بۇگىن استانا ىرگەسىندەگى اقمول اۋىلىنداعى ساياسي قۋعىن-سۇرگىن جانە توتاليتاريزم قۇرباندارىنا ارنالعان «الجير» مۇراجاي-مەموريالدىق كەشەنىندە ارنايى شارا بولىپ ءوتتى. ساياسي قۋعىن-سۇرگىن قۇرباندارىن ەسكە الۋ كۇنىنە وراي ۇيىمداستىرىلعان قارالى جيىنعا قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا, استانا قالاسى اكىمىنىڭ ورىنباسارى ەرمەك امانشاەۆ باستاعان قوناقتار قاتىسىپ, گۇل شوقتارىن قويدى.
ءىس-شاراعا سونداي-اق, مەملەكەتتىك ورگانداردىڭ وكىلدەرى, ءماسليحات دەپۋتاتتارى, قوعام قايراتكەرلەرى, «الجير» دەگەن اتاۋمەن بەلگىلى بولعان ازاپ لاگەرىندە تۇتقىندا بولعانداردىڭ ۇرپاقتارى, سونداي-اق ەلوردا تۇرعىندارى قاتىستى. قارالى جيىندا ءسوز العان مەملەكەتتىك حاتشى تاريحىمىزداعى ول وقيعالاردىڭ ەشقاشان ۇمىتىلمايتىنىن جانە ەندى مۇنداي قاسىرەتتىڭ قايتالانۋىنا جول بەرىلمەيتىنىن ايتتى. «1921-1954 جىلدارى 3,7 ملن-نان استام ادام سوتتالعانىن, ونىڭ 640 مىڭنان استامى اتىلعانىن, سونىڭ ىشىندە ساكەن سەيفۋللين, ءىلياس جانسۇگىروۆ, بەيىمبەت مايلين سياقتى قازاقستاننىڭ زيالى قاۋىم وكىلدەرى, كەڭەس حالىق كوميسسارياتى باسشىلارى, وبلىستىق پارتيا كوميتەتى حاتشىلارى, وبلىستىق اتقارۋ كوميتەتتەرىنىڭ توراعالارى سەكىلدى مەملەكەتتىك قايراتكەرلەرى بولعانىن ەشقاشان ۇمىتپايمىز» دەپ اتاپ ءوتتى.
بۇركىت نۇراسىل
