ايتۋلى اۋديتورياداعى كەزدەسۋ كەشى
ل.گۋميلەۆ اتىنداعى ەۇۋ تۇڭعىش پرەزيدەنت اۋديتورياسىندا ءانشى, ۇستاز, قر ەڭبەك سىڭىرگەن قايراتكەرى كلارا تولەنباەۆانىڭ «جىبەك سەزىم» اتتى شىعارماشىلىق كەشى ءوتتى.
جاستاردى ۇلتتىق بوياۋى قانىق اندەر ارقىلى ونەردى قۇرمەتتەپ, رۋحاني كەمەلدەنۋگە جەتەلەۋدى كوزدەگەن كەشتە كلارا تولەنباەۆامەن قاتار ونىڭ ايدانا يمانبەرديەۆا, اينۇر ومىربەكقىزى, جانارگۇل راحاتقىزى, راحات بەگاسىلوۆ,
سالتانات قيساتوۆا سىندى شاكىرتتەرى دە ونەر كورسەتىپ, جينالعان جۇرتشىلىقتىڭ قوشەمەتىنە بولەندى. ال قىزى اقكەربەز مەدەتقىزى جەتىگەن اسپابىمەن حالىقتىڭ «ءبىر بالا» ءانىن اۋەلەتە شىرقاعاندا بالانىڭ جاندى تەربەيتىن نازىك داۋىسىنا تامسانعان تىڭدارماندار سىلتىدەي تۇنا قالعانىن ايتپاي كەتۋگە بولمايدى.
كەشتىڭ ءبىرىنشى بولىمىندە ءداستۇرلى اندەر شىرقالسا, ەكىنشى جارتىسىندا ەسترادالىق باعىتتاعى «ناعاشىما», «قوس جۇرەك», «ارمان-اي» اندەرىنە كەزەك بەرىلدى. سونداي-اق, كلارا اندەرىنىڭ جاس تىڭدارمانى رەتىندە اتالمىش ۋنيۆەرسيتەتتىڭ 4-كۋرس ستۋدەنتى ءمادينا قايراتقىزى انشىمەن دۋەت قۇرىپ, «جىبەك سەزىم» ءانىن ورىندادى.
الەۋمەتتىك جانە ازاماتتىق دامۋ دەپارتامەنتىنىڭ قولداۋىمەن كولىك-ەنەرگەتيكا فاكۋلتەتىنىڭ دەكانى تىنىس بولەكبايۇلى ۇيىمداستىرعان وسى كەزدەسۋدە جاستار تاراپىنان انشىگە ءومىرى مەن ونەر جولى جايىنداعى ءتۇرلى ساۋالدار قويىلىپ, ادەمى اڭگىمە ءوربىدى. سۇراعى ەڭ قىزىقتى ءارى سالماقتى دەپ تانىلعان ەكى ستۋدەنتكە كەش يەسى ءان جيناعىن تارتۋ ەتتى.
ءمادينا جاقىپ