«تۇتقىن» ءCابي
قازىر جۇرتتى تاڭعالدىرۋ قيىن. وعاش نارسەنىڭ وزىنە «ە-ە-ە» دەسەدى دە قويادى. وندىرۋشىلەرگە دە كەرەگى سول, نەبىر سۇمدىق دۇنيەلەردى ءۇستى-ۇستىنە ءۇيىپ-توگۋدە. جاقىندا عانا توسىن جاڭالىقتى ەستىدىم. برازيليالىقتار بالانى ماتاپ تاستايتىن كويلەك ويلاپ تاۋىپتى. «ويلاپ تاۋىپتى» دەگەنىم وتىرىك شىعار, بۇل جەيدە بۇرىننان بار نەگىزى. تەك ونى… جىندىحاناداعىلار عانا كيەتىن. ەكى قولدى شاندىپ تاستايتىن ارنايى كيىم ەرتەرەكتە پسيحولوگيالىق اۋىتقۋى بار جاندار ءۇشىن تىگىلگەن. ال سونى سابيلەرگە سايكەستەندىرىپ جاساعان ساناسىزداردىڭ ماقساتى نە بولدى ەكەن؟!
«Control Toys» كورپوراتسياسى مۇنداي ونىمدەردى تۇتاس سەريا قىلىپ شىعارعان. جيىنتىق ءۇش زاتتان تۇرادى. ءبىرىنشىسى – جاڭاعى كويلەك. قوڭىر قونجىقتاردىڭ سۋرەتى بار بۇل جەيدەنىڭ جەڭى ۇزىن. ونى بەلدەن اينالدىرا وراپ قوياتىن كورىنەدى. سودان سوڭ باۋ ارقىلى ەكى قولدى ماتايدى. ءبىتتى, بالانىڭ قوزعالماق تۇگىلى, ساۋساعىنىڭ ۇشىن دا قيمىلداتۋعا شاماسى جوق. كەلەسىسى – «ءتارتىپ ۇستەلى». ۇستەلدىڭ ۇستىڭگى جانە استىڭعى جاعىنداعى ءتورت باۋ بالانىڭ قول-اياعىن تىرپ ەتكىزبەيدى. ول ازداي, ارقانى ورىندىققا جاپسىرا بايلاپ تاستايتىن تاعى ءبىر ءجىپ بار. «قۇرساۋلانعان» ءسابيدىڭ ءحالىن ايتىپ جاتۋدىڭ ءوزى ارتىق. جەتىلىپ كەلە جاتقان جاس ساناعا بۇدان اسقان قانداي سوققى بولۋى مۇمكىن؟! سۇمدىق مۇنىمەن بىتپەيدى. «سontrol Toys» فيرماسىنىڭ ءۇشىنشى ءونىمى – تاستان جاسالعان اۋىر دوپ. دوپ دەگەنىڭ جەڭىل بولماۋشى ما ەدى؟! جوق, ونىمىز – ويناۋ ءۇشىن. ال مىناۋ شارمەن ۇزاققا بارمايسىڭ. ءزىل باتپان «ويىنشىق» تەمىر شىنجىرعا بەكىتىلگەن. شىنجىردىڭ ءبىر ۇشى بالانىڭ اياعىنا بايلانادى. ەجەلگى داۋىرلەردە زىندانداعى تۇتقىن قاشىپ كەتپەس ءۇشىن ءدال وسىنداي جازا قولدانىلاتىن بولعان. مىناۋ – سونىڭ زاماناۋي كوشىرمەسى.
Publicis جارناما اگەنتتىگىنىڭ ارت-ديرەكتورى انتونيو كوررەا بىلاي دەيدى: «ايگىلى «Supernanny» تەلەشوۋىن كورگەن سوڭ, «Control Toys» جيىنتىعىن شىعارۋ يدەياسى ويىما كەلدى. اكە-شەشەگە باعىنبايتىن تەنتەك بالالاردى تەك وسىنداي جولمەن عانا تارتىپكە شاقىرۋعا بولادى». كەشىرىڭىز, انتونيو مىرزا! ءسىزدىڭ ءادىسىڭىز تارتىپتەن گورى ازاپ پەن مازاققا كوبىرەك كەلىڭكىرەيدى ەكەن.
قيىن بالالار بار, البەتتە. ولاردىڭ دا ءتىلىن تابۋ كەرەك. بوبەك ءۇش جاسقا كەلگەندە, پسيحولوگيالىق داعدارىسقا ۇشىرايدى. بۇل شاق – ونىڭ وزىندىك «مەنى» قالىپتاساتىن كەز. بالا ەندى تاۋەلسىز بولۋعا تىرىسادى. سونىسىن بايقاتقىسى كەلىپ, اينالاسىنداعىلارعا اشۋ-ىزاسىن كورسەتە باستايدى. اگرەسسيا پايدا بولادى. بوبەكتىڭ بۇل مىنەزىن كۇشپەن تىيام دەۋدىڭ ءوزى ابەستىك. استاناداعى بالاباقشالاردىڭ بىرىندە تاربيەشى بولىپ جۇمىس ىستەيتىن جانار ايتقازيەۆانىڭ ايتۋىنشا, ماسەلەگە باسقا جاقتان كەلگەن ءجون. «مۇندايدا الدارىنا قاعاز بەن قارىنداش بەرەمىن. بالا وزىندەگى بارلىق جاعىمسىز ەنەرگيانى سۋرەت سالۋ ارقىلى سىرتقا شىعارادى. بوياماقتىڭ دا پايداسى بار. ەشقاشان ۇرسىپ-زەكىپ, كۇش كورسەتكەن ەمەسپىن» دەيدى ول. ءسابيدىڭ ءسال نارسەگە اشۋلانشاق, قيت ەتسە قىرسىعا قالاتىن قىلىعى اتا-اناعا دا كوپ بايلانىستى. «مىنانى ىستەسەڭ, كامپيت الىپ بەرەمىن» دەپ الداۋسىراتا سالماي, بالامەن ۇلكەن ادامدارشا اڭگىمەلەسكەن دۇرىس. سوندا ول دا وزىنە بىرەۋدىڭ سەنەتىنىن ءتۇسىنىپ, كادىمگىدەي جاۋاپكەرشىلىكتى سەزىنەدى.
تاربيەگە كەلگەندە باردى اياماعان حالىق ەمەسپىز بە؟! بوتەننىڭ باتپاعىنان ساقتانايىقشى. بالا بىزدىكى عوي.
بوتاگوز ماراتقىزى