استانا اكىمى ادىلبەك جاقسىبەكوۆ ەلورداعا بولاشاق «ەكسپو-2017» كورمەسىنىڭ نىساندارىمەن تانىسۋعا جانە استانا كۇنىنە ارنالعان مەرەكەلىك شارالارعا قاتىسۋعا كەلگەن ميلان قالاسىنىڭ مەرى دجۋليانو
پيزاپيامەن كەزدەستى دەپ حابارلايدى قالا اكىمىنىڭ ءباسپاسوز قىزمەتى.
– بۇل كۇندەرى استانانىڭ ون جەتى جىلدىعىن اتاپ وتۋدەمىز. ول رەسپۋبليكامىزدىڭ بىرلىگىنىڭ, تاۋەلسىزدىگىنىڭ جانە جاسامپاز ەنەرگيانىڭ سيمۆولىنا اينالدى, – دەدى ەلوردا اكىمى. سونداي-اق, ول قوناققا استانانىڭ قۇرىلىسى, ونىڭ دامۋى مەن جەتىستىكتەرى تۋرالى ايتىپ بەردى.
– وسى كۇندەرى استاناعا قازاقستاننىڭ بارلىق ايماقتارىنان جانە شەتەلدەردەن كوپتەگەن مەيماندار كەلۋدە. سولاردىڭ قاتارىندا ءبىز يتاليادان كەلگەن دوستارىمىزدىڭ كوبىرەك بولعانىن قالايمىز جانە ولاردى قۋانا قارسى الامىز – دەي كەلىپ, ءا.جاقسىبەكوۆ استانا مەن ميلان اراسىنداعى ەكى جاقتى ىنتىماقتاستىقتى دامىتۋعا, ءبىرىنشى كەزەكتە «ەكسپو ميلان-2015» جانە «ەكسپو استانا-2017» كورمەلەرىن وتكىزۋگە دايىندىق كەزىندە تاجىريبە الماسۋدىڭ ماڭىزدىلىعىنا توقتالدى.
– ءبىز بۇدان كەيىن دە ميلاندا ءوتىپ جاتقان «ەكسپو-2015» كورمەسىنە دايىندىق پەن ونى ۇيىمداستىرۋ ادىستەرىن بەلسەندى زەرتتەۋدى جوسپارلاپ وتىرمىز. وسى ماقساتتا ۇيىمداستىرۋ جۇمىستارىنىڭ ءارتۇرلى اسپەكتىلەرى بويىنشا بىرنەشە جۇمىس دەلەگاتسيالارىن جىبەرمەكپىز. ءوز كەزەگىندە «ەكسپو-2017» كورمەسىنە دەيىن دە, ودان كەيىن دە بارلىق يتاليالىقتاردى قازاقستانعا, استاناعا شاقىرامىز, – دەدى اكىم.
ءا.جاقسىبەكوۆتىڭ ايتۋىنشا, استانا ميلاننىڭ دامۋىمەن جانە قالانىڭ تۇراقتى جوسپارلانۋىمەن, يننوۆاتسيالاردى ەنگىزۋ جانە «smart» قالالار تۇجىرىمداماسىن جۇزەگە اسىرۋ سالالارىنداعى تاجىريبەسىمەن تانىسۋعا مۇددەلى. سوندىقتان, بىرىگىپ جۇمىس ىستەۋگە قولايلى جاعداي جاساۋ ءۇشىن استانا ءوزارا تۇسىنىستىك مەموراندۋمىن قابىلداۋ تۋرالى يتاليانىڭ باستاماسىن قولدايدى.
– بۇل قۇجات ۇزاق مەرزىمدى جەمىستى ىنتىماقتاستىعىمىزدىڭ ىرگەتاسىن نىعايتا تۇسەدى, – دەپ اتاپ ءوتتى ءا.جاقسىبەكوۆ.
ميلان قالاسىنىڭ مەرى دجۋليانو پيزاپيا ەكى ەلدىڭ بايلانىسىن ودان ءارى دامىتۋ ماقساتىندا استانا مەن ميلان اراسىندا ءتىكەلەي اۋە بايلانىسىن ورناتۋدى ۇسىندى.
مەر پيزاپيا ەلوردا اكىمىن كەلەسى جىلدىڭ 15-16 قازانىندا وتەتىن ازىق-تۇلىك سالاسىنداعى قالالىق ساياسات پاكتىسىنىڭ («Urban Food Policy Pact») تانىستىرىلىمىنا ارنالعان مەرلەر سامميتىنە قاتىسۋعا شاقىردى.
ميلان مەرى استاناعا ساپارى اياسىندا «ەكسپو-2017» كورمەسى الاڭىنىڭ جوباسىمەن تانىستى. قۇرمەتتى قوناق كورمە وتەتىن باستى كەشەن مەن ماڭىزدى نىسانداردىڭ قۇرىلىسىن ارالاپ كوردى.
