استانا قالاسىنىڭ اكىمى ادىلبەك جاقسىبەكوۆ كەشەگى وتكەن اپپارات جينالىسىن «استانا» فۋتبول كومانداسىنىڭ قازاقستاندىق پرەمەر-ليگاسىندا چەمپيوندىق اتاقتى ەكىنشى مارتە قاتارىنان جەڭىپ الۋىنا وراي قۇتتىقتاۋدان باستادى.
– «استانا» كومانداسى وسىمەن ەكىنشى مارتە قاتارىنان چەمپيون بولىپ وتىر. كلۋبتىڭ ءساتتى ونەر كورسەتۋى جاستار اراسىندا ۇلكەن قىزىعۋشىلىققا يە بولا باستادى. بۇل جەتىستىكتى يدەولوگيالىق جۇمىستار مەن ءپاتريوتيزمدى تاربيەلەۋدە پايدالانۋىمىز قاجەت» دەپ اتاپ ءوتتى استانا قالاسىنىڭ اكىمى.
اكىمنىڭ ايتۋىنشا, فۋتبول مەن حوككەي ويىندارى, باسقا دا سپورتتىق جارىستار قوعامدىق ماڭىزدى شارالار بولىپ تابىلادى. بۇلاردىڭ ءبارى جاستاردىڭ اراسىندا دۇرىس قۇندىلىقتاردىڭ قالىپتاسۋىنا اسەر ەتەدى. سونىمەن قاتار بۇقارالىق سپورتتى دامىتۋ, اشىق الاڭداردى تولىق پايدالانۋ استانالىقتار ءۇشىن قولجەتىمدى بولۋى ءتيىس.
