بوداندىق زامانىن دا باستان كەشىرگەن ۇلى دالا ەلى ءۇشىن ازاتتىق ءسوزىنىڭ ءمانى اسا قۇندى. اسقاق ارمانىنا بالاعان تاۋەلسىزدىككە قول جەتكىزگەن شاقتا بابالار اماناتىنا ادالدىق تۋرالى ءسوز قوزعاعانىمىزعا دا وسى سەبەپ بولسا كەرەك. ەلدىگىمىزدىڭ اسقارالى اسۋى – تاۋەلسىزدىكتىڭ 30 جىلدىعى, تاريحي تۇرعىدان باعامداعاندا, ءبىر-اق ءسات بولىپ كورىنۋى دە مۇمكىن. الايدا داڭقى ءدۇيىم ەلگە جەتكەن ەجەلگى قازاق مەملەكەتى قالىپتاسقاننان بەرگى ۋاقىت ىشىندە تالاي رەت زامانا تەپەرىشىن كورسە دە, اتا-بابالارىمىز ەرتەڭگى كۇنىنىڭ جارقىن بولارىنا اق ادال نيەتىمەن يلاندى. مامىراجاي كۇننىڭ تۋارىن سەزىپ, ۇرپاعىنىڭ بوداۋدا بولماۋى جولىندا جانىن قۇربان ەتتى. سول ارمان الدامادى. ارادا تالاي جىلدار جىلجىپ ءوتىپ, داۋىرلەر الماسقان شاقتا قازاق ەلىنىڭ تاۋەلسىزدىك تاڭى اتتى. سودان بەرى ءۇش ون جىلدىق ءوتتى. ۋاقىتتى ۋىسىڭدا ۇستاپ تۇرا الماسىڭ انىق. كەرۋەن كوشتىڭ سوڭىنا ىلەسۋ, ەلدى دامىتۋ, سول ارقىلى تاۋەلسىزدىكتى تۇعىرلى ەتۋ – ءسىز بەن بىزگە ارتىلعان ابىرويلى مىندەت.
سەنىم مەن رۋح
قازاق – رۋحتى حالىق. داتكە قۋات دارىتار ۇستانىمىن بويىنداعى رۋحپەن استاستىرعانى دا ۇلت تۇتاستىعىنىڭ, ايقىن ماقساتقا جەتۋىنىڭ كەپىلى بولعانى ءسوزسىز. ەگەمەن ەلىمىز ءۇشىن تاۋەلسىزدىكتىڭ قالىپتاسۋ جىلدارىن وتكەرۋ وڭايعا سوقپاعانى انىق. سان جىلدار بويعى كەڭەستىك سوقپاقتىڭ سەڭى بۇزىلىپ, تۇتاس قۇرىلىمدىق جۇيە وزگەردى. قاراپايىم تىرلىك كەشۋ ءۇشىن قولايلى جاعدايلاردىڭ جاسالماۋى, جالاقى جوق, جۇمىس كوزى تاپشى, سورەلەر قاڭىراپ, ازىق-تۇلىكتەن تارىققان شاقتا دا حالىق الداعى كۇننەن كۇدەر ۇزبەدى. جاس مەملەكەتتىڭ تىزگىنىن ۇستاپ, تاعدىرشەشتى تاڭداۋلار جاساۋعا ءماجبۇر بولعان, تىعىرىقتان شىعار جول ىزدەگەن ەلباسىنا سەنىم ارتىپ, سوڭىنان ەردى. ونىڭ ۇستىنە الەمدىك كارتاداعى ورنىن ايشىقتاعان, ۇلانعايىر جەرى بار ەلىمىزگە جان-جاقتان انتالاعان جات پەيىلدىلەردىڭ, اڭدىسىن اڭدىپ, جاس مەملەكەتتىڭ اياق الىسىن سىرتتان باعامداپ وتىرعاندار دا بولعانى اششى اقيقات-تى.
تۇڭعىش پرەزيدەنت – ەلباسىنىڭ تاياۋدا عانا جارىققا شىققان «تاۋەلسىزدىك تاعىلىمى» جازباسى – جۇرەكتەن شىققان, جۇرەكتەرگە جەتكەن شىنايى ماقالا. جوعارىدا اتالعان كەزدەگى قيىندىقتاردىڭ بەل ورتاسىندا جۇرگەندىكتەن ءار تاريحي ءساتتى قاز-قالپىندا كوز الدىڭا اكەلەتىنىمەن دە قۇندى. «ادامزات تاريحىنداعى ەڭ ايتۋلى وقيعالارعا تولى عاسىرلار توعىسىندا ەلىمىزدى باسقارۋ ماعان ۇلكەن سەنىممەن قاتار زور جاۋاپكەرشىلىك جۇكتەدى. مەن ءوزىم باسشىلىق ەتكەن وتىز جىلعا جۋىق ۋاقىت بويىنا تۋعان حالقىمنىڭ سەنىمىن اقتاۋ ءۇشىن بار كۇش-جىگەرىمدى ايانباي جۇمسادىم». مىنە, بۇل – ەش قوسپاسىز, ەلباسى ەڭبەگىنىڭ شىنايى باعاسى. راسىندا دا, ەل باسقارۋ, تىڭنان تۇرەن سالىپ, تۇرالاپ قالعان ەلدى قۋاتتى مەملەكەتكە اينالدىرۋ, ەل يگىلىگىنە قاجەتتى زاماناۋي جەتىستىكتەردى مەڭگەرىپ, قولدانىسقا ەنگىزۋ – جازۋعا عانا وڭاي باستامالار. ونىڭ استارىندا تالاي كۇن مەن تۇنگە ۇلاسقان ەسەلى ەڭبەك جاتقانى داۋسىز.
توقسانىنشى جىلدارداعى ەلدەگى احۋالدى كوزبەن كورىپ قانا قويماي, جاڭا جۇيەگە ساي جۇمىستار جۇرگىزىپ, ۇيىمداستىرۋ سالاسىندا ەڭبەك ەتكەندىكتەن, سول شاقتا قيىندىقتاردى ءبىر كىسىدەي بىلەمىن. جوقشىلىق, ماردىمسىز ەلەكتر قۋاتى, ءىرى قالالارعا عانا تيەسىلى كوگىلدىر وتىن, ساپاسىز بايلانىس. ءبىز كورگەن كارتينا وسىنداي. قازىرگىنىڭ بالاسىنا ايتساڭ, قۇددى ەرتەگى تىڭداعانداي اسەردە بولاتىنى شىن. وسىناۋ كەزەڭدى ارتقا تاستاپ, قازىرگىدەي قۋاتى مول, جەتىستىگى زور ەلگە اينالعانىمىز, ءسوزسىز, تاۋەلسىزدىكتىڭ جەمىسى.
ەلباسى مەن ەگەمەندىك – ەگىز ۇعىم
باسقاشا بولۋى مۇمكىن ەمەس. ويتكەنى ۇلت كوشباسشىسىنىڭ قوسقان ۇلەسى وراسان. ۋاقىت كوشى ىلگەرىلەگەن سايىن تۇڭعىش پرەزيدەنتتىڭ سىڭىرگەن ەڭبەگى ايقىندالا تۇسەتىنى دە انىق. تۇتاس ۇلتتى ەرتەڭگى كۇنگە جەتەلەپ, باتىل باستامالاردى جۇزەگە اسىرعانى, الەمدىك دەڭگەيدەگى شەشىمدەر شىعارعانى ەل جادىندا. سول ءبىر ساتتەردە ەلباسىنىڭ كوزدەگەنى ءبىر-اق ماقسات, ءبىر-اق مۇددە – قازاق ەلىنىڭ ىلگەرىلەۋى.
ال العا قاراي الشاڭ باسىپ, ەركىن قيمىلداۋى ءۇشىن, ارينە, حالىق سەنىمى قاجەت. «ماعان باتىلىراق قيمىلداۋ ءۇشىن بۇكىلحالىقتىق ماندات كەرەك ەدى. وسىلايشا, 1991 جىلدىڭ 1 جەلتوقسانىندا ەل تاريحىنداعى تۇڭعىش پرەزيدەنتتىك سايلاۋ وتكىزىلىپ, وندا حالىقتىڭ 98%-دان استامى قولداۋ ءبىلدىردى. بۇل ماعان قانات ءبىتىرىپ, ەركىن قيمىلداۋىما جول اشتى». بۇل – ەلباسىنىڭ ءسوزى. الىپ-قوسارى جوق اقيقات. حالىق سەندى, ەل سەنىمى اقتالدى. سوزگە بەرىك, انتقا ادال حالىقتىڭ ۇرپاعى بولعاندىقتان, بۇل جاۋاپكەرشىلىكتىڭ دە جەڭىل جۇك ەمەستىگىن ءوزىڭىز-اق باعامدارىڭىز حاق.
وسىلايشا ەل سەنىمىنەن شىعۋ جولىندا ۇلت كوشباسشىسى تالاي ىرگەلى ىستەرگە ۇيىتقى بولىپ, ەل مۇددەسى جولىنداعى ەسەلى ەڭبەگىن كوز ىلەسپەس جىلدامدىقپەن جۇزەگە اسىرا باستادى. مەملەكەتتىك رامىزدەر بەكىتىلىپ, ءتول تەڭگەمىز اينالىسقا ەندى. قارۋلى كۇشتەر قۇرىلىپ, قانداستار اتاجۇرتقا ات باسىن بۇردى. شەكارامىز بەكىتىلىپ, اتا زاڭىمىز قابىلداندى. كوپۇلتتى قازاقستاننىڭ وزىندىك سوقپاعى قالىپتاسىپ, قازاقستان حالقى اسسامبلەياسى سىندى تەڭدەسسىز ينستيتۋت قۇرىلدى. يادرولىق قارۋدان باس تارتقان ەل رەتىندە جاھاندىق بەيبىتشىلىكتى قولداعان ۇستانىمى الەمگە تارادى. «ىنتىماعى جاراسقان ەلدىڭ تابىسى تاسىپ, ابىرويى اسادى. بەرەكەسى قاشقان ەلدىڭ قۋاتى كەمىپ, قۇتى قاشادى. وتىز جىل ىشىندە ءبىز عاسىرلارعا بەرگىسىز دامۋ جولىنان وتتىك. اۋىز تولتىرىپ ايتار تابىستارىمىز دا از ەمەس» دەيدى ەلباسى. راسىندا دا, جەتىستىكتەردى ساناپ تاۋىسا الماسىمىز انىق. «قازاقستان-2030», «قازاقستان-2050» باعدارلامالارى – الەمدىك ساياساتكەرلەر مەن ساراپشىلار تاراپىنان «قازاقستان جولى» دەگەن جوعارى باعاعا يە بولعان, ۇلت دامۋىنىڭ داڭعىل جولىنىڭ وزەگىنە اينالعان قوس ستراتەگيا. ءار تاراۋ, تارماعىندا ەلدىك مۇددەنى كوزدەگەن قۇندى قۇجاتتاردى ىسكە اسىرۋ اياسىندا دا ىرگەلى باستامالار ءساتتى, ناتيجەلى جوبالار جۇزەگە استى.
ىرگەلى ىستەر ۇيىتقىسى – Nur Otan
«وسى جىلدار ىشىندە قالىپتاسقان كوپپارتيالىق جۇيە ەلدىگىمىزدىڭ تىرەگىنە اينالدى. بۇل ورايدا Nur Otan پارتياسىنىڭ ساياسي سالماعى باسىم ەكەنى انىق». بيلەۋشى پارتيانىڭ ساياسي كەڭەسىنىڭ كەڭەيتىلگەن وتىرىسىنداعى سوزىندە ەلباسى وسىلاي دەپ اتاپ ءوتتى. راسىندا دا, تاۋەلسىزدىك جىلدارى ىشىندە ەلدەگى پارتيالىق-ساياسي جۇيە بىرتىندەپ, جان-جاقتى سارالانعان تۇردە ساتىلاپ دامىدى.
بۇل باستاما دا ۇلكەن دايىندىقتىڭ ناتيجەسىندە جۇزەگە استى. «جۇيەسىز رەفورمالار حالىقتىڭ دەموكراتياعا دەگەن سەنىمىن جوعالتىپ, ءتۇرلى شيەلەنىستەر تۋدىرعان جانە تەرريتوريادان ايىرعان جاعدايلار تاريحتا از ەمەس. تاۋەلسىزدىكتى ساقتاۋ جانە مەملەكەتتىلىكتى نىعايتۋ – ءبىزدىڭ بولاشاق ۇرپاق الدىنداعى پارىزىمىز. سوندىقتان Nur Otan پارتياسى تۇراقتىلىق پەن تاتۋلىققا, الەۋمەتتىك-ەكونوميكالىق پراگماتيزمگە, ورنىقتى دامۋعا نەگىزدەلگەن جانە تۇتاس قوعامنىڭ مۇددەسىنە ساي كەلەتىن ساياسات جۇرگىزۋدە» دەدى ۇلت كوشباسشىسى.
تاۋەلسىزدىكتىڭ 30 جىلدىق بەلەسىنە ايتارلىقتاي جەتىستىكتەرمەن جەتكەن ەل تاريحىندا ۇلت كوشباسشىسى نەگىزىن قالاعان Nur Otan پارتياسىنىڭ الار ورنى بولەك. سايلاۋشىلارىنىڭ سوزىنە, ۋاجىنە قۇلاق اساتىن پارتيا – جاسامپاز ەل جەتىستىكتەرىنىڭ باستاۋىندا تۇرعان ۇلكەن قۇرىلىمنىڭ ءبىرى. سوندىقتان «ماڭگىلىك ەل» يدەياسىن جۇزەگە اسىراتىن جارقىن جوبا-جوسپارلار جالعاسا بەرەرى ءسوزسىز.
بۇل پىكىرلەردىڭ قورىتىندىسى رەتىندە: «الداعى 30 جىل – ەلدىگىمىزدى نىعايتۋدىڭ جاڭا كەزەڭى بولارى حاق. ول ءار ازامات ۇلتىمىزدىڭ بولاشاعى ءۇشىن جاۋاپكەرشىلىكتى ءوز موينىنا الىپ, ونى تولىق سەزىنە بىلگەن كەزدە جۇزەگە اسادى. ەلدىڭ ەڭ ءىرى ساياسي پارتياسى رەتىندە Nur Otan وسى باعىتتا اتقارىلار ىستەردىڭ الدىڭعى شەبىندە بولۋى كەرەك. وسىنداي يگى جۇمىستىڭ باسى-قاسىندا ءجۇرۋ – بيلەۋشى پارتيانىڭ ۇزاقمەرزىمدى كوشباسشىلىعىنىڭ كەپىلى» دەگەن پارتيا ليدەرىنىڭ شىنايى باعاسى جاۋاپكەرشىلىكتى كۇشەيتە ءتۇستى.
استانا تاريحى: اقيقاتقا اينالعان ارمان
«ءبىزدىڭ ەنشىمىزگە تاريحىمىزدا ءوز اۋقىمدىلىعى مەن قيىندىعى جونىنەن بۇرىن-سوڭدى بولىپ كورمەگەن جوبانى جۇزەگە اسىرۋ – سارىارقانىڭ تورىنە, ەركە ەسىلدىڭ بويىنا ەل قوندىرىپ, جاڭا دا اسەم ەلوردا سالۋ مارتەبەسى بۇيىردى». ەلباسىنىڭ «تاۋەلسىزدىك تاعىلىمىندا» ايرىقشا اتالعان تاقىرىپتىڭ تاعى ءبىرى – ايشىقتى استانامىز.
ەرەكشە ساۋلەت قۇرىلىستارىمەن, جاڭا كەلبەتكە يە بولىپ, ەل سۇيسىنەتىن باس قالاعا اينالعان باعانالى وردا – باستى وردامىزدىڭ اجارى ارايلى, تۇرعىندارىنىڭ تىرلىگى ءتۇزۋ بولعانى دا ەگەمەندىكتىڭ اق تاڭىندا قول جەتكەن جارقىن جەتىستىكتىڭ ءبىرى.
ءسان-سالتاناتى كەلىسكەن دۇنيەجۇزىلىك شاھارلار دەڭگەيىندە تۇرعان باس قالانىڭ اجارى جىل ساناپ ايشىقتالا تۇسۋدە. ەگەمەندىككە قول جەتكىزگەن العاشقى جىلداردا جاسالعان تاريحي تاڭداۋ ومىرشەڭدىگىن, دۇرىستىعىن دالەلدەدى. تاۋەلسىزدىك ءوز تاڭداۋ جولىن ۇسىنىپ, 1997 جىلدىڭ 20 قازانىندا پرەزيدەنتتىڭ قازاقستان استاناسىن الماتىدان اقمولاعا كوشىرۋ تۋرالى جارلىعى شىقتى. وسىلايشا ۋاقىت تالابى تاۋەلسىزدىك تۇعىرىن سارىارقانىڭ قاق تورىنە الىپ كەلدى.
جاڭا قالانىڭ كۇن سايىن ءوسىپ, ساۋلەتتەنە تۇسكەنىنە ءبارىمىز كۋامىز. شاھاردىڭ قوس جاعالاۋى ەركە ەسىلدى بويلاي, قاتار كوركەيدى. بۇگىندە ەڭسەسى بيىك, دۇنيەجۇزىلىك ۇلگىمەن سالىنعان ءزاۋلىم عيماراتتار سالتاناتى كوز تارتادى. استانا تەك سانىمەن ەمەس, ساياسي حالىقارالىق, ەكونوميكالىق ماسەلەلەردى شەشەتىن, جوعارى ءدىني قاۋىمداستىق شارالارىن, بيزنەس, مەديا فورۋمدار, سپورت, مادەنيەت مەرەكەلەرىن جانە جاسامپازدىق پەن بىرلىك رۋحىنىڭ تۋى كوتەرىلگەن ورىنعا اينالدى. وزىنە شىعىستىڭ داستۇرلەرى مەن زاماناۋي باتىستىڭ ۇمتىلىسىن ۇيلەستىرەتىن ەلوردا – مەگاپوليستەردىڭ تۇراقتى دامۋىنىڭ الەمدىك ترەندتەرىنە بەيىمدەلگەن, تەز جانە ءتيىمدى دامۋشى يننوۆاتسيالار مەن سمارت-تەحنولوگيالار قالاسى. بۇل وراسان جەتىستىكتەردىڭ بارىنە ءبىز تاۋەلسىزدىك ارقىلى جەتتىك. سوندىقتان نۇر-سۇلتان قالاسىن تاۋەلسىزدىكتىڭ اق تاڭىمەن جەتكەن باستى جەتىستىگىمىزدىڭ ءبىرى دەپ ايتۋدىڭ ۇلكەن ءمانى بار.
ۋاقىتتان وزا شاپقان بۇگىنگى استانا – تۇتاس ەلىمىزدىڭ ەرتەڭگە دەگەن ۇكىلى ءۇمىتى مەن سەنىمىنىڭ كورىنىسى, ارمانى مەن تىلەگىنىڭ كەپىلى. وزگە وڭىرلەر ءۇشىن ءوز بولمىسىمەن-اق موتيۆاتور بولىپ وتىرعان ەلوردانىڭ ەرتەڭى قازىرگىدەن دە جارقىن, كەلىستى, پەرسپەكتيۆالى بولا بەرمەك. مەنىڭ ارمانىمداعى بولاشاق باس قالا – الەمدىك ماقساتتارعا ۇمتىلعان, قارىستاپ ەمەس, قارىشتاپ دامىعان الپاۋىتشا الشاڭ باسا بەرمەك.
ەستەن كەتپەس كەزدەسۋلەر
كوڭىل تۇكپىرىندە جاتتالىپ قالاتىن, جادىدان وشپەيتىن جارقىن كەزدەسۋلەر ءار ادامنىڭ دا باسىنان وتەرى ءسوزسىز. قىزمەت بابىندا ەلباسىنىڭ اتىراۋ وبلىسىنا بىرنەشە ساپارىنا كۋا بولىپ, تالاي مارتە كەزدەستىك. ۇيىمداستىرۋشىلىق جۇمىستاردىڭ باسى-قاسىندا ءجۇرىپ, اۋقىمدى ىستەر اتقارىلعانىن كوردىك.
سونىڭ ءبىرى – 2014 جىلى 30 قىركۇيەك كۇنى ەلباسى رەسەي پرەزيدەنتى ۆلاديمير پۋتينمەن بىرگە قازاقستان مەن رەسەيدىڭ ءحى وڭىرارالىق ىنتىماقتاستىق فورۋمىنىڭ جالپى وتىرىسىنا قاتىسۋى. شارا كومىرسۋتەك سالاسىندا, سونىڭ ىشىندە مۇناي جانە گاز وندىرىسىندە يننوۆاتسيالىق تەحنولوگيالار قولدانۋ ماسەلەسىنە ارنالدى. فورۋم وتىرىسىندا سويلەگەن نۇرسۇلتان نازارباەۆ مۇناي قورى بويىنشا الەمدە 12-ورىندى يەلەنەتىن, گاز قورى جونىنەن العاشقى جيىرمالىقتاعى ەلدەردىڭ قاتارىنا كىرەتىن مۇناي-گاز ونەركاسىبىنىڭ قازاقستان ەكونوميكاسى ءۇشىن ماڭىزدىلىعىن اتاپ, ەلىمىز ءۇشىن كومىرسۋتەك سەكتورىنىڭ دامۋىن ايقىندايتىن زاماناۋي ۇردىستەردىڭ وزەكتىلىگىن ايتتى.
سونداي-اق نۇرسۇلتان نازارباەۆ قازاقستان مەن رەسەيدىڭ كومىرسۋتەك سالاسىنداعى ىنتىماقتاستىق الەۋەتى زور ەكەنىن ايتىپ: «بۇل – تەرەڭ جانە شەكتەن تىس تەرەڭ بۇرعىلاۋدىڭ وزىق تەحنولوگيالارىن ءوندىرۋ مەن سىناۋ, ول ءبىز ءۇشىن كاسپي ماڭى ويپاتىندا وزەكتى. قازاقستاننىڭ كومپانيالارى رەسەيلىكتەرمەن بىرگە ءوز ءوندىرىسىنىڭ جوعارى تەحنولوگيالىق جابدىقتارىن ۇسىنا الار ەدى» دەگەن ەدى. ءوز كەزەگىندە رەسەي پرەزيدەنتى وڭىرارالىق ىنتىماقتاستىق فورۋمى قازاقستان مەن رەسەيدىڭ اراسىنداعى سەرىكتەستىك قارىم-قاتىناستاردى دامىتۋدىڭ ماڭىزدى قۇرالىنا اينالعانىن ايتىپ, ەكى ەلدىڭ شەكارالىق ىنتىماقتاستىعىنىڭ دەڭگەيىن دە جوعارى باعالادى.
القالى فورۋمنان ءبىر كۇن بۇرىن ەلباسى استراحان قالاسىنا ۇشىپ كەلدى. وسى استراحان كەزدەسۋىندە 5 مەملەكەت اراسىنداعى كاسپي تەڭىزىنە قاتىستى وزەكتى ماسەلەلەر سارالانىپ, ەلىمىز ءۇشىن ءتيىمدى مامىلەگە كەلگەنى كۇرمەۋى شەشىلمەي جۇرگەن, كوپتەن قۇتكەن تاريحي ءسات بولاتىن. وبلىس اكىمى باقتىقوجا سالاحاتدينۇلىمەن بىرگە, اتىراۋ قالاسىنىڭ اكىمى رەتىندە, اۋەجايدان كۇتىپ الدىق. ەلگە, ۇلتقا دەگەن جاناشىرلىعىنىڭ كورىنىسىندەي, ەرتەڭگى جاۋاپتى جيىننىڭ جوعارى دەڭگەيدەگى ماڭىزدىلىعىنا قاراي دايىندىق جۇمىستارىن ءوز كوزىمەن كورۋدى ءجون سانادى.
اتىراۋ ءوڭىرىنىڭ جاعدايىن سۇراسقان سوڭ, باستى وبەكتىگە دەرەۋ جەتتىك. بارلىق جۇمىستارعا ريزاشىلىعىن ءبىلدىرىپ, ەرتەڭگى كۇنگە ساتتىلىك تىلەدى. ال ەرتەڭىنە XI فورۋم اياقتالعان سوڭ, ەلباسىنى شىعارىپ سالۋعا وبلىس اكىمىمەن بىرگە تاعى دا اۋەجايعا اتتاندىق. باقتىقوجا سالاحاتدينۇلى ءسوز اراسىندا مەنىڭ ەڭبەك جولىمدى قاراعاندىدان باستاعانىمدى, مەملەكەتتىك ورگاندارداعى ازدى-كوپتى جۇمىستارىمدى ايتتى. اڭگىمەمىز جاراسىپ, جارتى ساعاتقا جۋىق سويلەستىك. ءدال سول شاقتا, شىنىمدى ايتايىن, قارسى الدىمدا ەل پرەزيدەنتى ەمەس, اقىلمان, جول باستاۋشى اعام تۇرعانداي كۇي كەشتىم. اشىق-جارقىن كەزدەسۋدە قالا دامۋىنىڭ دۇرىس باعىتتا كەلە جاتقانىن جەتكىزدى. قوشتاساردا قولىمدى قىسىپ, شارانىڭ جوعارى دەڭگەيدە وتكەنىن تاعى ءبىر مارتە ايتتى.
وسى كەزدەسۋدەن كەيىن اتىراۋ قالاسىنا بىرنەشە قالالاردىڭ باسشىلارى كەلىپ, تاجىريبە الماسۋ ماقساتىندا ارنايى ءىسساپارلار ۇيىمداستىرىلدى. سول ءبىر-ەكى جىلدا جاۋىن-شاشىنمەن قوسا جەراستى سۋ دەڭگەيىنىڭ كوتەرىلۋىنەن اتىراۋ قالاسىندا ەكى مىڭعا جۋىق تۇرعىن ۇيلەر سۋعا كەتىپ, باسپاناسىز قالعان حالىقتى قولداۋ, دەمەۋشىلەر تارتۋ ارقىلى باستامالار ءساتتى ۇيلەسىپ, ءۇيسىز قالعاندار ءتۇرلى تەتىكتەرمەن باسپانالارمەن قامتىلدى.
حالىقتان كىم اسىرىپ ايتقان؟! «ديىرمەننىڭ تاسىنداي دوڭگەلەنگەن دۇنيە» ءبىر ورنىندا تۇرمايتىنى بەلگىلى. تاۋەلسىزدىك ماڭگىلىك! ءار قازاقستاندىق الداعى ۋاقىتتا ونىڭ تۇعىرىن نىقتاپ, ەڭسەسىن تىكتەپ, ابىرويىن اسىرۋعا قىزمەت ەتۋگە ءتيىس. «ماڭگىلىك ەل» يدەياسىنىڭ تۇپكى ماقساتى وسىندا. ەل مۇددەسىنە ساي ەڭبەگىمىز ەسەلەنىپ, تاۋەلسىزدىگىمىز تۇعىرلى بولعاي!
نۇرلىبەك وجاەۆ,
قازاقستان رەسپۋبليكاسى
پارلامەنتى ءماجىلىسىنىڭ
دەپۋتاتى
