كوشەلەر مەن قوعامدىق ورىندارداعى قۇقىق بۇزۋشىلىق پەن قىلمىستاردىڭ الدىن الۋ جانە جۇرتتى ساقتاندىرۋ ماقساتىندا 23-29 تامىز ارالىعىندا «قۇقىقتىق ءتارتىپ» اتتى جەدەل ىزدەۋ, قىلمىستىڭ الدىن الۋ ءىس-شارالارى وتكىزىلىپ جاتىر. العاشقى ءتورت كۇندە 109 قىلمىس انىقتالىپ, سونىڭ ىشىندە 82-ءسى اشىلدى. سونداي-اق بۇرىن جاسالعان 55 قىلمىس اشىلىپ, ىزدەۋدە جۇرگەن 15 قىلمىسكەر ۇستالدى.
قىلمىستاردىڭ الدىن الۋ شارالارى باستالعان كۇننەن بەرى 4621 اكىمشىلىك قۇقىق بۇزۋشىلىق تىركەلسە, سونىڭ ىشىندە 384-ءى – ۇساق بۇزاقىلىققا, 466-سى – ادامداردىڭ تىنىشتىعىن بۇزۋعا, 708-ءى – قوعامدىق ورىنداردا ماس كۇيىندە سپيرتتىك ىشىمدىكتەر ىشۋگە قاتىستى فاكتىلەر. تۇنگى ۋاقىتتا ۇلكەندەردىڭ قاراۋىنسىز جۇرگەن 174 كامەلەتتىك جاسقا تولماعاندار ۇستالعان. كولىكتى ماس كۇيىندە جۇرگىزگەن 15 جۇرگىزۋشى قولعا ءتۇسىپ, جاياۋ جۇرگىنشىلەر قوزعالىسى ەرەجەلەرىن بۇزۋعا قاتىستى 594 فاكتى انىقتالعان.
قىلمىستاردىڭ الدىن الۋ شارالارى بارىسىندا بىرقاتار الاياقتىق قىلمىس جاسادى دەپ كۇدىككە ىلىنگەن 33 جاستاعى قالا تۇرعىنى ۇستالدى. ول QIWI-ءاميان قوسىمشاسىندا جاساندى تۇبىرتەك كورسەتۋ ادىسىمەن اڭقاۋ ازاماتتاردىڭ اقشاسىن جىمقىرعان. ساۋدا ۇيلەرىندەگى بۋتيكتەرگە كىرىپ, وزىنە برەندتىك كيىمدەر مەن اياق كيىمدەردى تاڭداپ الىپ, ونىسىن ۇستىنە كيىپ, ساتۋشىعا جالعان تۇبىرتەگىن كورسەتىپ, اقشانىڭ بىرەر مينۋتتاردان كەيىن تۇسەتىنىنە سەندىرىپ, تايىپ تۇرعان. ەر ادام وتە ءساندى كيىنگەندىكتەن, ساتۋشىلار ەش كۇماندانباعان. «قۇقىقتىق ءتارتىپ» شارالارى ناتيجەسىندە الاياق اقىرى قولعا ءتۇستى. بۇرىن ول الاياقتىق قىلمىسى ءۇشىن سوتتالعان بولىپ شىقتى. قازىرگى كەزدە جەڭىل جولمەن بايىماق بولعان پاقىردىڭ ەلوردا اۋماعىنداعى باسقا قىلمىستارعا قاتىسى بار-جوعى تەكسەرىلۋدە. الاياق ۋاقىتشا ۇستاۋ اباقتىسىنا قامالدى.
تولەن تىلەۋباي
