وتكەن اپتادا ۇكىمەتتەن باستالعان #Birge #TazaQazaqstan ەكولوگيالىق اكتسياسى كەڭ كولەمدەگى رەسپۋبليكالىق شاراعا اينالىپ, نۇر-سۇلتان قالاسىندا جالعاسىن تاپتى. 27 ءساۋىر كۇنى وتكەن قالالىق ەكواكتسياعا 5 مىڭنان اسا ادام قاتىستى. ولاردىڭ اراسىندا: قوعام قايراتكەرلەرى, مەملەكەتتىك قىزمەتشىلەر, جاستار, ەرىكتىلەر جانە قاراپايىم تۇرعىندار بولدى. ەكولوگيالىق اكتسيا قالانىڭ ءتورت جەرىندە: مايبالىق كولىنىڭ, ەسىل جانە قاراسۋ وزەندەرىنىڭ جاعاسىندا, ۆياچەسلاۆ سۋ قويماسىنىڭ اۋماعىندا ءوتتى. جالپى ىزگىلىكتى شارا بارىسىندا 16 توننادان استام قوقىس جينالدى.
«كۇن دەمالىس بولعانىنا قاراماستان, كوپتەگەن ادامدار ەكولوگيالىق اكتسياعا قولداۋ ءبىلدىرىپ, قالا اۋماعىن قوقىستان تازالاۋعا كومەكتەستى. ىزگى باستاماعا بەيجاي قاراماعاندارىڭىز ءۇشىن بارشاڭىزعا العىس ايتامىن! ءبىز تابيعاتتى قورعاۋىمىز كەرەك. ويتكەنى تازا اۋادا دەمالعاندى ۇناتامىز. سول سەبەپتەن قورشاعان ورتانى ارقاشان تازا ۇستاۋعا مىندەتتىمىز. تازالىقتى وزىمىزدەن باستايىق!» دەپ ۇندەۋ تاستادى نۇر-سۇلتان قالاسىنىڭ اكىمى التاي كولگىنوۆ. اتاپ ايتارلىعى, ەلوردا اكىمدىگى وسىنداي ەكولوگيالىق ءىس-شارالاردى تۇراقتى تۇردە وتكىزۋدى جوسپارلاپ وتىر.
ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆتىڭ باستاماسىمەن ىسكە اسىرىلعان #Birge #TazaQazaqstan اتتى اكتسيانى مەملەكەت باسشىسى قاسىم-جومارت توقاەۆ تا بىردەن قولدادى. بۇل تۋرالى پرەزيدەنت ءوزىنىڭ تۆيتتەردەگى پاراقشاسىندا: «ۇكىمەت پەن ازاماتتىق قوعامنىڭ باستاماسى بويىنشا بۇكىل ەل اۋماعىندا جالعاسقان ەكوچەللەندج قوزعالىسىن قولدايمىن. ەلىمىزدى تازالىق جۇرگىزەتىن اۋماققا اينالدىرامىز. بىرگە – تازا قازاقستان! جارايسىڭدار, ەرىكتىلەر!» دەپ جازدى. 
ءىس-شاراعا ۇكىمەت مۇشەلەرى دە قاتىستى. سولاردىڭ ءبىرى ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ مۇنداي سەنبىلىكتەر ءبىزدىڭ بىرلىگىمىز بەن ىنتىماعىمىزدى كورسەتەتىنىن ايتادى. «سەنبىلىككە كوپشىلىكتىڭ قاتىسۋى وتە قۋانتارلىق جايت. اسىرەسە, جاستاردىڭ كوپ بولۋى بىردەن ەلدىڭ نازارىن اۋدارادى. بۇل شارا – ءبىزدىڭ بىرلىگىمىزدى, ىنتىماعىمىزدى, قازاقستاننىڭ دامۋىنا دەگەن ەرەكشە كوزقاراسىمىزدى كورسەتەدى» دەيدى بەردىبەك ماشبەكۇلى.
