نۇر-سۇلتان قالاسىنداعى پاراليمپيادالىق جاتتىقتىرۋ ورتالىعىندا «العاشقى مەديتسينالىق كومەك» كورسەتۋ بويىنشا بىلىكتىلىكتى ارتتىرۋ كۋرسى ءوتتى.
كۇنىنە 150-دەن 200-گە دەيىن ەرەكشە جاندارعا قىزمەت كورسەتەتىن پاراليمپيادالىق جاتتىقتىرۋ ورتالىعىنىڭ قىزمەتكەرلەرى قالالىق جەدەل مەديتسينالىق جاردەم ستانتسياسى ماماندارىنان «بازالىق رەانيماتسيا» تاقىرىبىندا تەوريالىق جانە پراكتيكالىق ءبىلىم الدى.
«پاراليمپيادالىق ورتالىقتىڭ قىزمەتكەرلەرىنە العاشقى كومەك كورسەتۋ تاسىلدەرىن ۇيرەتتىك. قازىرگى ۋاقىتتا وسىنداي قايىرىمدىلىق ءىس-شارالارىن ۇيىمداستىرىپ, تۇراقتى تۇردە وتكىزىپ تۇرامىز» دەدى قالالىق جەدەل مەديتسينالىق جاردەم ستانتسياسى سيمۋلياتسيالىق وقىتۋ ورتالىعىنىڭ باسشىسى قاسىم شىنتاس.
ماماننىڭ ايتۋىنشا, العاشقى دارىگەرگە دەيىنگى مەديتسينالىق كومەك كورسەتۋ بويىنشا بارلىق ءىس-ارەكەتتەر اۋىرعان ادامنىڭ جاعدايىن قيىنداتپاۋ, ونىڭ اۋىرسىنۋىن كۇشەيتپەۋ جانە جاڭا زاقىمدانۋدى بولدىرماۋ ءۇشىن وتە مۇقيات ورىندالۋى كەرەك.
پاراليمپيادا ورتالىعىنىڭ قىزمەتكەرلەرى جاتتىقتىرۋشىلاردىڭ كاسىبي بىلىكتىلىگىن جوعارى باعالاپ, قالالىق جەدەل جاردەم ستانتسياسىنىڭ جانىنداعى وقۋ-سيمۋلياتسيالىق ورتالىقتىڭ ماماندارىنا العىسىن ءبىلدىردى.
كۋرسقا قاتىسقاندارعا حالىقارالىق سەرتيفيكاتتار تاپسىرىلدى.
