EXPO الاڭىندا وزدەرىنىڭ ۇلتتىق كۇنىن اتاپ ءوتىپ جاتقان ەلدەردىڭ كورمە كورەرمەندەرىنە ۇسىنارى ءبىر-بىرىنەن اسىپ تۇسۋدە. ءبىز بۇعان اقش-تىڭ ۇلتتىق كۇنىندە تاعى ءبىر مارتە كوز جەتكىزدىك. ساحناعا جارق ەتىپ شىققان اعىلشىن ستۋدەنتى قازاقتىڭ حالىق ءانى «دۋدارايدى» شىرقاي جونەلگەندە, ونىڭ ونەرىنە ءتانتى بولماعان ادام قالمادى. وسىلايشا مۇحيت اسىپ كەلگەن امەريكالىق مەيماندار قازاق مادەنيەتى مەن ادەبيەتىنە ەرەكشە كوڭىل ءبولۋ ارقىلى وزدەرىنە ەرىكسىز نازار اۋدارتتى.
ۇلتتىق كۇندى اتاپ ءوتۋ مەرەكەسى ولاردىڭ تاۋەلسىزدىك كۇنىمەن تۇسپا-تۇس كەلىپتى. وسىدان 241 جىل بۇرىن تاۋەلسىزدىك دەكلاراتسياسىن قابىلداعان بۇل مەملەكەت ادامنىڭ رۋحى سارقىلماس ەنەرگيانىڭ كوزىمەن بايلانىستى ەكەنىن ءتۇسىندىرىپ بەردى. اقش-تىڭ قازاقستانداعى ەلشىسى جانە پاۆيلوننىڭ كوميسسارى دجوردج كرولل: «ءبىزدىڭ پاۆيلوننىڭ تاقىرىبى – ادام ەنەرگياسى. ياعني ادام – تاۋسىلمايتىن ەنەرگيا. بۇگىن – اقش-تىڭ تاۋەلسىزدىك كۇنى, EXPO-داعى ۇلتتىق كۇنىمىز, سونداي-اق, بيىل امەريكا مەن قازاقستاننىڭ ديپلوماتيالىق قاتىناستارىنا 25 جىل. ءبىز ۇنەمى بىرگە جۇمىس ىستەپ كەلدىك, بىرگە جۇمىس ىستەي بەرەمىز. 2016 جىلى الەم بويىنشا بالامالى ەنەرگيا كوزدەرىنە تارتىلعان ينۆەستيتسيا كولەمى 241 ملرد دوللاردان اسقان. قازىر اقش سەكىلدى الپاۋىت ەل «جاسىل» ەكونوميكادان جىل سايىن 600 ملرد دوللار پايدا كورەدى» دەيدى.
راسىندا دا, پاۆيلونعا كەلۋشىلەر بىرىنشىدەن, ەنەرگياعا تولى كەڭىستىككە تاپ بولادى. ءاربىر قوناققا «شەكسىز ەنەرگيا كوزى دەگەنىمىز نە؟» دەگەن ساۋال قويىلىپ, بولاشاق ەنەرگياسىن ايقىندايتىن فيلم كورسەتىلدى. سودان سوڭ كورمەنىڭ كەلەسى بولىگىندە «ءومىر ەنەرگياسى» دەپ اتالاتىن تاڭعاجايىپ شوۋدى تاماشالادىق. شوۋ ءبىر مەزگىلدە ءۇش ۇلكەن ەكراننان كورسەتىلىپ, كەيىن كوپ قاباتتى ەدەن ارقىلى قۇلاشىن كەڭگە جايدى. بۇعان قوسا, مەرەكەلىك باعدارلامادا امەريكاندىق جانە قازاقستاندىق مۋزىكانتتاردىڭ كونتسەرتتەرى ءوتتى. ەكى ەلدىڭ ءداستۇرلى جانە قازىرگى زامانعى مۋزىكاسىن قايتالانباس ۇيلەسىممەن ۇسىنعان باعدارلامادا تانىمال امەريكالىق ءانشى مايا ازۋتسەنا دا ونەر كورسەتتى.
گۇلجان راحمان
