ەلباسىنىڭ «رۋحاني جاڭعىرۋ» باعدارلاماسى اياسىندا قالالىق تىلدەردى دامىتۋ باسقارماسىنىڭ ۇيىتقى بولۋىمەن «الاش مۇراتى جانە رۋحاني جاڭعىرۋ: ساباقتاستىق پەن جالعاستىق» اتتى دوڭگەلەك ۇستەل ءماجىلىسى ءوتتى.
باسقوسۋعا الاشتانۋشى عالىمدار, وقۋ ورىندارىنىڭ باسشىلارى جانە بەلسەندى جاستار قاتىستى. العاش بولىپ «الاش» مادەنيەت جانە رۋحاني دامۋ ينستيتۋتىنىڭ ديرەكتورى, عالىم سۇلتانحان اققۇلى «رۋحاني جاڭعىرۋ» باعدارلاماسى 20-عاسىرداعى الاش يدەياسىمەن ساباقتاس ەكەندىگىنە توقتالىپ, سول كەزدە ساياسي ساحناعا كوتەرىلگەن ۇلت قايراتكەرلەرىنىڭ تۋعان حالقى ءۇشىن جاساعان ەڭبەكتەرى جايىندا ءسوز قوزعادى. ال ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ءادىستەمەلىك ورتالىعىنىڭ ديرەكتورى ەربول تىلەشوۆ «جاڭا ءالىپبي – جاڭعىرۋ نەگىزى» دەگەن تاقىرىپتا اڭگىمەلەدى. «كەشە عانا ەلباسى ءالىپبيدىڭ جاڭا نۇسقاسىن بەكىتتى. نەگىزىندە, قازاق ءتىلى ءالىپبيىن لاتىن گرافيكاسىنا كوشىرۋ جونىندەگى ارنايى جۇمىس توبى قۇرىلعان. ماسەلەن, ورفوگرافيالىق ەرەجەلەر توبىن قر مادەنيەت جانە سپورت ءمينيسترى ارىستانبەك مۇحامەديۇلى, ادىستەمەلىك توپتى قر ءبىلىم جانە عىلىم ءمينيسترى ەرلان ساعاديەۆ, ساراپتامالىق-تەحنيكالىق توبىن قر اقپارات جانە كوممۋنيكاتسيالار ءمينيسترى داۋرەن اباەۆ باسقارادى. وسى باعىتتا جۇمىستار باستالىپ كەتتى. «ءبىز پرەزيدەنت اكىمشىلىگىنە ءالىپبي تۋرالى حالىقتان تۇسكەن مىڭ جارىم پىكىردى ساراپتاپ بەردىك. ەلدىڭ پىكىرى ەسكەرىلدى. كۇزگە تامان وسى ماسەلەگە قاتىستى ۇلكەن فورۋم بولادى. باستىسى, جاڭا ءالىپبي جازۋ رەفورماسىنا اينالۋ قاجەت» دەدى عالىم. ودان كەيىن قوعام قايراتكەرى, پروفەسسور سايلاۋ باتىرشاۇلى مەملەكەتتىك ءتىل تۋرالى ءوز تولعانىسىن جەتكىزدى. بەلگىلى عالىم شەرۋباي قۇرمانبايۇلى الاش قوزعالىسى مەن ۇلتتىق ادەبي ءتىلدى بايلانىستىرىپ, پاراساتتى ءسوز ءوربىتتى.
تۇيىندەي كەلگەندە, باسقوسۋدا وتكەن عاسىر باسىندا ۇلتىمىزدىڭ ۇلى تۇلعالارى كوتەرگەن الاش مۇراتىنىڭ بۇگىنگى كۇنمەن دە جالعاسىپ جاتقاندىعى جان-جاقتى تالقىلاندى.
ازامات ەسەنجول
