ءۇشىنشى سابيىممەن پەرزەنتحانادا جاتقان ەدىم. ءبىزدى فليۋروگرافياعا تۇسىرۋگە اكەتتى دە, وندا كەزەك كۇتىپ, كوپ تۇرىپ قالدىق. تۋعانىنا ءبىر-اق كۇن بولعان ءسابيىمدى ويلاپ, الاڭداي باستادىم.
– ءبىرىنشى بالاڭىز با؟ – دەدى ءبىر كەلىنشەك.
– جوق, ءۇشىنشى بالام.
انا كەلىنشەك جاقتىرماي سويلەدى:
– ءبىرىنشى بالاڭىز قۇساپ ۋايىمداپ تۇرسىز عوي…
سودان بەرى ءتورت-بەس جىل ءوتىپتى.
ودان كەيىن دە پەرزەنتحانادا جاتتىم. تاعى ءبىر توعىز اي ون كۇن كۇتتىرگەن پەرىشتە ءسابيىمدى قولىما الىپ, پاكتىكتىڭ يىسىنە ەمىرەندىم…
بىراق, الگى اڭگىمە ويىمنان كەتەر بولمادى.
ءبىز شىنىمەن ءبىرىنشى بالامىزدى عانا جاقسى كورىپ, ءبىرىنشى بالامىزعا عانا مەيىرلەنەمىز بە؟ بالا اتا-انا ماحابباتىن, قامقورلىعىن سەزىنۋ ءۇشىن مىندەتتى تۇردە تۇڭعىش نەمەسە جالعىز بولۋى كەرەك پە؟..
ءبىرىنشى بالا قامقورسىز بولىپ دۇنيەگە كەلەدى دە, ودان كەيىنگىلەر سالقىنقاندى قارىم-قاتىناسقا دايىن بولىپ تۋا ما ەكەن؟..
ال ءوز قۇرساعىنان تۋعان بالالارىنا ماحابباتىن جەتكىزە الماعان انالاردى اللا, ءتىپتى, كەيىن ءسابيدىڭ ءوزى كەشىرە الا ما؟..
جوق. مەنىڭشە, بالاڭدى جاقسى كورۋ ءۇشىن ونىڭ جالعىزىڭ بولۋى مىندەتتى ەمەس.
وت تامىزىق الىپ, تۇتاتقان سايىن لاۋلاپ جانا تۇسەدى. انا ماحابباتى دا سونداي. سونبەيدى.
ءنازيرا سايلاۋقىزى
