«اتامەكەن» قازاقستان كارتاسى» ەتنو-مەموريالدىق كەشەنىندە «رۋحاني جاڭعىرۋ» باعدارلاماسى اياسىندا حالىق كومپوزيتورى ءبىرجان سال قوجاعۇلۇلىنىڭ 185 جىلدىعىنا ارنالعان «ءانىڭنىڭ ادام جەتپەس بۇرماسىنا» اتتى ادەبي-سازدى كەش ءوتتى.
كەش اتاۋى ايتىس ونەرىنىڭ وزىق ۇلگىلەرىنىڭ ءبىرى – ءبىرجان مەن سارانىڭ ايتىسىنان الىندى. وندا سارا ءبىرجاننىڭ اۋەنىن جەز سىرنايدىڭ كومەيىنە تەڭەپ, سالعا وسى ولەڭ جولىن ايتادى. حالقىمىزدىڭ جەزتاڭداي ءانشىسى جانىبەك كارمەنوۆتىڭ وسى اتتاس كىتابى دا بار. بۇل ەڭبەكتى ول ءوزىنىڭ ۇستازى جۇسىپبەك ەلەبەكوۆكە ارناعان. شارا تىزگىنىن ۇستاعان ءانشى, ونەر زەرتتەۋشى, قازاقستاننىڭ ەڭبەك سىڭىرگەن ءارتىسى سەرىك وسپانوۆ وسىنى ايتىپ, حالىق كومپوزيتورىنىڭ ءومىرى مەن شىعارماشىلىعىنا توقتالدى.
– ءبىرجاننىڭ تۋعان جىلىنا قاتىستى ءارتۇرلى دەرەكتەر كەزدەسەدى. اتاقتى كومپوزيتور, قازاقستاننىڭ ەڭبەك ەرى, پروفەسسور ەركەعالي راحماديەۆ «ءبىرجان 1831 جىلى تۋىپ, 1897 جىلى 66-عا قاراعان شاعىندا, ءبىر-اق جىل اۋىرىپ قايتىس بولعان» دەگەن ۇلكەن مۋزىكالىق ەنتسيكلوپەديا كىتابىنان الىنعان دەرەكتى العا تارتادى. بايعابىل جىلقىباەۆ ورىنداعان «تەمىرتاس» ءانىنىڭ نۇسقاسىنداعى «سەن ەدىڭ الدىمداعى شامشىراعىم, مەنىڭ دە 65-كە كەلدى جاسىم. ويلاسام اۋرۋىمنىڭ ءتۇرى جامان, ءبىرجاننىڭ كىم ۇستار دەپ دومبىراسىن؟!» دەپ كەلەتىن ولەڭ جولدارىن دالەلگە كەلتىرەدى, – دەيدى ءانشى.
ونىڭ ايتۋىنشا, وسى «تەمىرتاس» ءانى ءومىرىنىڭ سوڭعى جىلى شىققان. بۇل ءان تاريحىن تارقاتقان ونەر زەرتتەۋشى سونىمەن قاتار «اقتەنتەك», «جالعىز ارشا», «ايبوزىم» اندەرى قالاي شىققانىن اڭگىمەلەپ, اۋەلەتە ءان سالدى. ءبىرجان سال مەن ۇلى ابايدىڭ كەزدەسۋى تۋرالى ءسوز
ساباقتاپ, «سىزدەي ورىنداۋشى ەندى تۋار ما ەكەن؟!» دەپ ءبىرجاننىڭ ونەرىنە حاكىمنىڭ تامسانعانىن ەسكە الدى.
