جاستار جىلى اياسىندا قر سىبايلاس جەمقورلىققا قارسى ءىس-قيمىل اگەنتتىگىنىڭ باستاماسىمەن ەلوردالىق 86 مەكتەپتىڭ 6, 7, 8-سىنىپ وقۋشىلارىنا «ادالدىق ساعاتى» رەسپۋبليكالىق شاراسى ءوتتى.
ءىس-شاراعا اگەنتتىكتىڭ اۋماقتىق دەپارتامەنت باسشىلارى, «ادالدىق الاڭى» جوبا كەڭسەسىنىڭ مەنەدجەرلەرى, ارنايى مونيتورينگتىك توپتىڭ مۇشەلەرى, ءبىلىم باسقارماسىنىڭ وكىلدەرى, قوعام قايراتكەرلەرى, سونداي-اق Nur Otan پارتياسىنىڭ وكىلدەرى قاتىستى.
اتالمىش شارا اياسىندا ەلوردالىق دەپارتامەنت باسشىسى نۇرلان قىدىرباەۆ وقۋشىلارعا ادال ەڭبەك ەتۋ, رۋحاني-ادامگەرشىلىك قۇندىلىقتار جايلى اڭگىمەلەدى. سونداي-اق «پاراساتتىلىق دەگەنىمىز نە؟» دەگەن سۇراققا ۇلى ابايدىڭ «ءۇش-اق نارسە ادامنىڭ قاسيەتى: ىستىق قايرات, نۇرلى اقىل, جىلى جۇرەك» ناقىل سوزدەرىنەن مىسال كەلتىرىپ, سىبايلاس جەمقورلىققا قارسى ءىس-قيمىلدى كۇشەيتۋدىڭ تۇپكى نەگىزى پاراساتتىلىق يدەولوگياسىندا جاتقانىن ەرەكشە اتاپ ءوتتى.
