اۆستريا پاۆيلونىندا قازاقستاندىق تانىمال الپينيست ماقسۇت جۇماەۆ «قۋات ماشيناسىن» باعىندىردى. الەمدەگى بارلىق «سەگىزمىڭدىق» شىڭداردى وتتەگى قۇرالىنسىز باعىندىرعان ول 2013 جىلى اۆستريانىڭ ەڭ بيىك نۇكتەسى – گروسگلوكنەر شىڭىنا شىققان بولاتىن.
«ماقسۇت جۇماەۆ قاتىسقان بۇل شارا ەكى ەل اراسىنداعى ىنتىماقتاستىقتى نىعايتۋدىڭ سيمۆولى دەپ بىلەمىن. استانادا ءوتىپ جاتقان ەكسپو كورمەسى – جاڭارتىلعان ەنەرگيانى ءتيىمدى پايدالانۋ, ۇزدىك «جاسىل» تەحنولوگيالار مەن ەكولوگيالىق تۇراقتىلىقتى قامتيتىن جىلدىڭ ەڭ ەلەۋلى وقيعاسى. ءبىزدىڭ ەل – «جاسىل» ەنەرگەتيكا سالاسى بويىنشا ەۋروپاداعى مويىندالعان كوشباسشى. ءبىزدىڭ پاۆيلونعا كەلگەن ءاربىر كەلۋشى بولاشاق ەنەرگيانى سەزىنە الادى» دەيدى اۆستريا ەلشىلىگىنىڭ ساۋدا جونىندەگى كەڭەسشىسى ميحاەل ميۋللەر.
جالپى, اۆستريادا تاۋدى ەڭكەيگەن كارىدەن ەڭبەكتەگەن بالاعا دەيىن جاقسى كورەدى دەيدى پاۆيلون جەتەكشىلەرى. تاۋ دەمالىسىن جاقسى كورەتىندەردىڭ «Alpenverien» دەپ اتالاتىن قاۋىمداستىعىنا بيىل 150 جىل تولىپتى. قازاقستاندىق الپينيست ماقسۇت جۇماەۆ وسى قاۋىمداستىقپەن ىنتىماقتاستىق تۋرالى مەموراندۋمعا قول قويىپ, ەلىمىزدە دە وسىعان ۇقساس كلۋب قۇرعان.
«مەن اۆستريانى «جاسىل» تەحنولوگيا سالاسىنداعى جەتكەن جەتىستىكتەرى ءۇشىن قۇرمەتتەيمىن. ەلىمىزدىڭ الپينكلۋبىنىڭ نەگىزگى ماقساتى – تابيعاتتىڭ تەپە-تەڭدىگىن بۇزباۋ جانە ادامداردى تابيعاتپەن ءتىل تابىسۋعا ۇيرەتۋ» دەيدى الپينيست ماقسۇت جۇماەۆ.
ايتا كەتەيىك, اۆستريا پاۆيلونى – ەڭ كرەاتيۆتى پاۆيلون. ولار «بولاشاقتىڭ ەنەرگياسى – ءبىز جانە ءسىز!» ۇرانىن ۇستانعان. كەلۋشىلەرگە قىزىقتى بولۋ ءۇشىن ناعىز ويىن الاڭىن ۇيىمداستىرا بىلگەن. ماسەلەن, اۆستريا تۋرالى بەينەنى كورۋ ءۇشىن ەلەكتر قۋاتىن جەتكىلىكتى تۇردە جيناۋ كەرەك. ول ءۇشىن پاۆيلوندى تاماشالاۋعا كەلگەن قوناقتار بىرنەشە ۆەلوسيپەدتى قاتار تەپكەنى دۇرىس.
«پاۆيلون – الىپ كۇش ماشيناسى. وندا ءارتۇرلى قۇرىلعىلار مەن تەتىكتەردىڭ كومەگىمەن كەلۋشىلەر ويىن تۇرىندە ەنەرگيانى سەزىنە الادى. كۇش ماشيناسى ءار قوناقتىڭ قارىم-قابىلەتى مەن مۇمكىندىگىن اشادى. ءتىپتى, ەنەرگيانى ۇقىپتى پايدالانۋعا ۇيرەتەدى. اۆستريانىڭ شىعارماشىلىق الەۋەتى مەن جاڭا تەحنولوگيالارى بارلىق كەلۋشىلەرگە كەرەمەت كوڭىل كۇي سىيلايدى» دەيدى ۇيىمداستىرۋشىلار.
گۇلميرا ايماعانبەت
