استانا قالاسىنىڭ اكىمى باقىت سۇلتانوۆ بۇۇ ەۋروپالىق ەكونوميكالىق كوميسسيانىڭ حاتشىسى ولگا الگاەروۆامەن كەزدەستى. بۇل تۋرالى استانا قالاسى اكىمدىگىنىڭ رەسمي سايتى حابارلادى.
مارتەبەلى مەيمان استاناعا ترانسشەكارالىق سۋ ارنالارى مەن حالىقارالىق كولدەردى قورعاۋ جانە پايدالانۋ تۋرالى كونۆەنتسيا تاراپتارى كەڭەسىنە كەلگەن. ونىڭ ايتۋىنشا, استانا الاڭى جاھاندىق باستامالاردى وتە ءساتتى جۇزەگە اسىرۋدا. مىسالى, بيىل جازدا ەلوردادا ازياداعى, ورتالىق ازيا ايماعىنداعى ورمانداردى دامىتۋ بويىنشا كەڭەس وتكىزىلدى.
باقىت سۇلتانوۆ ءوز سوزىندە قالانىڭ 2050 جىلعا ارنالعان باس جوسپارى ازىرلەنگەنىن تىلگە تيەك ەتتى. «ەلباسىنىڭ تىكەلەي تاپسىرماسىمەن ءبىز قالانىڭ كوپجىلدىق دامۋ باعدارلاماسىن ازىرلەۋگە كىرىستىك. استانا تەك ادامدارعا ىڭعايلى قالا عانا بولىپ قالماي, يننوۆاتسيا مەن جاڭا ويلاردىڭ جۇزەگە اساتىن قالاسى بولۋى ءتيىس» دەدى شاھار باسشىسى.
كەزدەسۋ سوڭىندا بۇۇ ەۋروپالىق ەكونوميكالىق كوميسسيا حاتشىسى ولگا الگاەروۆا ەلوردا اكىمىن ءىرى قالالار باسشىلارىنىڭ جەنەۆادا وتەتىن ەۋروپالىق ەكونوميكالىق كوميسسيانىڭ كەزەكتى كەڭەسىنە قاتىسۋعا شاقىردى.
