكتاكل كورە المادىم. اقشامدى قايتارا الاسىز با؟» دەپ جازىپ جىبەرىپتى. بىلاي دەپ جاۋاپ بەرگەندى ءجون كوردىم: «جارايدى, مەنىڭ كەيىنگى 24 جىلداعى ەڭبەكاقىمنان 41 فۋنتتى ساناپ الارسىز». نەگە بۇلاي دەپ وتىر دەيسىز بە مەنى؟ سەن «رەال» مەن «يۋۆەنتۋستى» ۇتىپ جاتاسىڭ. ال سەنەن ىشكى بىرىنشىلىكتەگى كەزەكتى ءبىر سۇرەڭسىز ويىنعا كەتكەن شىعىنىن وتەۋدى تالاپ ەتەدى. جەر بەتىندە ويىن بارىسىنا قان جۇگىرتۋدە «مانچەستەر يۋنايتەدتىڭ» الدىنا تۇسەتىن قۇرىعاندا جالعىز كوماندا تابىلار ما ەكەن؟!
– جالعىزدىققا قالاي قارايسىز؟ وڭاشا قالۋ تىڭ ويلارعا جەتەلەيتىن شىعار؟
– باپكەردى اركەز ءاي جوق, ءشاي جوق كۇيرەپ قالۋ قاۋپى الاڭداتىپ جۇرەدى. كوپ ۋاقىتىن وزىمەن ءوزى وتكىزەدى. ءوزىن ءوزى ىشتەي جەپ جىبەرۋى دە مۇمكىن. سوندىقتان ول ارا-اراسىندا ءوز ويلارىمەن وڭاشا قالىپ قويماۋ ءۇشىن ءتىپتى نە ىستەۋگە بولسا دا, دايىن تۇرادى.
كەي كەشتەردە مەن كابينەتىمدە ءىشىم پىسىپ, جالعىزدان جالعىز وتىرام دا قويام. قىرسىق قىلعانداي, بولمەمە ەشكىم باس سۇقپايدى, ويتكەنى مەنى بوس ەمەس دەپ ويلايدى. ال مەن بىرەۋ-مىرەۋ ەسىگىمدى قاعىپ كىرىپ كەلسە ەكەن دەپ وتىرعانىمدى كىم ءبىلسىن؟! سوندايدا ماعان رەنە مەلەنستەن نەمەسە ميك فەلان ءبىر كەسە شاي ءىشۋدى ۇسىنسا ەكەن دەيمىن. وكىنىشكە قاراي, ەشكىم كورىنبەيدى. ءسويتىپ, كەيدە وزىڭمەن سۇحباتتاس ىزدەۋگە, وزگەلەردىڭ كەڭىستىگىنە كيمەلەپ كىرۋگە تۋرا كەلەدى. باپكەر, قالاسىن-قالاماسىن, وقشاۋلىقپەن ءجيى-ءجيى بەتتەسەدى. ءسىز ادامدارمەن تىلدەسكىڭىز, سىرلاسقىڭىز كەلەدى, الايدا بارلىعى ءسىزدى ماڭىزدى شارۋالارمەن باسى قاتىپ ءجۇر دەپ ويلاپ, اياعىڭىزدىڭ استىنا وراتىلۋدان قاشادى.
– سىرت كوزگە فۋتبولدان وزگەگە مويىن بۇرماستاي كورىنەسىز…
– فۋتبولدان كوڭىل اۋدارماي تاماشالايتىن جانكۇيەرلەر مەن تۋرالى, بالكىم, «مانچەستەر يۋنايتەدتەن» وزگە كورگەن-باققانى جوق دەپ ويلايتىن شىعار. بىراق ۋاقىت وتكەن سايىن نەگىزگى جۇمىسىم كوبەيە تۇسكەنىمەن, بويىمدى, ويىمدى سەرگەك ۇستاۋعا سەپتەسەر وزگە دە جان قالاۋىنان اجىراعان جوقپىن. كىتاپ سورەلەرىم ادەبيەتتىڭ نەشە تۇرىنەن سىرەسىپ تۇر, ۇيدەگى جەرتولەدەن جاقسى-جاقسى شاراپتىڭ نەشە اتاسىن تابا الاسىز.
– سەر, بىلۋىمىزشە, كىتاپتىڭ دا, شاراپتىڭ دا ءجونى بولەك. بىراق قاي-قايسىسى دا قاجىپ كەتكەن كەزدەرىڭىزدە ويدان ويعا الىپ قاشا بەرمەي مە؟
– مەنىڭ ات جارىستارىنا قىزىعۋشىلىعىمدى بىلەتىن شىعارسىزدار. كەررينگتونداعى كەزەكتى كۇنىم تامامدالعان سوڭ نەمەسە كەزەكتى كەزدەسۋىمىزدەن كەيىن ءوز باسىم وسى اتاعان جان قالاۋىمنىڭ الەمىنە سۇڭگىپ كەتەم. مەنىڭ نەگىزگى كاسىبىمنىڭ سىرتىنداعى اۋەستىكتەرىم «يۋنايتەدتەگى» ءىسىمدى ىلگەرىلەتە تۇسۋگە اجەپتاۋىر سەپتەستى دەپ باتىل ايتا الام.
ساياسي كوزقاراستارىمدا ايتا قالارلىقتاي وزگەرىس بولعان جوق. ادەتتە بەلگىلى ءبىر ەڭبەك وتىلىنە, جيعان داۋلەتىنە قاراي ادامنىڭ ۇستانىمدارى وزگەرىپ جاتاتىنى بار عوي. بىراق مەن دۇنيەتانىمدىق قابىلداۋ امالدارىن, جۇيەلى-جۇيەلى قۇندىلىقتاردى يدەولوگيالىق كوزقاراستاردان الدەقايدا تەرەڭىرەك ءسىڭىرۋدى جاستاي يگەرگەنمىن.
مەن لەيبوريستىك پارتيانىڭ ءۇي كۇشىگى سەكىلدى اسەر قالدىراتىن, ونىڭ جايعان بارلىق داستارحانىنان ءدام تاتا بەرەتىن, سايلاۋ اتاۋلىسىنىڭ باسى-قاسىندا جۇرەتىن ساياسي بەلسەندى بولعان جوقپىن. دەگەنمەن پارلامەنتكە لەيبوريستەر اتىنان سايلانعان دەپۋتاتتاردى ۇدايى قولداپ كەلەمىن. جۇبايىم كەتي «ساياساتقا ءسال بەت بۇرساڭ بولدى, ول سەنىمەن ءسىڭىر جالعاستىرىپ كەتۋگە ءازىر» دەگەندى ءجيى قايتالاۋشى ەدى. ساياساتكەرلەر سەنى وزدەرى ءۇشىن ۋاقىتىن قيا بەرۋدەن تانبايدى دەپ ويلاي باستايدى. سوتسياليستىك ۇستانىمدار مەن لەيبوريستىك پارتياعا سەنىم ءبىلدىرۋ ءبىر باسقا دا, ساياسي امال-قارەكەتتەردىڭ بەلسەندى قاتىسۋشىسى بولۋ مۇلدەم باسقا نارسە عوي. «يۋنايتەدتىڭ» جاتتىقتىرۋشىسى رەتىندە مەندە بۇلاردىڭ ەڭ تومەنگى تالابىن ورىنداۋعا ۋاقىتىم مۇلدەم اۋىسپايتىن.
– ءسىز تۋرالى اقپاراتتارعا نازار سالىپ جۇرسەك, وزىڭىزبەن ەل پرەمەر-مينيسترلەرى ساناساتىنىنا قانىقپىز…
– ءوز مەمۋارلارىندا توني بلەر پرەمەر-مينيستر كەزىندە گوردون براۋندى (ۇلىبريتانيانىڭ بلەردەن كەيىنگى ۇكىمەت باسشىسى) قىزمەتتەن بوساتۋ تۋرالى مەنىمەن كەڭەسكەنىن جازىپتى. مەنىڭ ەسىمدە قالعانىنا كەلسەم, ول ناقتى براۋن جونىندە ەشتەڭە سۇراعان جوق. ونىڭ سۇراعى مەنىڭ قول استىمداعى فۋتبولشى-سۋپەرجۇلدىزدار جانە ولاردى ءوزىم قالاي باعىندىرىپ ۇستايتىنىم تۋرالى قويىلدى. «مەنىڭ جۇمىسىمدا ەڭ باستىسى – باقىلاۋ. ەگەر ولار مەنىڭ بيلىگىمە ارالاسا باستاسا, بىردەن قۇتىلامىن» دەپ جاۋاپ بەردىم. سوندا ول گوردون ەكەۋىنىڭ اراسىندا الدەبىر شيەلەنىس بار ەكەنىن ايتىپ قالدى, بىراق تىكەلەي ەشتەڭە دەپ سۇراعان ەمەس. مەن ولاردىڭ جەكە ىسىنە ارالاسقىم كەلمەگەندىكتەن, الگىندەي جالپىلاما كەڭەس بەرۋمەن شەكتەلدىم.
ايتپاقشى, 1997 جىلعى سايلاۋعا ءبىر اپتا قالعاندا ءبىز تونيمەن مانچەستەردەگى «ميدلەند» وتەلىندە بىرگە تاماقتاندىق. سوندا تونيگە بىلاي دەگەم: «ەگەر ءسىز ۇكىمەتتى ءبىر بولمەگە قاماپ قويا الساڭىز, وندا ءبارى جاقسى بولادى, ەشقانداي ماسەلە تۋىندامايدى. قيىندىق ۇكىمەتتە اركىم ءوز الدىنا ارەكەت جاسايتىندىعىندا, ءوز قالاۋىنا قاراي وداق قۇراتىندىعىندا جانە ءوزى ۇنامدى جۋرناليستەرمەن قارىم-قاتىناس نىعايتاتىندىعىندا». توني مەنى مۇقيات تىڭداپ وتىردى. بيلىككە يە كەز كەلگەن جاننىڭ كەمشىلىگى بار. ەل باسقارۋ دەگەنىڭىز – ۇلان-عايىر جاۋاپكەرشىلىك. ول بەلگىلى ءبىر جاعدايلاردا جالعىزسىراۋعا جەتكىزەدى, مۇنى مەن ءوز باسىمنان جاقسى سەزىنگەم. بيلىگى بار ادامنىڭ توڭىرەگىندە وزگەلەر اتتاپ باسقىسى كەلمەيتىن بوس كەڭىستىك بولادى. توني جاس جىگىت ەكەنىنە قاراماستان, سول زور مىندەتتى ارقالاۋعا تاۋەكەل ەتتى.
مەنىڭ ءبىر ۇققانىم: ومىردە اركەز قيىن جولدى تاڭداۋ كەرەك. ءدال سول ساتتە مۇنىڭىزدى كوپشىلىك قولداي ما, جوق پا, ول – كەيىنگى كەزەكتەگى ماسەلە.
دايىنداعان: ەربولات قامەن
