كەشە «قازاق ەلى» مونۋمەنتى الاڭىندا استانا قالاسىنىڭ اكىمى يمانعالي تاسماعامبەتوۆ ۇلتتىق بىرىڭعاي تەستىلەۋ بارىسىندا ءوز بىلىمدەرىن دالەلدەي العان 71 ەلوردالىق تۇلەككە سالتاناتتى تۇردە «التىن بەلگى» تابىس ەتتى.
بۇل مەرەيلى كۇن – اتا-انالار مەن ۇستازداردىڭ تالاي جىلعى ەڭبەگىنىڭ جەمىسى. كوڭىلدەرى الىپ-ۇشىپ تۇرعان تۇلەكتەردىڭ بالالىقپەن قوش ايتىسىپ, ۇلكەن ومىرگە قادام باساتىن ءساتى. تالابى مەن تالانتى, ءبىلىمى مەن بىلىگى تەڭ تۇسكەن, باعى مەن بابى قاتار شاپقان ۇزدىكتەردىڭ توعىز جولدىڭ تورابىندا تۇرىپ, ءوز باعىتتارىن تاڭدايتىن ايشىقتى مەزەت. سوندىقتان دا ەلوردا باسشىلىعى تاراپىنان «التىن بەلگى» يەگەرلەرىمەن ءوز قۋانىشىن ءبولىسىپ, ولارعا اق جول تىلەيتىن قۇرمەتتى مەيماندار از جينالعان جوق.
«ءبىلىم بەرۋ – قاشان دا اتا-انانىڭ بالا الدىنداعى قاستەرلى قارىزى, تۇتاس قوعامنىڭ ۇرپاق الدىنداعى قاسيەتتى پارىزى. ال, ءبىلىم الۋ – ەرتەڭىنىڭ ەڭسەلى بولعانىن قالايتىن قاي جاننىڭ دا جۇرەككە تۇيگەن بورىشى. دەسە دە, بۇل ومىردە ءبىلىمدى دە جالىندى جاستى بيىككە جەتەلەيتىن ۇلى قۇدىرەت بار. ول – ارمان. ارمانسىز ادام جوق. بىزدەردىڭ – ۇستازدار مەن اتا-انالاردىڭ ارمانى – ۇل-قىزدارىمىزدىڭ ازامات اتانىپ, تۋعان ەلدىڭ ابىرويى عانا ەمەس, كۇللى ادامزاتتىڭ اقىل-ويى بولعانىن كورۋ. سىزدەردىڭ – جاس تۇلەكتەردىڭ ارمانى – بەرەكەلى دە باياندى باق, مازمۇندى دا ماعىنالى بولاشاق. ونىڭ ءوزى – تۇزى جەڭىلگە ەمەس, تۇعىرى بيىك, تالابى كەڭگە, ءبىلىمى تەرەڭ, ەڭبەگى كوپكە عانا بۇيىراتىن دۇنيە. ول ءۇشىن ءىلىم مەن ءبىلىم جولىنداعى تىنىمسىز تالپىنىس پەن ۇزدىكسىز ىزدەنىس قاجەت. بۇل ءبىزدىڭ بۇگىنگىدەي جاڭالىعى جەلمەن جارىسقان, وي-ءورىسى عارىشپەن تالاسقان زاڭعار زاماننىڭ باستى ءارى بىرەگەي تالابى» دەدى يمانعالي نۇرعاليۇلى.
شارا سوڭىندا ۇبت-دان 123 بالل جيناپ, الدىڭعى ورىنعا شىققان ەلوردالىق №46 مەكتەپ-ليتسەي وقۋشىسى الەكساندرا شالاگاەۆا مەن №54 مەكتەپ-ليتسەي وقۋشىسى لاۋرا جاۋحانوۆا باستاعان ۇزدىك وقۋشىلار قالا باسشىسىمەن ەستەلىك سۋرەتكە ءتۇستى. ودان كەيىن تۇلەكتەردىڭ ءداستۇرلى ءۆالسى باستالىپ, ارتى كونتسەرتتىك باعدارلاماعا ۇلاستى.
ەركەعالي بەيسەنوۆ
