الماتىلىق قاريا ءابىلتاي شايحوۆ استاناعا ارنايى ەكسپو كورمەسى ءۇشىن جولعا جاياۋ شىعىپ, ءۇش كۇننىڭ ىشىندە جەتكەن. ۇلتتىق قاۋىپسىزدىك كوميتەتىنىڭ ارداگەرى ساياحاتى ءۇشىن ءبىر تيىن شىعىن جۇمساماعان.
ساپارىن وڭتۇستىك استانادان باستاعان 74 جاستاعى جيھانگەز كولىكتەردى جولشىباي توقتاتىپ, كورمەگە جەتۋدى كوزدەگەن. ءابىلتاي اتا اۆتوجارىسىن «ەكسپو-2017» حالىقارالىق مامانداندىرىلعان كورمەسىنە جانە ءوزى تالاي جىل تاباندى ەڭبەك ەتكەن ۇلتتىق قاۋىپسىزدىك كوميتەتىنىڭ 25 جىلدىق مەرەيتويىنا ارنادى. ارداگەر ساياحاتىن و باستان الدىن الا جوسپارلاعان.
– جەر شارىن ارالاپ ءجۇرىپ, كوپتەگەن ەلدى كورىپ, حالقىمەن تانىسىپ ۇلگەردىم. قازاق جەرىندە تۇرىپ جاتقان حالىق سياقتى باۋىرمال ەلدى ءالى كورگەن ەمەسپىن. ءۇش كۇنگە جالعاسقان ساياحاتتا نەبىر اق پەيىلدى ادامدار كەزدەستى. قول ۇشىن ەشكىم ايامادى. اراسىندا ءتىپتى, «كولىگىمە مىنبەدىڭىز» دەپ رەنجىگەندەر بولدى, – دەپ ساپاردان كەيىنگى ءوز اسەرىمەن ءبولىستى ءابىلتاي اتا.
ءسوز اراسىندا ارداگەردىڭ كورمەگە قاتىستى پىكىرىن دە بىلدىك. «ەكسپو-2017» كورمەسىن ۇلكەن جەتىستىك دەپ بىلەمىن. قازىر بىرەۋ جاقتار, بىرەۋ داتتار. بىراق وسىنىڭ بارلىعى ءبىزدىڭ بولاشاعىمىز – جاستار ءۇشىن. نەگىز قالاندى, ەندى تەك العا جىلجۋ كەرەك» دەپ ءسوزىن قورىتىندىلادى جيھانگەز.
اقساقال بۇدان بۇرىن تۇركىستاننان ورىنبورعا دەيىن, جاركەنتتەن تاشكەنتكە دەيىن ساياحاتتاپ, ۇلىتاۋدى تۇگەل كەزىپ شىققان ەكەن. ەندىگارى ءابىلتاي اتا ءوزىنىڭ كورگەن-بىلگەنىن قاعاز بەتىنە ءتۇسىرىپ, كىتاپ جازۋدى ويلاستىرىپ قويدى. ايتا كەتەيىك, قاريا بىلتىر دا ەلورداعا قوس دوڭگەلەكپەن جولعا شىعىپ, بۇل قادامىن قازاقستاننىڭ 25 جىلدىعىنا ارناعان بولاتىن.
گۇلدانا تالعاتقىزى
