ادىلبەك جاقسىبەكوۆ: بيزنەستىڭ دامۋى – استانا ەكونوميكاسىنىڭ تابىستى بولۋىنىڭ كەپىلى
كەشە ەلوردادا ۇلتتىق كاسىپكەرلەر پالاتاسى مەن استانا قالاسىنىڭ اكىمدىگى اراسىندا كاسىپكەرلىكتى قولداۋ جانە دامىتۋ ماسەلەلەرى بويىنشا بىرلەسكەن كەلىسىمگە قول قويىلدى.
استانا اكىمى ادىلبەك جاقسىبەكوۆ جانە ۇلتتىق كاسىپكەرلەر پالاتاسى تورالقاسىنىڭ توراعاسى تيمۋر قۇلىباەۆ اتالعان كەلىسىمگە قول قويۋ ارقىلى ەلوردادا كاسىپكەرلىكتى دامىتۋدىڭ ينستيتۋتسيونالدىق نەگىزىن قۇرۋعا باعىتتالعان ءوزارا ىقپالداسۋ ءتارتىبىن بەكىتتى.
كەلىسىم اياسىندا استانا اكىمدىگى مەن ۇلتتىق پالاتا وتاندىق بيزنەستىڭ باسەكەگە قابىلەتتىلىگىن ارتتىرۋ بويىنشا جۇيەلى شارالاردى قابىلداپ, كاسىپكەرلىك سالاسىنىڭ وتە وزەكتى ماسەلەلەرىن بىرلەسە قاراستىرىپ, شەشەتىن بولادى.
– بيزنەستىڭ دامۋى – ەكونوميكانىڭ تابىستى بولۋىنىڭ كەپىلى ەكەندىگى بارشامىزعا بەلگىلى. مەملەكەت باسشىسى ءوزىنىڭ «نۇرلى جول – بولاشاققا باستار جول» اتتى جولداۋىندا ەلىمىزدەگى شاعىن جانە ورتا بيزنەستى دامىتۋ ماسەلەسىنىڭ ماڭىزدىلىعىن ەرەكشە اتاپ ءوتتى. كاسىپكەرلىك – ەل ەكونوميكاسىنىڭ تۇراقتى دامىپ كەلە جاتقان سالالارىنىڭ ءبىرى. حالىقتىڭ الەۋمەتتىك جاعدايىنىڭ ارتۋى, جۇمىسسىزدىق دەڭگەيىنىڭ تومەندەۋى, تيىسىنشە الەۋمەتتىك احۋالدىڭ جاقسارۋى كاسىپكەرلىكتىڭ قارقىندى دامۋىنا تىكەلەي بايلانىستى, – دەدى ەلوردا باسشىسى.
بۇگىنگى تاڭدا استانا حالقىنىڭ سانى 845 مىڭنان استى. سونىڭ ىشىندە ەكونوميكالىق بەلسەندى ازاماتتار سانى 453 مىڭ بولسا, ونىڭ جارتىسىنا جۋىعى شاعىن جانە ورتا بيزنەس سالاسىندا ەڭبەك ەتۋدە (49% نەمەسە 212 مىڭ ادام).
2010-2014 جىلدارعا ارنالعان ۇدەمەلى يندۋستريالىق-يننوۆاتسيالىق دامۋ مەملەكەتتىك باعدارلاماسىن ىسكە اسىرۋ اياسىندا استانادا جالپى سوماسى 445,6 ملرد تەڭگەنى قۇرايتىن 26 جوبا ىسكە قوسىلدى. توعىز مىڭعا جۋىق جاڭا جۇمىس ورىندارى اشىلدى.
– وكىنىشكە قاراي, بۇگىنگى تاڭدا بيزنەس پەن بيلىكتىڭ اراسىندا قول جەتكىزگەن وڭ ناتيجەلەرگە قاراماستان, پروبلەمالار دا جوق ەمەس. سولاردى شەشۋ ءۇشىن ءبىز وسى قۇجاتقا قول قويدىق. بىزگە بيزنەس احۋالدى جاقسارتۋ ماسەلەسىندە ءبىرلەسىپ جۇمىس ىستەۋ قاجەت. استانا اكىمدىگى مەن ۇلتتىق كاسىپكەرلەر پالاتاسى اراسىنداعى بۇگىنگى كەلىسىم كوپتەگەن پروبلەمالاردى شەشۋدە, ارىپتەستىك قارىم-قاتىناستاردى نىعايتۋدا, سونىمەن قاتار, ورتاق جوبالاردى ىسكە اسىرۋدا پارمەندى قۇرالعا اينالادى دەپ سانايمىن, – دەپ اتاپ ءوتتى ادىلبەك جاقسىبەكوۆ.
تاراپتار بۇگىنگى كەلىسىمنىڭ استانادا شاعىن جانە ورتا بيزنەسكە ارنالعان كوپفۋنكتسيونالدى ءوندىرىس كەشەنىن, وڭىرلىك ساۋدا ورتالىعىن قۇرۋعا, جەر ۋچاسكەلەرىن بولۋگە, جالپى بيزنەستى دامىتۋ كارتاسىن ازىرلەۋگە نەگىز بولا الادى دەپ اتاپ ءوتتى.
