ەلوردادا تۇرعىندار ءۇشىن ماڭىزدى مىندەتتەردى قامتيتىن «20 ناقتى باستاما» قولعا الىندى. سونىڭ 16-قادامى «جول اپاتى كەزىندەگى كىسى ءولىمىن 30 پايىزعا, اپاتتىق جاعدايدى 40 پايىزعا تومەندەتۋدى كوزدەيدى. ول بويىنشا جول قوزعالىسى سىزباسىن ءوزگەرتۋ, ايىپپۇل جۇيەسىن وڭتايلاندىرۋ, جەكە اۆتوكولىكتى پايدالانۋ قارقىنىن جانە اپاتتى جاعداي تۋدىراتىن ورىنداردىڭ جىلدامدىق قوزعالىسىن تومەندەتۋ قاراستىرىلعان.
ەستەرىڭىزدە بولسا, استانا اگلومەراتسياسىنىڭ ورنىقتى دامۋى جونىندەگى كەڭەس وتىرىسىندا 15 جوبا تانىستىرىلعان بولاتىن. سونىڭ ءبىرى – «قاۋىپسىز كولىك» جوباسى. «جالپى جول» قاۋىپسىز جول قوزعالىسى قاۋىمداستىعى ۇسىنعان جوبا بيلىكتىڭ نازارىن اۋدارا وتىرىپ, جولداعى قاۋىپسىزدىكتى ارتتىرۋدى كوزدەيدى.
ايتا كەتەيىك, ارسەن شاكۋوۆ باسقاراتىن ۇيىم 2013 جىلى قۇرىلعان. سودان بەرى ەلىمىزدىڭ ءاربىر وڭىرىندە وتەتىن جول قوزعالىسىنا قاتىستى بارلىق ماسەلەلەردىڭ بەل ورتاسىنان تابىلىپ ءجۇر.
Safety Car Astana
بۇل ارناۋلى اۆتوكولىك جول قوزعالىسى قاۋىپسىزدىگىن مونيتورينگ جۇرگىزۋ ارقىلى قاداعالايدى, جولداعى قۇقىقبۇزۋشىلىقتى انىقتاپ, قالا ىشىندەگى قاۋىپتى كوشەلەرگە تالداۋ جۇرگىزەدى. باعدارلاما اياسىندا كولىك جۇرگىزۋشىلەرىنىڭ مادەنيەتىن كوتەرۋگە نازار اۋدارىلىپ وتىر. ارسەن شاكۋوۆتىڭ ايتۋىنشا, قاۋىپسىز جانە تۇراقتى كولىك ينفراقۇرىلىمىن دامىتۋدا ءارى ەكولوگيالىق احۋالدى جاقسارتۋدا ءاربىر تۇرعىننىڭ قوعامدىق كولىكتەردى پايدالانعانى ءتيىمدى.
ارسەن شاكۋوۆ, «قاۋىپسىز كولىك» جوباسىنىڭ جەتەكشىسى: – ءبىز ۇسىنعان جوبا استانا قالاسى بويىنشا جول قوزعالىسى ماسەلەلەرىن زەرتتەۋگە مۇمكىندىك بەرەدى. وندا بارلىق باعىت بويىنشا جول-كولىك ەرەجەسىن باقىلاۋ قولعا الىنادى. ءبىزدىڭ ماقسات – جول-كولىك قوزعالىسى ەرەجەسىنىڭ بۇزىلۋىن انىقتاۋ جانە وسى ماسەلەنى تۇبەگەيلى شەشۋدىڭ جولىن قاراستىرۋ بويىنشا قالا اكىمدىگىنە ۇسىنىستار بەرۋ.
قاراڭعىدا كورىن!
سوڭعى ۋاقىتتا بالالاردىڭ قاتىسۋىمەن بولاتىن جول-كولىك اپاتتارى ءجيى تىركەلەدى. رەسمي دەرەكتەر جول-كولىك وقيعاسى كەزىندە كوبىندە زارداپ شەگەتىن جاس بالالار ەكەنىن ايتادى. بۇل جوبا اياسىندا وسى ماسەلەلەردى شەشۋدىڭ جولدارى قاراستىرىلعان. ماسەلەن,
«مەكتەپكە قاراي قاۋىپسىز جول» جانە «ۇيگە قاراي قاۋىپسىز جول» دەپ اتالاتىن جوبالاردا بالالاردىڭ ۇيدەن مەكتەپكە, مەكتەپتەن ۇيگە قايتۋى كەزىندە ولاردىڭ قاۋىپسىزدىگىنە تىكەلەي كوڭىل بولىنبەك. ول بويىنشا ءاربىر مەكتەپتىڭ قاۋىپسىزدىك پاسپورتى جاساقتالادى.
سونداي-اق, جاياۋ جۇرگىنشىلەر جولىنداعى قاۋىپسىزدىكتى شەشۋدىڭ ءبىر جولى – بالالاردى جارىعى بار ءبىلەزىكپەن قامتاماسىز ەتۋ. بارلىق قارجىلىق ينستيتۋتتاردى, ساقتاندىرۋشى كومپانيالار مەن باسقا دا ۇيىمداردى وسى الەۋمەتتىك جوباعا تارتا وتىرىپ, جارىعى بار ءبىلەزىكتەردى استانا قالاسىنىڭ وقۋشىلارىنا تەگىن تاراتۋدى ۇيىمداستىرۋ قولعا الىنباق.
Educations Pack
بۇل – مەكتەپكە دەيىنگى جانە مەكتەپ جاسىنداعى بالالارعا ارنالعان جوبا.
«جول قوزعالىسى ەرەجەلەرىن ۇيرەتۋ مەن وقىتۋدىڭ جاڭا ءادىستەمەسىن قامتيدى. كولىك قاۋىپسىزدىگىن تۇراقتى دامىتۋ – سالاۋاتتى ءومىر سالتىنىڭ كەپىلى. وسى ورايدا «Kiss and Go» جوباسى دا قولعا الىنباق. وقۋشىلاردى اۆتوبۋسقا وتىرعىزۋ جانە ءتۇسىرۋ كەزىندەگى قاۋىپسىزدىككە نازار اۋدارامىز» دەيدى ارسەن شاكۋوۆ.
سونىمەن قاتار, ەلوردالىق پوليتسەيلەرمەن تىكەلەي قارىمقاتىناس جولعا قويىلىپ, ولاردىڭ قاتىسۋىمەن ساۋاتتىلىقتى ارتتىراتىن سەمينارلار ۇيىمداستىرۋ, اپات كەزىندە العاشقى كومەك كورسەتۋ جولدارىن مەڭگەرتۋ جۇزەگە اساتىن بولادى.
سايىپ كەلگەندە, مۇنىڭ ءبارى استانا ستراتەگياسىمەن ۇندەسەدى. قالا تۇرعىندارىنىڭ قاۋىپسىزدىگى – بيلىكتىڭ نازارىندا. ەندەشە, وسىنداي الەۋمەتتىك جوبالاردىڭ جۇزەگە اسۋى ناتيجەسىن بەرەدى دەيدى سالا ماماندارى.
گۇلميرا ايماعانبەت
