ەلىمىزدە العاش رەت سمارتفوندار مەن پلانشەتتەرگە ارنالعان ستراتەگيالىق ويىن پايدا بولدى. كەشە جوبا جەتەكشىلەرى جۋرناليستەردىڭ باسىن قوسىپ, «قالا بۇرىشتارى» دەپ اتالاتىن ويىن ەرەجەسىمەن تانىستىردى.
استانا قالاسىنىڭ اكىمدىگى جانە «استانا ەكسپو-2017» ۇلتتىق كومپانياسىنىڭ قولداۋىمەن قازاقستان گيوتە-ينستيتۋتىنىڭ بازاسىندا جاسالعان بۇل جوبا تورتكۇل دۇنيە كوز تىگىپ وتىرعان ەكسپو كورمەسىنىڭ قۇرمەتىنە ارنالىپتى.
جوبانىڭ ماقساتى – استانا قالاسىنداعى وقۋشىلار مەن ستۋدەنتتەرگە «بولاشاق ەنەرگياسى» تاقىرىبىنىڭ وزەكتىلىگىن ويىن تۇرىندە جەتكىزۋ. ويىن بارىسىنداعى تاپسىرمالار جاستارعا قورشاعان ورتانى قورعاۋعا جانە وعان قۇرمەتپەن قاراۋعا يتەرمەلەيدى. ويىنشىلار ويىن بارىسىندا سيقىرلى وزەنگە قايتادان ءومىر سىيلاۋعا ۇمتىلادى. وسى ماقساتتا سيقىرلى ەنەرگيا بولشەكتەرىن ىزدەۋى ءتيىس. بۇل كەز كەلگەن ادامدى ءبىر ساتكە بولسا دا تابيعاتپەن ۇندەستىرە الادى» دەيدى «قالا بۇرىشتارى» جوباسىنىڭ جەتەكشىسى يرينا حەچ.
ويىن جەلىسى بويىنشا حان ءتاڭىرىنىڭ باۋرايىندا تۇراتىن اتا-اجەلەرىنە كەزەكتى دەمالىسقا بارعان اعايىندى تالعات پەن دينا ەسىمدى ەكى بالا بەس ءتۇرلى نىشان تاڭبالانعان ءبىر تاس تاۋىپ الادى. بۇل زاتتىڭ ءمانىن سۇراعان نەمەرەلەرىنە اتاسى مەن اجەسى سيقىرلى وزەن مەن ونىڭ قاراۋىلدارى تۋرالى حيكايانى بايانداپ بەرەدى. ولاردىڭ ايتۋى بويىنشا, استانا شاھارىنىڭ ورنىندا بۇرىندارى وت, سۋ, جەل, جەر جانە ۋاقىت پەن بولاشاق اتتى بەس ءتۇرلى ەنەرگيادان تۇراتىن ءبىر سيقىرلى وزەن بولعان ەكەن. ول ەنەرگيالاردىڭ ارقايسىسى بەلگىلى ءبىر قاراۋىلدار توبىنىڭ قامقورلىعىندا بولاتىن. بىردە بەلگىسىز ءبىر سەبەپتەن قاراۋىلدار عايىپ بولادى. تەپە-تەڭدىگىنەن ايىرىلعان وزەن سۋى تارتىلىپ, قۇرعاپ قالىپتى. وزەندى قايتا قالپىنا كەلتىرۋ ءۇشىن قاراۋىلداردى تابۋ كەرەك ەكەن. وسى اڭگىمە قاتتى اسەر ەتكەن تالعات پەن دينا جولعا شىعادى. ويىنشىلار ويىن بارىسىندا ەكەۋىنە قاراۋىلداردى تابۋعا كومەكتەسەدى.
وسى جىلدىڭ قىركۇيەك ايىنىڭ سوڭىنان باستاپ ىسكە قوسىلاتىن بۇل ويىندى Google Play جانە iTunes قوسىمشاسىنان قازاق, نەمىس, اعىلشىن, جانە ورىس تىلدەرىندە اقىسىز جۇكتەپ الۋعا بولادى.
بۇركىت نۇراسىل
