«Astana» الەۋمەتتىك-كاسىپكەرلىك كورپوراتسياسى مەن Billboard video كومپانياسىنىڭ تسيفرلاندىرۋ تۇجىرىمداماسىنىڭ اياسىندا استانادا العاشقى ينتەللەكتۋالدى كولىكتىك جۇيە ورناتىلدى.
جول قوزعالىسىنا قاتىستى قاجەتتى شۇعىل اقپاراتتى جەتكىزۋگە ارنالعان جۇيە جول بويىنا ورنالاستىرىلعان بىرنەشە مەديابوردتتاردان تۇرادى. وندا جاقىن ماڭداعى كوشەلەرگە جەتۋ ناۆيگاتسياسى مەن جولعا كەتەتىن ۋاقىت مولشەرى, كوشەدەگى كولىك اعىمىنىڭ جىلدامدىعى, توتەنشە جاعدايلار تۋرالى حابارلاما مەن جاقىنداپ قالعان جەدەل جاردەم كولىگىنە جول بەرۋ اقپاراتى, اۋا رايى, ۆاليۋتا باعامى جانە قالا اكىمدىگىنىڭ جەدەل حابارلامالارى كورسەتىلەدى. جاڭا جۇيە اۋقىمدى اقپاراتتى وڭدەۋگە داعدىلانعان Big Data تەحنولوگياسىن قولدانۋ ارقىلى ءبىر ورتالىقتان باسقارىلادى. بۇدان بىلاي ونىڭ كومەگىمەن اۋا رايىنىڭ قولايسىزدىعى, جول جوندەۋ جۇمىستارى, باعدارشام قىزمەتىنىڭ وزگەرۋى سياقتى جولداعى قوزعالىستى الدىن الا جوسپارلاۋعا مۇمكىندىك تۋماق.
العاشقى مەديابورد سىنامالى جوبا نەگىزىندە تۇركىستان كوشەسىنىڭ بويىنداعى بوتانيكالىق باقتىڭ جانىنان ورىن تەپتى. الداعى ۋاقىتتا ەلوردادا وسىنداي 40 مەديابورد ورنالاستىرىلماق. مامانداردىڭ مالىمەتىنشە, الەم ەلدەرىندە ازىرگە ەشقانداي بالاماسى جوق بۇل جوبا 100 پايىز قازاقستاندا ازىرلەنىپتى.
ايتا كەتۋ كەرەك, «Billboard video» كومپانيالار توبى – «اقىلدى قالانىڭ» ينتەللەكتۋالدى كولىكتىك جۇيە باعدارلاماسىنىڭ جالعىز ازىرلەۋشىسى ءارى وپەراتورى. سونىمەن قاتار, بيىل الەمدىك نارىققا شىققان اتالمىش كومپانيا سينگاپۋر, گونكونگ پەن ابۋ-دابيدە دە تىڭ جوبانى جۇزەگە اسىرىپ جاتقان كورىنەدى.
