جىل سايىن وتەتىن «Astana Piano Passion» حالىقارالىق كلاسسيكالىق مۋزىكا فەستيۆالى جانە جاس پيانيستەر بايقاۋى بيىل ءۇشىنشى مارتە شىمىلدىعىن تۇرمەك. بايراقتى شاراعا وتىنىمدەردى قابىلداۋ باستالىپ كەتتى. بايقاۋدىڭ كوركەمدىك جەتەكشىسى – رەسەيدىڭ حالىق ءارتىسى, بەلگىلى پيانيست دەنيس ماتسۋەۆ. ال ونەر دوداسىنىڭ جۇلدە قورى 60 000 اقش دوللارىنا جەتىپ جىعىلادى.
قاتىسۋشىلاردىڭ وتىنىمدەرى 1 جەلتوقسان – تۇڭعىش پرەزيدەنت كۇنى قابىلدانا باستادى. بايقاۋدىڭ اقتىق سىنى كەلەسى جىلى 24 ءساۋىر مەن 2 مامىر ارالىعىندا ۇيىمداستىرىلماق. شارانىڭ ارنايى سايتىندا بايقاۋعا قاتىسۋدىڭ تالاپتارى مەن شارتتارى تولىقتاي كورسەتىلگەن, ەرەجەلەرى جاريالانعان. مۇندا ءبىر ايتا كەتەرلىگى, شارانىڭ وتكىزىلۋىنە ايتارلىقتاي وزگەرىستەر ەنگىزىلمەگەن, تەك جارتىلاي فينالى مەن فينالدىڭ ءوتۋ كۇنى وزگەرتىلگەن.
پرەزيدەنت نۇرسۇلتان نازارباەۆتىڭ قازاقستان حالقىنا ارناعان ءداستۇرلى جولداۋىندا: «…بارشا قازاقستاندىق مادەنيەتتىڭ دامۋىنا جاڭا سەرپىن بەرۋ كەرەك» دەگەنى ەسىمىزدە. كلاسسيكالىق فەستيۆال ءاربىر قازاقستاندىق ءۇشىن فورتەپيانولىق ونەردىڭ الەمدىك جۇلدىزدارىنىڭ كونتسەرتتەرىن تاماشالاۋعا مۇمكىندىك بەرەدى. اتالعان جاس پيانيستەر بايقاۋى قازاقستاننىڭ دارىندارىن تاربيەلەپ وسىرەدى جانە جاستاردى مۋزىكامەن اينالىسۋعا تارتادى. «Astana Piano Passion» ءىىى حالىقارالىق جاس پيانيستەردىڭ فەستيۆال-بايقاۋىن ۇيىمداستىرۋدىڭ دا ماقساتى وسىعان سايادى. سونىمەن قاتار, ۇلتتىق فورتەپيانولىق مەكتەپتى نىعايتۋعا, شەتەلدىك ورىنداۋشىلارمەن تاجىريبە الماسۋعا سەپتەسەدى.
ءوسىپ كەلە جاتقان جاس ۇرپاقتى رۋحاني تاربيەلەۋ باعىتىندا كلاسسيكالىق فورتەپيانولىق مۋزىكانى ناسيحاتتاۋ دا, قازاقستاننىڭ دارىندى جاس مۋزىكانتتارىنىڭ شىعارماشىلىق جولىنىڭ العاشقى اياققا تۇرۋ كەزەڭىنە قولداۋ كورسەتۋ دە ۇيىمداستىرۋشىلاردىڭ باستى نازارىندا.
قاتىسۋشىلاردىڭ ونەرىن حالىقارالىق قازىلار القاسى قۇرامىنا كىرەتىن, الەمدىك اتاققا يە بەدەلدى پيانيستەر, ايتۋلى حالىقارالىق بايقاۋلاردىڭ مۋزىكالىق پروديۋسەرلەرى باعالايتىن بولادى. ۇمىتكەرلەر ون سەگىز جاستان اسپاۋى ءتيىس. شاراعا قاتىسۋ تەگىن, بۇعان قوسا, ۇيىمداستىرۋ كوميتەتى قاتىسۋشى مەن ونى الىپ ءجۇرۋشى ءبىر ادامنىڭ جولاقىسى مەن استانا قالاسىندا تۇرۋ اقىسىن تولەيدى.
جاس ورىنداۋشىلاردى استانا قالاسىنىڭ اكىمى اتىنان ەكى ارنايى سىيلىق, بايقاۋدىڭ كوركەمدىك جەتەكشىسى اتىنان – «Crescendo», «Annecy Classic» (فرانتسيا, انسي قالاسى), «زۆەزدى نا بايكالە» (يركۋتسك قالاسى, رەسەي) ارنايى سىيلىقتارى, حالىقارالىق فەستيۆالدارعا قاتىسۋ, سۋزدال قالاسىنداعى جازعى لاگەرگە بارۋ جولدامالارى, قازاقستاندىق كومپوزيتور شىعارماسىن ۇزدىك ورىنداۋشىعا ارنالعان ارنايى سىيلىق كۇتىپ تۇر. سونداي-اق, بايقاۋدىڭ لاۋرەاتتارى اتانعان قاتىسۋشىلاردىڭ مۇعالىمدەرىنە دە سىي-سياپات تاعايىندالعان.
ىرىكتەۋ تۋرى ارنايى كوميسسيانىڭ قاتىسۋىمەن 2015 جىلدىڭ 1-20 ناۋرىز ارالىعىندا وتەدى. بايقاۋعا قاتىسۋشىلار ىرىكتەۋ تۋرىنىڭ قورىتىندىسى بويىنشا انىقتالادى. جارتىلاي فينالعا وتىز شاقتى جاس مۋزىكانت جىبەرىلەدى. بايقاۋعا قاتىسۋعا ءوتىنىم بەرۋ, شاراعا قاتىستى باسقا دا جاڭالىقتار www.astana-app.kz سايتىندا جاريالانادى.
اسحات رايقۇل
