نۇر-سۇلتان قالاسىنىڭ اكىمى التاي كولگىنوۆ ۇلى وتان سوعىسىنىڭ ارداگەرلەرىن حالىقارالىق قارتتار كۇنىمەن قۇتتىقتادى.
ۇلى وتان سوعىسىنىڭ ارداگەرلەرى ولەگ ليننيك پەن رايسا سافونيچەۆانى قارتتار كۇنىمەن قۇتتىقتاعان قالا اكىمى ولارعا ۇزاق عۇمىر, مىقتى دەنساۋلىق تىلەدى. «قارياسى بار ەلدىڭ قازىناسى بار». سىزدەردىڭ ەڭبەكتەرىڭىزدى, ەرلىكتەرىڭىزدى جوعارى باعالايمىز, ۇلى وتان سوعىسى كەزىندە ەلىمىزدى قورعادىڭىزدار. سىزدەرگە العىسىمىز شەكسىز. عۇمىر جاستارىڭىز ۇزاق بولىپ, دەندەرىڭىز ساۋ بولسىن. كەلەسى جىلى ۇلى جەڭىستىڭ مەرەيتويىن تويلايمىز. مۇنىڭ ءبارى – سىزدەردىڭ ەڭبەكتەرىڭىز» دەدى ارداگەرلەردى قۇتتىقتاپ كەلگەن ا.كولگىنوۆ.
قازىرگى تاڭدا و.ليننيك پەن ر.سافونيچەۆاعا «شاراپات» الەۋمەتتىك قىزمەت كورسەتۋ ورتالىعى قىزمەت كورسەتۋدە. نۇر-سۇلتان قالاسىنىڭ اكىمدىگى مەرەكەگە وراي ورتالىققا كىر جۋ ماشينالارىن سىيعا تارتتى.
سونداي-اق التاي كولگىنوۆ سوتسياليستىك ەڭبەك ەرى ساعيلا ەسەنجولوۆانى مەرەكەمەن قۇتتىقتادى.
قالا باسشىسى ەڭبەگىمەن ەلىنىڭ قۇرمەتىنە بولەنگەن قادىرلى اپايمەن ەمەن-جارقىن اڭگىمەلەستى.
