استانادا باستى ماسەلە – باسپانا مەن جەر. ەلورداعا كوشىپ كەلۋشىلەردىڭ وسى «جاندى» جەرىن الاياقتار دا جاقسى ءبىلىپ العان. سوڭعى بەس جىلدا باس قالادا الاياقتىق جولمەن ازاماتتاردىڭ سەنىمىن پايدالانىپ, پايداقورلىق نيەتىن جۇزەگە اسىرعاندار جانە بوتەننىڭ مۇلكىن جىمقىرۋ سىندى قىلمىستار كوبەيگەن.
استانا قالاسى №2 الماتى اۋداندىق سوتىنىڭ سۋدياسى ۋبايدۋللا قوشانوۆتىڭ ايتۋىنشا, بيىلعى جىلدىڭ 6 ايىنىڭ دەرەكتەرىنە ساي, الماتى اۋداندىق سوتىنا 19 ادامعا قاتىستى 17 قىلمىستىق ءىس تۇسكەن. 8 ادامعا قاتىستى 7 قىلمىستىق ءىس ۇكىم شىعارۋمەن اياقتالعان. 10 ادام سوتتالسا, ونىڭ ىشىندە 2 ادامنىڭ باس بوستاندىعى شەكتەلگەن. مۇلىكتى تاركىلەۋ تۇرىندەگى قوسىمشا جازا 10 ادامعا تاعايىندالسا, 2 ازاماتقا بەلگىلى ءبىر قىزمەتپەن اينالىسۋ قۇقىنان ايىرۋ تۇرىندەگى جازا تاعايىندالعان.
– سوتتالعان ازاماتتاردىڭ دەنى – «ءۇي الىپ بەرەمىن, جەر تەلىمىن الۋعا كومەكتەسەمىن» دەپ جۇرتشىلىقتى الداپ, اقشاسىن جىمقىرىپ كەتكەندەر. سوندىقتان استانالىقتاردى اباي بولۋعا شاقىرامىز. كەز كەلگەن جىلجىمايتىن مۇلىكتى الۋ جانە بەرۋ تەك زاڭ اياسىندا جۇزەگە اسىرىلاتىنىن اركىم ەستەن شىعارماۋى ءتيىس, – دەيدى سۋديا ۋبايدۋللا قوشانوۆ.
سوت وندىرىسىندە قارالىپ جاتقان الاياقتىق تۇرمەن بوتەننىڭ مۇلكىن يەمدەنۋ ءۇشىن جاسالعان قىلمىستار سان الۋان. سونىڭ ءبىر مىسالىن كەلتىرە كەتەيىك. استانا قالاسىنىڭ تۇرعىنى رۇستەم اتتى ازامات «جەكە ءۇي سالۋ ءۇشىن جەر تەلىمىن الىپ بەرەمىن» دەپ ۋادە بەرىپ, قۇرىعىنا تۇسىرگەن ادامداردىڭ ارقايسىسىنان 25 مىڭنان 30 مىڭ اقش دوللارىنا دەيىن اقشا بوپسالاعان. ول وزگەنىڭ سەنىمىنە كىرىپ الىپ, 9 جابىرلەنۋشىگە الاياقتىق جولمەن جالپى قۇنى 58209530 تەڭگەگە ماتەريالدىق زالال كەلتىرگەن. بۇدان سوڭ العان اقشالاردى جابىرلەنۋشىلەرگە قايتارماي, ولارعا تيەسىلى بولعان 16,2008 گەكتار جەر تەلىمىن بوتەن ازاماتپەن كەلىسىمشارتقا وتىرىپ, جەردىڭ ءبارىن 28 پاتەرگە اۋىستىرىپ جىبەرگەن. ونىمەن قويماي, پاتەرلەردى ءوز مەنشىگىنە جەكەشەلەندىرىپ العان.
سوت ۇكىمىمەن الاياق ازامات قىلمىستىق كودەكستىڭ 177-بابىنىڭ «ب» تارماعىمەن ايىپتى دەپ تانىلىپ, وعان جەتى جىلعا باس بوستاندىعىنان ايىرۋ جازاسى تاعايىندالدى. ال ونىڭ قىلمىستىق جولمەن تاپقان جەكە مەنشىگىندەگى مۇلكى مەملەكەت پايداسىنا تاركىلەندى.
قازىرگى تاڭدا سوت ۇكىمىن ورىنداۋ ماقساتىندا سوتتالۋشىنىڭ جەكە مەنشىگىندە تاركىلەنگەن مۇلكى سوت ورىنداۋشىلار ارقىلى ساتىلىپ, جابىرلەنۋشىلەرگە كەلتىرگەن ماتەريالدىق شىعىندار قايتارىلۋ ۇستىندە.
سوندىقتان ماماندار جەكەمەنشىككە پاتەر, جەر تەلىمىن ساتىپ الاردا ساتۋشى تاراپتىڭ بۇكىل قۇجاتتارىن تۇگەل تەكسەرىپ, مەملەكەت ورگانداردان ءتيىستى انىقتامالار الۋعا كەڭەس بەرەدى.
قىمبات نۇرعالي
