استانا قالاسى بويىنشا مەملەكەتتىك كىرىستەر دەپارتامەنتىنىڭ دەرەگىنە قاراعاندا, 31 تامىزعا دەيىن جەرگىلىكتى ورىنداۋ ورگاندارىندا جالپى سوماسى 96 865 385 مىڭ تەڭگە بولاتىن بارلىعى 7 665 ءوتىنىش كەلىپ تۇسكەن.
سونىڭ ىشىندە 59,9 ملرد تەڭگەنى قۇرايتىن 9 649 تۇرعىن ءۇي نىسانى, 36,9 ملرد تەڭگە 10 262 تۇرعىن ءۇي ەمەس نىسان, 22,5 ملرد تەڭگەنىڭ 1 073 كوممەرتسيالىق نىسانى بولىپ وتىر. جالپى 32,9 ملرد تەڭگەنىڭ 6 938 مۇلكى زاڭداستىرىلدى.
– قارجىنى زاڭداستىرۋ بويىنشا دا جۇمىس بەلسەندى جۇرگىزىلىپ جاتىر. بۇگىنگە دەيىن 439 322 947 مىڭ تەڭگە كولەمىندە اقشا زاڭداستىرىلدى. تاعى 1 439 670 مىڭ تەڭگەنىڭ ارناۋلى ەسەپتە تۇرعان 18 نىسانى رەسمي تۇردە تىركەلىپ, تىزىمگە الىندى. بۇل نىسانداردىڭ 10-ى قازاقستان رەسپۋبليكاسىنىڭ اۋماعىنان تىس جەرلەردەگى جىلجىمايتىن مۇلىكتەر بولىپ وتىر. بۇلاردىڭ جالپى قۇنى 440 846 مىڭ تەڭگە. زاڭدى تۇلعانىڭ جارعىلىق كاپيتالىنا قاتىسۋ ۇلەسى – 458 150 مىڭ تەڭگە. ونىڭ 6 250 مىڭ تەڭگەسى ەل اۋماعىنان تىس جەردە بولىپ وتىر, – دەيدى استانا قالاسى بويىنشا مەملەكەتتىك كىرىستەر دەپارتامەنتىنىڭ ءتۇسىندىرۋ جۇمىسى باسقارماسىنىڭ باسشىسى ساۋلە بايماعامبەتوۆا.
ايتا كەتەيىك, جىل باسىنان ارنايى زاڭعا وزگەرىس ەنگىزۋ ناتيجەسىندە بۇگىندە اقشالاي قاراجاتتاردى زاڭداستىرۋ ءتارتىبى ءبىرشاما جەڭىلدەگەن. مامانداردىڭ ايتۋىنا قاراعاندا, قارجىسى مەن مۇلكىن زاڭداستىرۋ ارقىلى ازاماتتار قىلمىستىق قۋدالاۋدان ساقتاندىرىلىپ قويماي, اكىمشىلىك جاۋاپكەرشىلىكتەن قۇتىلىپ, سالىق تولەۋدەن بوساتىلادى. قۇزىرلى ورگاندار مۇلكىن زاڭداستىرۋشى ازامات جايلى اقپاراتتاردىڭ قۇپيالىلىعىن قامتاماسىز ەتۋگە دە كەپىلدىك بەرەدى. جاريالانعان سۋبەكتىلەر قۇقىق قورعاۋ جانە باسقا دا مەملەكەتتىك ورگاندار تاراپىنان بولۋى مۇمكىن زاڭسىز ءىس-ارەكەتتەردەن تولىقتاي قورعالعان. سونىمەن, قىلمىستىق ءىس جۇرگىزۋ نەمەسە مۇلىكتى جانە اقشانى جاريالاۋدى ىستە دالەل رەتىندە قولدانۋعا تىيىم سالىنادى. سونىمەن قاتار, جاريالانعان مۇلىك تاركىلەنبەيدى.
بۇركىت نۇراسىل
