ءسۇيىنشى حالايىق! 15 ماۋسىم كۇنى قاراعاندى وبلىسى, اقتوعاي اۋدانىنىڭ ورتالىعى – اقتوعاي كەنتىندەگى ورتا مەكتەپتە الاش كوسەمى ءاليحان بوكەيحاننىڭ مۋزەيى اشىلادى.
بۇل يگىلىكتى شارانىڭ ەكى ەرەكشەلىگى بار. ءبىرىنشىسى – كورنەكتى قوعام جانە مەملەكەت قايراتكەرى, «الاش» قوزعالىسىنىڭ جەتەكشىسى, «الاشوردا» ۇكىمەتىنىڭ توراعاسى, پۋبليتسيست, عالىم, اۋدارماشى ءاليحان نۇرمۇحامەدۇلى بوكەيحاننىڭ ءومىرى مەن قىزمەتىنە ارنالعان مۋزەي كىندىك قانى تامعان تۋعان جەرىندە العاش رەت اشىلعالى وتىر.
ەكىنشىسى – بۇل ىزگى شارا ازاماتتىق باستامادان تۋىنداعان. العاشقى مۋزەي ءا. بوكەيحان اتىنداعى مەكتەپتى 1984 جىلى (ول كەزدە م. گوركي اتىندا بولاتىن) بىتىرگەن تۇلەكتەردىڭ قارجىلاي كومەگىمەن جاساقتالىپ وتىر. مۋزەي الاش كوسەمىنىڭ ءومىرىن كەزەڭ-كەزەڭمەن قامتيتىن تاريحي فوتوسۋرەتتەردىڭ كوشىرمەلەرىمەن بەزەندىرىلەدى جانە ءاليحان بوكەيحاننىڭ كوپتومدىق ەڭبەكتەرى مەن وعان قاتىستى جىزالعان كىتاپتار, ت.ب زاتتار قويىلادى.
ۇيىمداستىرۋشىلاردىڭ ايتۋىنشا, بۇل ءىس-شارانىڭ ماقساتى – ۇلت كوسەمى الەكەڭنىڭ ەسىمىن ۇلىقتاۋ, ءومىرى مەن قىزمەتىن, شىعارماشىلىعىن وسكەلەڭ ۇرپاققا ۇلگى ەتۋ, ءپاتريوتيزمدى, وتانسۇيگىشتىك سەزىمدى ناسيحاتتاۋ, جاستار مەن بالالاردىڭ رۋحاني قاسيەتتەرىن, مىنەز-قۇلقىن, ەلسۇيەرمەندىك جانە ازاماتتىق ۇستانىمدارىن قالىپتاستىرۋعا وڭ اسەر ەتۋ.
مۋزەيدىڭ اشىلۋى سالتاناتى 15 ماۋسىم كۇنى, ساعات 10.00-دە وتەدى. سالتاناتتى راسىمگە 1984 جىلى مەكتەپ بىتىرگەن تۇلەكتەر, اقتوعاي اۋدانى اكىمشىلىگىنىڭ, باق-تىڭ, زيالى قاۋىم وكىلدەرى, اۋدان جۇرتشىلىعى, الىس-جاقىننان كەلگەن قوناقتار, جاستار مەن وقۋشىلار قاتىسادى.
