اقش پاۆيلونى كورمە كەزىندە تەحنولوگيا مەن يننوۆاتسيا سالاسىنداعى سوڭعى جەتىستىكتەرىن تانىستىراتىن بولادى.
الەمدى اۋزىنا قاراتقان اقش ەلوردا تورىندە وتەتىن كورمەگە اسقان دايىندىقپەن كەلگەن. ءۇش بولىمنەن تۇراتىن باعدارلامالارى نەبىر قىزىققا تولى بولماق.
«ءبىزدىڭ پاۆيلون الەمدىك ساحنادا اقش-تىڭ كۇش-قۋاتىن, يننوۆاتسيا سالاسىنداعى جەتىستىكتەرى مەن شىعارماشىلىعىن كورسەتەدى. ەكى ەل اراسىنداعى بەرىك ارىپتەستىك تە اتالىپ وتەدى» دەيدى اقش پاۆيلونىنىڭ پرەزيدەنتى جانە اتقارۋشى باس ديرەكتورى دجوشۋا ۋوكەر.
«تاۋسىلماس قۋات كوزى» تاقىرىبىن ارقاۋ ەتكەن پاۆيلون باعدارلاماسىنىڭ تەاتر بولىمىندە ستۋدەنت-ەلشىلەر وتكەن تاريحتى ەسكە تۇسىرتەدى. اقش-تىڭ يننوۆاتسيالىق رۋحىن دارىپتەيتىن فيلم كورسەتىلگەننەن كەيىن قوناقتاردى قايتالانباس شوۋ كۇتىپ تۇر. سينحروندى الىپ ءۇش ەكراننان كورسەتىلەتىن شوۋ ەدەننەن توبەگە دەيىنگى كوپ قاباتتى دىبىس پەن جارىق اسەرىنەن كەز كەلگەن ادامعا كوتەرىڭكى كوڭىل كۇي سىيلايدى.
ءارى قاراي كەلگەن قوناقتارعا ەنەرگيا تاقىرىبىندا ءتۇرلى سۇراقتار قويىلادى. سوڭىندا «تاۋسىلماس قۋات كوزى ءبىز ءوزىمىز» دەپ عالامدىق ماسەلەلەردى قالاي شەشىپ جاتقاندىقتارىن پاش ەتەدى. مۋلتيمەديالىق تانىستىرىلىم ەۋرازيا قورىنىڭ قولداۋىمەن دۇنيەگە كەلگەن ەكەن. ءبىر ەرەكشەلىگى, اقش پاۆيلونىن ستۋدەنت-ەلشىلەر تانىستىرادى. ولار اقش-تىڭ 29 شتاتىنان كەلگەن. قازاق جانە ورىس تىلدەرىمەن قاتار, 17 ءتىلدى ەركىن مەڭگەرگەندەردىڭ ءبارى – ستۋدەنتتەر مەن اسپيرانتتار.
«كورمە كەزىندە امەريكانى ستۋدەنت-ەلشىلەردەن ارتىق ەشكىم تۇسىندىرە المايدى» دەيدى اقش-تىڭ قازاقستانداعى ەلشىسى, اقش پاۆيلونىنىڭ كوميسسارى دجوردج كرول مىرزا. ايتا كەتەيىك, پاۆيلون قايىرىمدىلىق كومەك ارقىلى قارجىلاندىرىلعان ەكەن. دەمەۋشىلەردىڭ قاتارىندا ەلىمىزگە تانىمال Chevron, GE, AES, ExxonMobil, Fluor, Mastercard, Coca-Cola, Microsoft, Visa جانە WR Grace كومپانيالارى بار.
گۇلميرا ايماعانبەت
