اق وليمپياداعا ارنالدى
كەشە 7-23 اقپان ارالىعىندا سوچيدە وتەتىن 22-ءىنشى قىسقى وليمپيادا ويىندارىنا بايلانىستى قر سپورت جانە دەنە شىنىقتىرۋ ىستەرى اگەنتتىگىنىڭ توراعاسى تاستانبەك ەسەنتاەۆ ورتالىق كوممۋنيكاتسيالار قىزمەتىندە باق وكىلدەرىمەن كەزدەسۋ وتكىزىپ, سپورتشىلارىمىزدىڭ دايىندىعى توڭىرەگىندە از-كەم ماعلۇمات بەردى.
ول 2012-2013 جىلدارى ۇلتتىق قۇراماداعى سپورتشىلاردىڭ 193 وقۋ-جاتتىعۋ جيىنىنا قاتىسىپ, الەم كۋبوگى, الەم جانە ازيا بىرىنشىلىگى, سونداي-اق نەشە ءتۇرلى حالىقارالىق دارەجەدەگى رەيتينگتىك 175 جارىستا جاقسى ناتيجەگە قول جەتكىزگەنىن ايتتى.
– ءبىز الداعى سوچي وليمپياداسىندا ەرلەر اراسىندا سىنعا تۇسەتىن شاڭعىشىلارىمىزعا, فريستايلدان ەرلەر جانە ايەلدەر قۇرامالارىنا, سونداي-اق دەنيس كۋزين, دەنيس تەن سياقتى سپورتشىلارىمىزعا كوبىرەك سەنىم ارتامىز. ۆانكۋۆەر وليمپياداسىندا قازاقستان 64-ءىنشى ورىندا بولسا, ال بيىل ءتورت سپورتشىمىز الەم بىرىنشىلىگىندە جۇلدەگەر اتانىپ, قورىتىندىسىندا 19-ورىنعا تابان تىرەدىك. ەندى ءبىز الداعى اق وليمپيادادان كەم دەگەندە ەكى جۇلدە مەن جالپى ەسەپتە 20-23 ورىنداردى كوزدەپ وتىرمىز, – دەدى اگەنتتىك توراعاسى.
جالپى العاندا, 908 مەدال ساراپقا سالىناتىن سوچي وليمپياداسىنا الەمنىڭ سەكسەن شاقتى مەملەكەتىنەن 5000-نان اسا سپورتشى جينالادى دەپ كۇتىلۋدە. تاستانبەك قۇتجانۇلىنىڭ ايتۋىنشا, اق ويىندار جولداماسىنىڭ باسىم بولىگىنە شىعىس قازاقستان, اقمولا, پاۆلودار, باتىس قازاقستان, اقتوبە, قاراعاندى وبلىستارى جانە الماتى قالاسىنىڭ اتلەتتەرى يە بولىپ وتىر.
– وليمپياداداعى كورسەتكىشىنە بايلانىستى سپورتشىلارعا شامامەن 700-6000 اقش دوللارى كولەمى ارالىعىندا ايلىق جالاقى تاعايىندالاتىن بولادى. قۇرامانىڭ دايىندىعى ءۇشىن سپورتتىڭ سەگىز تۇرىنەن 17 شەتەلدىك مامان كەلىسىممەن جۇمىس ىستەۋدە. ولاردىڭ اراسىندا جاقسى جەتىستىككە جەتكىزىپ ۇلگەرگەندەرى دە بار. دەگەنمەن, ءبىزدىڭ سپورتشىلاردىڭ اراسىندا شەتەلدىك لەگيونەرلەر جوق. حرۋستالەۆاعا كەلسەك, ول بىزگە بۇرىن, ياعني, وتكەن وليمپيادا مەزگىلىندە كەلگەن بولاتىن, – دەگەن تاستانبەك ەسەنتاەۆ وليمپياداعا جانكۇيەرلەر الىپ بارۋ ماسەلەسىن دە قاراستىرىپ جاتقانى تۋرالى جانە بۇقارانى تىكەلەي سپورتتىق اقپاراتپەن قامتاماسىز ەتۋ ءۇشىن بىرنەشە ءتىلشىنى ەرتە كەتۋدى كوزدەپ وتىرعانىن ايتتى. اگەنتتىك توراعاسى كەزدەسۋ سوڭىندا تىلشىلەردىڭ سۇراقتارىنا جاۋاپ بەردى.
ءتورت جىلدا اينالىپ ءبىر سوعاتىن وليمپيادا ويىندارىنا نەبارى ەلۋ شاقتى كۇن قالعانىن ەسكەرسەك, ءبىزدىڭ كوماندانىڭ ءار مۇشەسى ءوز دايىندىقتارىن قازىردەن باستاپ تىڭعىلىقتى ارتتىرۋ كەرەك.