ۇلتتىق تاريحتى جان-جاقتى زەردەلەۋ باعدارلاماسىنىڭ جانە قازاقتاردىڭ ەتنوگەنەزى اياسىندا وسى كۇندەرى ەلىمىزدىڭ الماتى, قىزىلوردا, جامبىل جانە وڭتۇستىك قازاقستان وبلىستارىندا ارحەولوگيالىق قازبا, پاۆلودار, ماڭعىستاۋ, اتىراۋ جانە باسقا وبلىستاردا عىلىمي-زەرتتەۋ جۇمىستارى جۇرگىزىلۋدە. ال شىعىس قازاقستان وبلىسىندا «حالىق تاريح تولقىنىندا» باعدارلاماسى قالاي ىسكە اسىرىلۋدا؟ ول جونىندە كەشە قر پرەزيدەنتى جانىنداعى ورتالىق كوممۋنيكاتسيالار قىزمەتىنىڭ ءباسپاسوز ءماسليحاتىندا باياندالدى.
ەلىمىزدە وسى كۇنگە دەيىن التى «التىن ادام» تابىلسا, سونىڭ ۇشەۋى شىعىس قازاقستان وبلىسىنىڭ اۋماعىنان قازىپ الىنعان. ونى شقو اكىمىنىڭ ورىنباسارى جاقسىلىق ومار جينالعانداردىڭ ەسىنە سالىپ, 26-27 تامىز كۇندەرى ايماقتا «التاي – تۇركى الەمىنىڭ التىن بەسىگى» فورۋمى وتەتىندىگىن جەتكىزدى. ونىڭ ماقساتى – تۇركىتىلدەس حالىقتاردىڭ رۋحاني مۇراسىن ساقتاۋ, ناسيحاتتاۋ جانە دامىتۋ بولىپ وتىر. «عالىمدار ايتادى, «التاي تەك قانا تۇركىتىلدەس حالىقتاردىڭ ەمەس, بۇكىل ادامزاتتىڭ بەسىگى» دەپ. التاي, شىنىمەن دە, بۇگىنگى قازبا جۇمىستارىنا قاراپ, بۇگىنگى تاريحشىلاردىڭ سوزىنە قۇلاق اسىپ, عىلىمنىڭ بۇگىنگى جەتىستىكتەرىن زەردەلەيتىن بولساق, بۇكىل ادامزاتتىڭ التىن بەسىگى» دەدى ج. ومار.
وسىنداي اتاۋمەن العاشقى فورۋم 2011 جىلى وتكەن بولاتىن. ەكىنشى فورۋمعا رەسەي, جاپونيا, قىرعىزستان, تۇركيا, تۇركىمەنستان, ازەربايجان سەكىلدى, جالپى العاندا 20 ەلدىڭ وكىلدەرى شاقىرىلعان. سونىمەن بىرگە, قۇرمەتتى قوناقتار اراسىندا قازاقستاننىڭ يۋنەسكو-داعى تۇراقتى وكىلى ولجاس سۇلەيمەنوۆ, تۇركسوي حالىقارالىق ۇيىمىنىڭ حاتشىسى دۇيسەن قاسەيىنوۆ بولماق. وسىناۋ ۇلكەن شارانىڭ اياسىندا عىلىمي-پراكتيكالىق كونفەرەنتسيا, كول ونەر شەبەرلەرىنىڭ كورمەسى, قىمىز, بال, جاڭعاق مەرەكەسى جانە قاتونقاراعاي اۋدانىندا تۇركى حالىقتارىنىڭ ءداستۇرلى ورىنداۋشىلارىنىڭ فەستيۆالى وتپەك.
س. امانجولوۆ اتىنداعى شقمۋ ءبىرىنشى پرورەكتورى باۋىرجان ەردەمبەكوۆ فورۋمنىڭ ەلگە بەرەرى جونىندە سويلەدى. وسى وقۋ ورنىنىڭ پروفەسسورى, تاريح عىلىمدارىنىڭ دوكتورى سوۆەتحان يگىباەۆ «حالىق تاريح تولقىنىندا» باعدارلاماسى تاريحىمىزعا جاڭا كوزقاراسپەن قاراۋعا مۇمكىندىك بەرگەنىن ايتتى. «نازارباەۆ ورتالىعى» مم قىزمەتكەرى, تاريح عىلىمدارىنىڭ كانديداتى ەرلان سايلاۋباەۆ شىعىس قازاقستان وبلىسىنىڭ باي تاريحىنا توقتالدى.
امانعالي قالجانوۆ
