ەلوردادا Nur-Sultan Snowpark – snowboard جانە freeski (جاڭا مەكتەپتىڭ تاۋ شاڭعىسى) قىسقى ەكسترەمال سپورت تۇرلەرىنە ارنالعان سپورتتىق-جاتتىعۋ الاڭى اشىلدى. باس قالانىڭ اۋا رايىن ەسكەرسەك, قالا تۇرعىندارى كەمى ناۋرىز ايىنا دەيىن وسىندا ەش الاڭسىز كەلىپ شاڭعىمەن جۇيىتكۋىنە بولادى.
«جالپى, بۇل الاڭ سنوۋبوردشىلاردى قولداۋ ءۇشىن جاسالعان. بىزگە جەكە-جەكە كوپتەگەن ءوتىنىش كەلىپ ءتۇستى, سىرعاناۋعا قاجەت الاڭ كەرەك بولدى. سەبەبى جازدا بۇل جىگىتتەر سكەيتبوردقا بارادى, ال قىستا جاتتىعاتىن ورىن جوق. ءبىز باستامانى قولداپ, وسىنداي توبەشىك سالدىق. سونداي-اق مۇندا بالالاردى سنوۋبوردپەن سىرعاناۋعا ۇيرەتەتىن مەكتەپ تە بولادى. جالپى, بۇل ءبىزدىڭ قالامىزعا جەتىسپەيتىن بەلسەندى قىسقى سپورت ءتۇرى» دەدى ۋربانيستيكا ورتالىعىنىڭ باسشىسى ەلنار بازىكەن.
ايتا كەتەيىك, شاڭعى مەن سنوۋبوردپەن سىرعاناۋعا ارنالعان جاساندى توبەشىك قازاقستاندا العاش رەت قىسقى قوعامدىق كەڭىستىكتى دامىتۋ اياسىندا ورناتىلدى. وسىندا سنوۋبوردتان وزگە شاڭعى, شانا, كونكيمەن سىرعانايتىن الاڭدار دا بار. سىرعاناۋ قۇرالدارىن جالعا بەرەتىن ورىن دا اشىق. بۇل ورىن ءبىرىنشى كەزەكتە قالا جاستارىنىڭ سۇراۋى بويىنشا اشىلعان.
جاڭادان باستاعاندار ءۇشىن سنوۋبورد الاڭىندا قاجەتتى جابدىقتى جالعا بەرۋ جوسپارلانعان, نۇسقاۋشىلار دا ساباق بەرەتىن بولادى. كەشكە شامدار الاڭعا جارىق بەرىپ تۇرادى. وسىلايشا, ەكسترەمال سپورت اۋەسقويلارى ءۇشىن كۇندىز عانا ەمەس, تۇندە دە سىرعاناۋدى ۇيىمداستىرۋ جوسپارلانۋدا.
Nur-Sultan Snowpark اتاتۇرىك ساياباعىنداعى جاعالاۋدا (تاشەنەۆ كوشەسى 8 ءۇيدىڭ جانىندا) ورنالاسقان.
