بۇكىلالەمدىك تۋريستىك ۇيىمنىڭ (يۋنۆتو) قالا ءتۋريزمىن دامىتۋعا ارنالعان حالىقارالىق VIII ءسامميتى 2019 جىلى ەلوردادا وتەتىن بولدى. بۇل تۋرالى كورەيا استاناسى سەۋلدە ءوتىپ جاتقان حالىقارالىق فورۋمدا كەزەكتى باسقوسۋ استانادا وتەتىندىگى رەسمي تۇردە جاريالاندى. اتالمىش جيىنعا قالا اكىمىنىڭ ورىنباسارى ەرمەك امانشاەۆ باستاعان دەلەگاتسيا قاتىستى.
بيىلعى شاراعا الەمنىڭ 57 ەلىنەن مىڭداعان قاتىسۋشىلار كەلگەن. ولاردىڭ قاتارىندا گرەكيا جانە موڭعوليا ەلدەرىنىڭ تۋريزم مينيسترلەرى, تايلاند پەن مالايزيانىڭ تۋريزم جونىندەگى ۆيتسە-مينيسترلەرى, سەۋل, كۋالا-لۋمپۋر, پاريج جانە نيتستسا قالالارىنىڭ ۆيتسە-مەرلەرى, سونداي-اق اكادەميالىق توپتاردىڭ جانە Google, MasterCard, Amadeus كومپانيالارىنىڭ وكىلدەرى بار. شارا بارىسىندا بۇۇ قابىلداعان HABITAT III New Urban Agenda ستراتەگياسى اياسىندا قالالىق ءتۋريزمدى دامىتۋداعى كوكەيكەستى ماسەلەلەر كوتەرىلگەن. سونىمەن قاتار قالالىق ءتۋريزمدى دامىتۋداعى يننوۆاتسيالىق جاڭا ترەندتەر مەن تسيفرلىق تەحنولوگيالار مۇمكىندىگى جانە تۋريزم سالاسىنداعى بيزنەستىڭ جاڭا مودەلدەرىن ترانسفورماتسيالاۋ جولدارى كەڭىنەن تالقىعا ءتۇستى. مامانداردىڭ ايتۋىنشا, 2050 جىلعا قاراي الەم ەلدەرىنىڭ 70%-ى قالا تۇرعىندارى بولماق. ال تۋريزم ءوز كەزەگىندە دۇنيەجۇزىلىك ءجىو-ءنىڭ 10%-دان استامىن قۇراپ, قازىرگى زامانعى جاھاندىق ماسەلەلەردى شەشۋ مەن قالالاردىڭ ەكونوميكالىق دامۋىنىڭ نەگىزگى درايۆەرىنە اينالماق.
