ءا. جاقسىبەكوۆ, استانا قالاسىنىڭ اكىمى: ۇوس ارداگەرلەرىنىڭ الەۋمەتتىك جاعدايىن جاقسارتۋعا بايلانىستى بارلىق شارالار قابىلدانادى
كەشە استانا اكىمى ادىلبەك جاقسىبەكوۆ قالالىق ارداگەرلەر كەڭەسىنىڭ اكتيۆىمەن كەزدەستى.
بۇگىندە ەلوردادا 235 ۇلى وتان سوعىسى ارداگەرى تۇرادى. سونىمەن بىرگە, قالادا مايدانگەرلەرگە تەڭەستىرىلگەن 1992 ادام مەن 4 مىڭداي تىل ەڭبەككەرى بار.
قازىرگى كۇنى وتان ءۇشىن وت كەشكەن قارت ساربازداردىڭ بارلىعى باسپانامەن قامتىلعان, كوممۋنالدىق تولەمدەر مەن وزگە دە قىزمەتتەردە جەڭىلدىكتەردى پايدالانادى. ولارعا مەديتسينالىق كومەك, تەگىن ءدارى-دارمەك, ءۇي-جايىن جوندەپ بەرۋ سياقتى ءتۇرلى الەۋمەتتىك قولداۋلار دا قاراستىرىلعان.
وسى جونىندە ايتقان قالالىق ارداگەرلەر كەڭەسىنىڭ ءتوراعاسى امانگەلدى سىزدىقوۆ قاريالاردىڭ الەۋمەتتىك ماسەلەلەرىنە قاتىستى ماسەلەلەردىڭ شەشىمى اكىمدىك تاراپىنان ەشقاشان كەشىكتىرىلمەيتىنىن ايتىپ, العىسىن جەتكىزدى.
«وزدەرىڭىزبەن وتكەن كەزدەسۋ ءبىز ءۇشىن اسا ماڭىزدى. ءبىز ءوز جۇمىسىمى
زدا ارداگەرلەر ۇيىمىنا ارقا سۇيەيمىز, بارشا تۇرعىنداردى مازالايتىن وزەكتى ماسەلەلەردى شەشۋدە سىزدەر – سەنىمدى ءارى بەلسەندى سەرىكتەسسىزدەر» دەگەن قالا اكىمى ادىلبەك جاقسىبەكوۆ شاعىن وبلىس ورتالىعىنان كوركەم شاھارعا اينالعان استانانى ۋاقىت تالابىنا ساي وركەندەتۋ جولىندا ءالى دە كوپ ەڭبەك ەتۋ كەرەكتىگىن ايتتى.
«قازىر «ەكسپو-2017» حالىقارالىق كورمەسىنە قىزۋ دايىندىق ۇستىندەمىز. قۇرىلىس الاڭدارىندا دامىلسىز جۇمىس ءجۇرىپ جاتىر. ودان بولەك, قالانىڭ بارلىق ينفراقۇرىلىمدارىن جاڭا كەزەڭگە ساي قايتا جاڭعىرتىپ, قىزمەت كورسەتۋ, كوممۋنالدىق شارۋاشىلىق سياقتى تىرشىلىك كوزىنىڭ تىرەگى سانالاتىن ماڭىزدى سالالاردىڭ جۇمىسىن جاقسارتۋىمىز كەرەك. كەلەسى جىلى قازاقستان حالقى اسسامبلەياسى مەن كونستيتۋتسيامىزدىڭ 20 جىلدىعىن, ۇلى جەڭىستىڭ 70 جىلدىعىن ەل بولىپ اتاپ وتەمىز. ەلوردادا وتەتىن كەز كەلگەن شارا قالا يميدجىنە ىقپال ەتەتىندىكتەن, ولاردى جوعارى دەڭگەيدە ۇيىمداستىرۋ شارت. بۇل – ارقايسىمىز ءۇشىن شىڭدالۋ سىناعى» دەدى.
كەزدەسۋگە كەلگەن اقساقالدار اعىنان جارىلىپ, اعا بۋىن وكىلدەرى يگى باستامالاردىڭ قولداۋشىسى, حالقىمىزدىڭ تىلەكشىسى ەكەندەرىن تانىتتى. سونىمەن قاتار, وسى ءوڭىردىڭ دامۋىنا ەڭبەگىن سىڭىرگەن ازاماتتاردىڭ ەسىمدەرى ارداقتالىپ, ولاردىڭ قالا تاريحىندا لايىقتى ورىن الۋىنا قاتىستى شارالاردى ۇيىمداستىرۋ تۋرالى ۇسىنىس ورتاعا تاستالدى.
كەزدەسۋ سوڭىندا توقساننىڭ تورىنە شىققان مايدانگەر قاريا قادان بەكەنوۆ ەل اعالارىنا باتاسىن بەردى.
ايگۇل ۋايسوۆا
