– ماعان ايفون كەرەك!
توقتار ۇيگە تومسارىپ كىردى.
– ايفونى نەسى, قۇلىنىم-اۋ؟ تەلەفونىڭ بار ەمەس پە؟
اناسى ءاپ-ساتتە ابدىراپ قالدى.
– نوكيا ما؟ ۇستاعىم كەلمەيدى ونى. سىنىپتاعىلاردىڭ ءبارى ايفون مەن گەلەكسي العان!
– سەنىكىنىڭ قاي جەرى كەم؟ قاجەت قىزمەتتەردىڭ ءبارى وندا دا بار عوي, – دەپ اكەسى اڭگىمەگە ارالاستى.
– بىلمەيمىن…
توقتار از-كەم تۇردى دا, مۇرنىنىڭ استىنان مىڭگىر ەتتى:
– ايفون دەگەن اتى كۇشتى…
ال كەرەك بولسا! «كۇشتى اتىنا» بولا اكە-شەشەسىنەن سمارتفون سۇرايتىن تالاي وقۋشىنى كوز كورىپ ءجۇر. زاتى قىزىقتىرمايدى, تەك اتى عانا. Apple-ءدىڭ ءونىمىن كىم ۇستاسا, سول – «كرۋتوي»! «كرۋتوي» بولعىسى كەلەتىندەر قىڭقىلداپ ءجۇرىپ, اتا-انالارىنا ايفون الدىرتادى. بالا دەگەندە ولاردىڭ دا شىعار جانى بولەك. قارىزدانىپ-قاۋعالانىپ ءجۇرىپ, سۇراعانىن اپەرەدى.
جاقىندا عانا Ebates.com سايتى قىزىق زەرتتەۋ جۇرگىزىپتى. ساۋالناماعا 12 مەن 17 جاس ارالىعىنداعى مەكتەپ وقۋشىلارى قاتىسقان. «تۋعان كۇنىڭە قانداي سىيلىق قالايسىڭ؟» دەگەن سۇراققا رەسپوندەنتتەردىڭ 51 پايىزى «تىستەلگەن الماسى بار» گادجەتتەردى اتاپتى. ياعني, ولاردىڭ 27 پايىزى – ايفون, 24 پايىزى ايپادتى ارماندايدى ەكەن.
ارمان دەگەننەن شىعادى. بۇدان ەكى جىل بۇرىن سياو چجەن ەسىمدى 10-سىنىپتا وقيتىن قىتايلىق بوزبالا ايپاد ءۇشىن ءبىر بۇيرەگىن ساتىپ جىبەرگەن. پلانشەتتى قاتتى ارمانداعان ول ءۇي ءىشىنىڭ جاعدايى جوعىن ەسكەرىپ, عالامتور ارقىلى الدەكىمدەرمەن كەلىسكەن. بۇيرەك ساۋداسى 22 مىڭ يۋانعا باعالانىپتى. وتا حۋنان پروۆينتسياسىندا جاسالعان. «ەستىمەگەن ەلدە كوپ» دەگەن وسى!
– شاكىرتتەردىڭ كوبى زاماناۋي سمارتفونداردى قۇر ماقتان ءۇشىن ۇستاپ ءجۇر, – دەيدى استانالىق ۇستاز بالجان توقتامىسوۆا. – اعىلشىن ءتىلىنىڭ مۇعالىمىمىن. ساباق ۇستىندە شاكىرتتەرىم ونلاين-سوزدىكتى پايدالانادى. كىتاپ پاراقتاپ جاتقاندارى سيرەك. قىمبات تەلەفونى جوقتار وندايدا انالارعا قىزىعا قاراپ وتىرادى…
ويدى وي قوزعاپ, ءبىر كۇنى ون ءۇش جاسار جيەنىمنىڭ ايفونىنا ءۇڭىلدىم. تاڭنان كەشكە دەيىن باس المايتىنىن كورىپ, قانداي كەرەمەت بار ەكەن دەپ ويلايتىنمىن. ەكرانعا ساۋساعىمدى سۇيكەپ, «پاراقتاپ» جاتىرمىن: ۆكونتاكتە, Instagram, Whats App, Angry birds, Retrica, InstaSize, Snapseed… بارى وسى! وندا دا جوعارىداعىلاردىڭ جارتىسى – سۋرەت وڭدەۋگە ارنالعان قوسىمشالار. ەكى-ۇشەۋى – ويىن, قالعانى – الەۋمەتتىك جەلىنىڭ باعدارلامالارى. مارقۇم ستيۆ دجوبس ايگىلى برەندىن مۇنداي جەڭىل-جەلپى دۇنيەلەر ءۇشىن ويلاپ تاپپاعان شىعار…
Apple تۇتىنۋشىلارىنا ارنالعان AppStore دۇكەنىندە وقۋشىلارعا ارنالعان پايدالى قىزمەتتەر جەتىپ ارتىلادى. كىتاپ وقىعىڭ كەلسە, iBooks كومەككە كەلەدى. ىزدەگەن ادەبيەتىڭدى تاپ تا, جۇكتەپ ال. بيولوگيانى زەرتتەگىڭ كەلسە, TED-ءتى اش. ادام پسيحولوگياسىنان باستاپ قاراپايىم جاسۋشانىڭ قۇرىلىسىنا دەيىن تاپتىشتەپ تۇرىپ, بەينەماتەريال تۇرىندە ءتۇسىندىرىپ بەرەدى. ال LinguaLeo باردا اعىلشىنشام ناشار دەۋدىڭ ءوزى ۇيات. باعدارلاماداعى «اقىلدى ارىستان» – ساعان ءتىل ۇيرەتەر جاپ-جاقسى ۇستاز. ايتا بەرسەڭ, شىنىمەن دە پايداسى بار دۇنيەلەر وتە كوپ. تەك سولاردى قاجەتىنە جاراتار جەتكىنشەك تىم از.
بوتاگوز ماراتقىزى
