كەدەن بەكەتىندەگى كەدەرگىسىز قىزمەت
استانا اۋەجايىندا ەلوردا ارقىلى جۇك تاسىمالداۋ ينفراقۇرىلىمى دامىتىلادى. وتكەن بەيسەنبى كۇنى سول ماقساتتا اۋەجايدا جۇكتەر مەن تاۋارلاردى كەدەندىك رەسىمدەۋگە ارنالعان كەدەن بەكەتىنىڭ عيماراتى پايدالانۋعا بەرىلدى.
وسىعان بايلانىستى «استانا حالىقارالىق اۋەجايى» اق باسقارما توراعاسى پاولو ريچيوتتي مەن «اۋەجاي-استانا» كەدەن بەكەتىنىڭ باسشىسى اسقار بەكبەرگەنوۆتىڭ قاتىسۋىمەن ءباسپاسوز ءماسليحاتى ۇيىمداستىرىلدى. وندا اۋەجاي باسشىلىعى جاڭا عيماراتتىڭ قىزمەتى جايلى جان-جاقتى اقپاراتپەن تانىستىردى.
ا. بەكبەرگەنوۆتىڭ ايتۋىنشا, جالپى اۋدانى 270 شارشى مەتردى الاتىن كەدەن بەكەتى استانالىق اۋەجايدا كەدەندىك رەسىمدەۋدى وڭايلاتۋ ماقساتىندا اشىلعان. اتاپ ايتساق, بەكەتتە ەلەكتروندىق كەزەك قىزمەتى ەنگىزىلگەن. بۇل قىزمەت ءتۇرى ارقىلى جۇگىن نەمەسە تاۋارىن رەسىمدەيمىن دەگەن ادام ۇزىن-سونار كەزەكتە تۇرماي, جۇمىسىن تەزىرەك بىتىرە الادى. سونداي-اق, رەسەپشن اۋماعىندا كليەنتتەردىڭ سۇراقتارىنا جاۋاپ بەرەتىن كەڭەسشىلەر جۇمىس ىستەيدى. كەدەن بەكەتىندە كليەنتتەرگە كەدەرگىسىز قىزمەت كورسەتۋگە ارنالعان «open space» جۇيەسى دە ورناتىلعان.
كەدەن بەكەتى عيماراتىنىڭ اشىلۋى جۇك ينفراقۇرىلىمىن دامىتۋ جولىنداعى العاشقى قادامداردىڭ ءبىرى بولىپ سانالادى. اۋەجايدىڭ الداعى جوسپارلارىنا جۇك تاسىمالداۋدى ىلگەرىلەتۋ ءۇشىن جاڭا كەڭسە مەن قويمالاردى سالۋ, جۇك تەرمينالى قىزمەتىن بارشا تۇتىنۋشىلارعا قولجەتىمدى ەتۋ جۇمىستارى ەنگىزىلگەن.
كەلەسى قادام رەتىندە تەكسەرۋ-وتكىزۋ بەكەتىن جۇك تەرمينالى عيماراتىنىڭ ارتىنا كوشىرۋ كوزدەلگەن. بۇل جوسپار جۇزەگە اسقان جاعدايدا, جۇك تەرمينالىنىڭ قىزمەتى كليەنتتەرگە ەش كەدەرگىسىز اتقارىلادى.
بۇعان قوسا, دەرەكتەردى وڭدەۋ مەن كەدەندىك قۇجات اينالىمى ماسەلەلەرىندە تۇتىنۋشىلاردىڭ استانا اۋەجايىمەن قارىم-قاتىناسى جەڭىلدەتىلەدى.
«ەكسپو-2017» حالىقارالىق مامانداندىرىلعان كورمەسى قارساڭىندا استانا اۋەجايىنداعى جۇك تاسىمالداۋ ينفراقۇرىلىمىن دامىتۋ ماڭىزدى جۇمىستاردىڭ قاتارىنا كىرىپ وتىر. اۋەجاي باسشىلىعىنىڭ سوزىنشە, ورتالىق ازيادا ءىرى حابتى قۇرۋ ماقساتىندا اۋەجايدا جۇك ينفراقۇرىلىمىن دا, جولاۋشىلار ينفراقۇرىلىمىن دا دامىتۋ جۇمىسى جالعاسادى.
امانعالي قالجانوۆ