نۇر-سۇلتان قالاسىنداعى اتاتۇرىك ساياباعىندا ەل تاۋەلسىزدىگىنىڭ 30 جىلدىعىنا وراي ەRG كومپانياسىنىڭ ەلوردالىق كەڭسەلەرى, نۇر-سۇلتان قالاسى اكىمدىگىنىڭ, قوعامدىق ۇيىمداردىڭ وكىلدەرى 350 كوشەت وتىرعىزدى. «تۇراقتى دامۋ» جەر قورىنىڭ جىل سايىن ۇيىمداستىرىپ كەلە جاتقان يگى باستاماسى اياسىندا «ۇلتتىق اعاش ەگۋ كۇنى» ەكولوگيالىق شاراسىنا Eurasian Resources Group كومپانياسى قولداۋ كورسەتتى.
يگى باستاما اياسىندا ERG ماماندارى مەن ەكوۆولونتەرلەر الەمنىڭ 15 ەلىندە تاۋ-كەن بايىتۋمەن اينالىساتىن, قازاقستاننىڭ قازبا بايلىقتارىنىڭ ۇشتەن ءبىر بولىگىن ءوندىرىپ وتىرعان الپاۋىت كومپانيا جەر جۇزىندەگى تابيعي تەپە-تەڭدىكتى ساقتاۋعا كوڭىل ءبولىپ وتىر. قالدىق كولەمىن ازايتىپ, ءوندىرىس زيانىن شەكتەگەن ERG پرەزيدەنت قاسىم-جومارت توقاەۆتىڭ 2025 جىلعا دەيىن 2 ملرد اعاش وتىرعىزۋ باستاماسىنا ءۇن قوسىپ, وسى ۋاقىت ارالىعىندا 420 مىڭ ءتۇپ كوشەت ءوسىرۋدى ءوز موينىنا العان. وسى ماقساتقا كومپانيا 1,5 ملرد تەڭگە قارجى جۇمساماق.
پرەزيدەنت باستاماسى اياسىندا «جاسىل ەل» وتريادتارى 1 ملن كوشەت وتىرعىزۋدى جوسپارلاعان. اتاتۇرىك ساياباعىنداعى شاراعا باستاماشى بولعان «تۇراقتى دامۋ» جەر قورىنىڭ ماماندارى كۇز اعاش وتىرعىزۋعا ەڭ قولايلى مەزگىل ەكەنىن ايتادى.
«ءبىزدىڭ جاستار كوشەتتىڭ قاي ءتۇرىن, قاشان جانە قالاي ەگۋ كەرەك, ءتۇرلى اعاشتى باپتاپ كۇتۋدىڭ ادىستەرى بويىنشا ۇلكەن تاجىريبە جيناقتاعان. ايتالىق, ساياباققا جاڭا وتىرعىزىلعان مىنا بادام كوشەتتەرى رەسەيدىڭ نوۆوسيبيرسك قالاسىندا ءوسىرىلىپ, سولتۇستىكتىڭ سۋىق بەلدەۋىنە جەرسىندىرىلگەن. جاس كوشەتتەردىڭ ويداعىداي بوي تۇزەپ ءوسىپ-ءونۋىن Google كومپانياسىنىڭ ارنايى باعدارلاماسى ارقىلى باقىلايمىز» دەيدى يگى شارانىڭ باستاماشىسى الان بەسەن.
اۋعانبەك ماناربەكۇلى
