استانا قالالىق قوعامدىق كەڭەسىنىڭ 15 قىركۇيەك كۇنى وتكەن وتىرىسىندا بىرقاتار مەملەكەتتىك مەكەمەلەر كورسەتەتىن مەملەكەتتىك قىزمەتتەردىڭ رەگلامەنتىن بەكىتۋ, جەرگىلىكتى ءوزىن-ءوزى باسقارۋ ورگاندارىنان اۋماقتىق كەڭەستەر قۇرۋ جانە تاعى باسقا ماسەلەلەر قارالدى.
ەڭ الدىمەن قالالىق ىشكى ساياسات باسقارماسى اكىمشىلىك-قۇقىقتىق جۇمىس ءبولىمىنىڭ جەتەكشىسى دوسجان يسابەكتىڭ استانا قالاسىنداعى جەرگىلىكتى ءوزىن-ءوزى باسقارۋ ورگاندارىنان اۋماقتىق كەڭەستەر قۇرۋ ماسەلەسىنە قاتىستى بايانداماسى تىڭدالدى.
– بۇل ماسەلە كەڭەس مۇشەلەرىنىڭ قاراۋىنا بۇدان بۇرىن بەرىلىپ, تالقىلانعان بولاتىن. سوندىقتان نورماتيۆتىك قۇقىقتىق اكتى جوباسىنداعى وزگەرىسكە بىردەن كوشەيىن. بۇگىنگى توق ەتەر اڭگىمە اۋماقتىق كەڭەستەردىڭ شەكاراسى جونىندە بولادى. ءبىز قازىرگى ۋاقىتتا التى اۋماقتىق كەڭەستىڭ شەكاراسىن ايقىندادىق. ونىڭ بىرەۋى – ەسىل اۋدانىندا, ەكەۋى – سارىارقا, ۇشەۋى الماتى اۋدانىندا ورنالاسادى. بۇل اۋماقتار اۋدان اكىمدەرىمەن كەلىسىلگەن. سونى بەكىتۋلەرىڭىزدى سۇرايمىن, – دەدى دوسجان اسقارۇلى.
كەڭەس مۇشەلەرى بۇل جوبانى بىردەن ماقۇلداي قويمادى. بىرقاتار دەپۋتاتتار «جالپى, قالادا 25 سايلاۋ وكرۋگى بار, وسىنداي ۇلكەن ايماقتان تەك قانا 6 اۋماقتىق كەڭەس قۇرىلا ما؟ بۇل تىم از ەمەس پە؟ ماسەلەن, ەسىل اۋدانىندا ءبىر عانا اۋماقتىق كەڭەس بولادى ەكەن. مۇنى ءالى زەرتتەي ءتۇسۋ قاجەت» دەگەن پىكىر ءبىلدىردى. ىشكى ساياسات باسقارماسىنىڭ وكىلى اۋماقتىق كەڭەس شەكاراسى سول جاقتاعى تۇرعىنداردىڭ سانىنا بايلانىستى بەلگىلەنىپ وتىرعانىن ءتۇسىندىرىپ بەردى. ءبىراز تالقىعا سالعاننان كەيىن, كەڭەس مۇشەلەرى ايقىندالعان التى اۋماقتىق كەڭەستىڭ شەكاراسىن ماقۇلدادى.
بۇدان سوڭ استانا قالالىق تۇرعىن ءۇي باسقارماسىنىڭ باسشىسى رۋسلان احمەتوۆ جينالعاندارعا «تۇرعىن ۇيگە مۇقتاج ازاماتتارعا كوممۋنالدىق تۇرعىن ءۇي قورىنان بەرىلگەن تۇرعىن ءۇيدىڭ نەمەسە جەرگىلىكتى اتقارۋشى ورگاننىڭ جەكە تۇرعىن ءۇي قورىنان جالداعان تۇرعىن ءۇيدىڭ بولۋى (بولماۋى) تۋرالى انىقتاما بەرۋ» مەملەكەتتىك كورسەتىلەتىن قىزمەت رەگلامەنتىنە قاتىستى استانا قالاسى اكىمدىگىنىڭ 2015 جىلعى 10 ماۋسىمداعى № 182-933 قاۋلىسىنا وزگەرىس ەنگىزۋ جونىندەگى جوباسىن تانىستىردى. كەڭەس مۇشەلەرى مۇنداعى وزگەرىستەردى ءبىراۋىزدان قابىلدادى.
ال استانا قالالىق ساۋلەت جانە قۇرىلىس باسقارماسىنىڭ مەملەكەتتىك قىزمەتتەردىڭ رەگلامەنتتەرىن بەكىتۋ جانە وسىعان قاتىستى ەلوردا اكىمدىگىنىڭ 2015 جىلعى 19 قاراشاداعى № 120-2110 قاۋلىسىنا وزگەرىستەر ەنگىزۋ تۋرالى نورماتيۆتىك قۇقىقتىق اكت جوباسىن كەڭەس مۇشەلەرى ماقۇلداعانىمەن, باسقارمانىڭ قىزمەت كورسەتۋ ساپاسىنا بىرقاتار سىن ايتتى. قىزمەت كورسەتۋدى حالىققا ءتيىمدى ەتىپ ۇيىمداستىرۋ جونىندە كەڭەس بەردى.
استانا قالالىق ينۆەستيتسيا جانە دامۋ باسقارماسىنىڭ باسشىسى الىشەر ابدىقادىروۆ بۇل جيىندا «تۋريزم سالاسىنداعى كورسەتىلەتىن مەملەكەتتىك قىزمەتتەردىڭ رەگلامەنتتەرىن بەكىتۋ تۋرالى» اڭگىمەلەدى. جوبانى ماقۇلداعان كەڭەس مۇشەلەرى باسقارماعا تۋريزم سالاسىن دامىتۋعا قاتىستى شارالاردى جەتىلدىرە ءتۇسۋدى تاپسىردى.
مەڭدوللا نۇرىمۇلى
