قازاقستان رەسپۋبليكاسى كونستيتۋتسياسىنىڭ 20 جىلدىعىنا وراي «اتا زاڭ – مەملەكەتتىك-كونفەسسياارالىق كەلىسىمنىڭ كەپىلى» اتتى «دوڭگەلەك ۇستەل» ءماجىلىسى ءوتتى. شارانى استانا قالاسى اكىمدىگىنىڭ ءدىن ماسەلەلەرىن زەرتتەۋ ورتالىعى ۇيىمداستىردى.
كونستيتۋتسيانىڭ ءىى ءبولىمىنىڭ 14-بابىندا «زاڭ مەن سوت الدىندا جۇرتتىڭ ءبارى تەڭ. تەگىنە, الەۋمەتتىك, لاۋازىمدىق جانە مۇلىكتىك جاعدايىنا, جىنىسىنا, ناسىلىنە, ۇلتىنا, تىلىنە, دىنگە كوزقاراسىنا, نانىمىنا, تۇرعىلىقتى جەرىنە بايلانىستى نەمەسە كەز كەلگەن وزگە جاعداياتتار بويىنشا ەشكىمدى ەشقانداي كەمسىتۋگە بولمايدى» دەپ جازىلعان. مىنە, ءدال وسى قاعيدات ەلىمىزدەگى مەملەكەتتىك-كونفەسسياارالىق, ۇلتارالىق كەلىسىمدى ساقتاۋدىڭ نەگىزگى كەپىلى بولىپ ەسەپتەلەدى.
بۇگىندە ەلىمىزدە الەمدىك قوعامداستىق تاراپىنان جوعارى باعاعا يە بولعان ەتنوسارالىق كەلىسىمنىڭ وزىندىك ۇلگىسى قالىپتاستى. حالىقارالىق ارەنادا قازاقستان بەيبىتشىلىك ايماعى, مادەنيەتتەر مەن دىندەردىڭ ديالوگى مەن جاقىنداسۋىنىڭ الاڭى رەتىندە تانىلعان.
جيىن بارىسىندا تولەرانتتىلىق ۇستانىمىن نىعايتۋ مەن كونستيتۋتسيانىڭ ماڭىزدىلىعى جايلى اڭگىمە ءوربىپ, قىزۋ پىكىرتالاسقا ۇلاستى.
– قازىر قوعامدىق كولىكتە, مەكتەپتە, جۇمىس ورىندارىندا, مەيلى, قاي جەردە بولسا دا, كەز كەلگەن ءدىن جانە ۇلت وكىلدەرى ءبىر-بىرىمەن مەيىلىنشە جاقسى قارىم-قاتىناس جاساۋدا. بۇنىڭ بارلىعى – ۇلكەن جاۋاپكەرشىلىكپەن قابىلدانعان اتا زاڭىمىزدىڭ جەمىسى, – دەيدى ءدىني بىرلەستىك وكىلدەرى.
كۇنايىم ساكەن
