ەكى جىلدىڭ ىشىندە ەلىمىز بويىنشا 40-قا جۋىق ادىلەت قىزمەتكەرى قىلمىستىق جاۋاپكەرشىلىككە تارتىلعان. ونىڭ تەڭ جارتىسى – سوت ورىنداۋشىلار. بۇل تۋرالى استانا قالاسىنىڭ ادىلەت دەپارتامەنتىندە وتكەن «استانا – ادالدىق الاڭى» جوباسىنىڭ كوشپەلى كەڭەس وتىرىسىندا بەلگىلى بولدى.
قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى حاكىم قۇشقاليەۆتىڭ ايتۋىنشا, ءدال قازىرگى ۋاقىتتا استانا قالاسى ادىلەت دەپارتامەنتى باسشىسىنىڭ ورىنباسارى رامازانوۆ پەن باسقارما باسشىسى داۋلەتباەۆتىڭ ۇستىنەن قىلمىستىق ءىس قوزعالعان. لاۋازىمدى تۇلعالار «استانا قالالىق جارىق» مەكەمەسىنىڭ اتقارۋ ءىسىن توقتاتۋ ءۇشىن 22 ملن تەڭگە كولەمىندە پارا الدى دەگەن كۇدىكپەن قاماۋعا الىنعان ەدى.
«ۇلتتىق بيۋرو ءىس-قيمىل سيپاتىن وزگەرتۋگە كوشتى. ءبىز جازالاۋ شارالارىن تومەندەتۋىمىز كەرەك. قىلمىستىق ءىس بويىنشا ەرەكشە ءمان-جايلاردى انىقتاۋدا شارالار قولدانامىز, بىراق باس بوستاندىعىنان ايىرۋ ەمەس. بيىل وسىعان بايلانىستى اگەنتتىك توراعاسىنىڭ نۇسقاۋىمەن ءتيىستى نورماتيۆتىك قۇجاتتار جولداندى» دەيدى توراعا ورىنباسارى. وسىلايشا, ۇلتتىق بيۋرو پارا الىپ, قاماۋعا الىنعانداردىڭ جازالاۋ شارالارىن ىزگىلەندىرۋدى قولعا الماقشى. ولاردىڭ پىكىرىنشە, ەگەر ازاماتتىڭ بالالارى, ءۇيى بولسا, ول ەشقايدا قاشىپ كەتپەيدى. ءوزىنىڭ كىناسىن مويىنداپ, قاتەسىن ءتۇسىنىپ جاتسا, ونى اباقتىعا قاماپ, وتباسىنا قيىندىق تۋعىزۋدىڭ قاجەتى جوق. سوندىقتان, قازىرگى ۋاقىتتا جەمقورلىقتىڭ الدىن الۋ ماقساتىندا اۋقىمدى ءىس-شارالار جۇرگىزىلۋدە.
«ءبىز مەملەكەت تاراپىنان ادامگەرشىلىك تانىتساق, ءار ازامات ونى دۇرىس تۇسىنەدى. ەگەر ازامات كىناسىن مويىنداپ تۇرسا, نەگە ءبىز ونى تەرگەۋ اباقتىسىنا قاماپ, ەلىمىزدە تۇرمەدە وتىرعانداردىڭ سانىن ۇلعايتۋىمىز كەرەك؟ بيىلدان باستاپ قازاقستاندا سىبايلاس جەمقورلىق جاسادى دەگەن كۇدىكپەن ۇستالعاندار قامالمايدى. ولارعا قاتىستى نەگىزىنەن قاماۋمەن بايلانىسسىز بۇلتارتپاۋ شارالارى قولدانىلادى» دەي كەلە, اباقتىداعى ءبىر ادامدى اسىراۋعا جىلىنا مەملەكەت تاراپىنان ءبىر ميلليون تەڭگەدەي اقشا جۇمسالاتىنىن العا تارتتى.
– «اتقارۋشىلىق ءىس جۇرگىزۋ ءجانە سوت ورىنداۋشىلار مارتەبەسى تۋرالى» زاڭعا جاڭا ەرەجەلەر ەنگىزىلۋى ءتيىس. مىسالى, قۇجاتتا «سوت ورىنداۋشى قۇقىلى» دەگەن تىركەس ءجيى كەزدەسەدى. بىراق, ولارعا مۇنداي تاڭداۋ بەرىلمەي, ناقتىلاعان ءجون. ەكىنشىدەن, زاڭدا ورىندالۋ مەرزىمى جاعىن قايتا قاراستىرۋ قاجەت. سوت ورىنداۋشىلاردىڭ كوبى سوت شەشىمدەرىن ۋاقىتىلى ورىندامايدى. ونىڭ ءبىر سەبەبى – زاڭنىڭ شيكىلىگىندە. سوت ورىنداۋشىعا ەكى اي مەرزىم بەرىلگەنىمەن, زاڭنىڭ كەلەسى نورماسىندا سوت ورىنداۋشى مەن تالاپ-ارىز بەرگەن ازاماتتىڭ اراسىندا جازباشا شارتقا قول قويىلىپ, سوت ورىنداۋشىنىڭ ءوزى مەرزىمىن بەكىتۋى قاراستىرىلعان. دەمەك, سوت ورىنداۋشى ءبىر ايدا شەشە مە, التى ايدا شەشە مە, اقشاسىن سوزىپ جۇرە بەرۋى مۇمكىن. بۇل ادىلدىككە قايشى كەلەتىن ەرەجە» دەپ تۇيىندەدى حاكىم قۇشقاليەۆ.
ايتا كەتەيىك, وسىدان ءبىراز ۋاقىت بۇرىن باس قالادا مەملەكەتتىك قىزمەت كورسەتۋ ساپاسىن ارتتىرىپ, تۇرمىستىق سىبايلاس جەمقورلىقتى جويۋدى كوزدەيتىن «استانا – ادالدىق الاڭى» جوباسى ىسكە قوسىلعان بولاتىن.
گۇلميرا ايماعانبەت
