بيىلعى جىلدىڭ 2 شىلدەسىنەن باستاپ استانالىقتار الاكولگە پويىزبەن بارا الادى. استانا-ءۇرىمشى باعىتىنا قاتىنايتىن پويىزعا «استانا-دوستىق» باعىتىنداعى قوسىمشا ۆاگوندار تىركەلەدى. وسىلايشا الاكولگە دەمالعىسى كەلەتىندەرگە جاڭا مۇمكىندىك تۋىپ وتىر.
بۇل باعىتتاعى ۆاگوندار اپتاسىنا ءبىر رەت قاتىنايدى ەكەن. استانادان سەنبى كۇندەرى جۇرسە, دوستىق باعىتىنان كەرى ورالاتىندار سەيسەنبى كۇنى پويىزعا وتىرا الادى. ورايى كەلگەندە ايتا كەتەيىك, الاكولگە قاتىنايتىن ۆاگوندار تەك جاز ۋاقىتىندا عانا تىركەلەدى. جولاۋشىلار تاسىمالىن «جولاۋشىلار تاسىمالى» اق-ى اتقارادى. ينۆەستيتسيا جانە دامۋ مينيسترلىگى ءباسپاسوز قىزمەتى اتاپ وتكەندەي, مۇنداي جاڭا وزگەرىس ىشكى ءتۋريزمدى دامىتۋعا ىقپالىن تيگىزىپ قانا قويماي, الاكول كۋرورتتىق اۋماعىنا حالىقتىڭ قاتىناۋىن وڭايلاتا تۇسەدى.
ال كەلەسى جىلى الاكولگە بارۋ بۇدان دا جەڭىلدەيتىن بولادى. كولگە تاياۋ ءۇشارال قالاسىنداعى اسكەري اۋەجاي قايتادان جابدىقتاۋدان وتكىزىلمەك. سول كەزدە الاكولگە تۋريستەردى جەتكىزۋ ءارى قولايلى ءارى جەدەل جۇزەگە اسىرىلادى.
الاكول – ەلىمىزدەگى ءتۋريزمنىڭ ەڭ باسىم باعىتتارىنىڭ ءبىرى. سوندىقتان ونىڭ جاعالاۋىندا جاڭا قىزمەت كورسەتۋ ورىندارى, قوناق ۇيلەر, دەمالىس اۋماعى جانە باسقا نىساندار سالىنا باستاعان.
مەڭدوللا نۇرىمۇلى
